ASTANA. QazAqparat - Búgin Almaty oblysynyń ákimi Amandyq Batalov «QTJ» UK» AQ prezıdenti Asqar Mámınmen birge «Qorǵas-SHyǵys qaqpasy» arnaıy ekonomıkalyq aımaǵynyń birneshe nysandaryn aralap qaıtty, dep habarlaıdy oblystyq ákimdiktiń baspasóz qyzmeti.
Sapar barysynda olar aımaqty damytýǵa qatysty jobalardyń júzege asyrylý barysyna qatysty suraqtarmen qatar, álemniń eń iri «DubaiPortWorld» logıstıkalyq kompanıasynyń birlesken basqarýyndaǵy «Qurǵaq porttyń» operasıalyq qyzmetiniń qazirgi jaı-kúıimen tanysty.
Sonymen qatar, Nurkent eldi mekeniniń negizindegi jańa qalanyń birinshi kezektegi qurylysyn júrgizýdiń bas jospary jobasymen jáne qurylysy 2016 jyly aıaqtalýy josparlanǵan «Almaty - Qorǵas» avtomobıl joly qurylys jobasynyń iske asyrylý barysymen tanysty.
Esterińizge sala ketsek, «Qurǵaq port» óziniń operasıalyq qyzmetin eki aıdyń kóleminde júrgizýde. Eýroodaqtan QHR-ǵa jáne QHR-dan Evrazıa qurlyǵyna avtomobıl kólikterin tasymaldaý qyzmetin kórsetýde. Qyzmetkerlerdiń shtattyq birligi jergilikti turǵyndardan jasaqtalǵan. Olar álemniń aldyńǵy qatarly logıstıkalyq ortalyqtarynan bilimderin jetildirip turady. «HewlettPackard», «DBSchenker», «Toyota», «FESCO», «BRAVIS» kompanıalarymen «Qorǵas - Shyǵys qaqpasy» arnaıy ekonomıkalyq aımaǵynda óńdep, Altynkól stansıasy arqyly konteınerlik poezdardy tranzıtteýdi qalyptastyrý boıynsha kelisimsharttarǵa qol qoıyldy.
Sondaı-aq «Qurǵaq port» jobasy aıasynda temirjoldyń kirme joldary, qoımalar men konteınerler alańy salyndy. Osy kezeńde «Qorǵas» shekara mańy yntymaqtastyǵy halyqaralyq ortalyǵynda eksporttaý-ımporttaý boıynsha saýda-sattyq operasıalaryn qalyptastyrý jáne kelisimsharttyq logıstıka boıynsha 5 ınvestısıalyq joba iske asyrylýda. Taǵy 10 joba qarastyrylý ústinde. Jobalardyń ınvestısıalyq jalpy quny 300 mln. teńgeni quraıdy.
«Nurly jol» baǵdarlamasy aıasynda iske asyrylyp jatqan jobalar Qazaqstannyń tranzıttik-kóliktik áleýetin damytýǵa jáne Jańa Jibek joly ekonomıkalyq beldeýin qurýǵa úlken serpin beretindigi anyq.
Derekkóz: QazAqparat
