ALMATY. QazAqparat - Búgin Almatyda "Nur Otan" partıasy qalalyq fılıalynyń tóraǵasy, qala ákimi Baýyrjan Baıbektiń tóraǵalyǵymen qalalyq fılıaldyń saıası keńesi búrosynyń keńeıtilgen otyrysy ótti.
Jıyn barysynda partıa AQF janyndaǵy qalalyq sybaılas jemqorlyqqa qarsy kúres jónindegi qoǵamdyq keńestiń esebi tyńdalyp, bilim berý jáne densaýlyq saqtaý salalaryndaǵy halyqqa qyzmet kórsetýdegi ashyqtyq pen eseptilik sharalary qaraldy.
«Elbasy basshylyǵymen elimizde jemqorlyqqa qarsy is-qımyl qarqyndy kúsh alyp keledi. Kúrestiń ıdeologıalyq negizi qalyptasyp, quqyqtyq bazasy nyǵaıtyldy. Memlekettik qyzmetti jetildirý maqsatynda keshendi reforma júrgizilip keledi. Merıtokratıa prınsıpterine negizdelgen kásibı «A» korpýsy jabdyqtaldy. Saıası keńestiń otyrysynda 2015-2025 jyldarǵa arnalǵan is qımyldyń partıalyq baǵdarlamasyn qabyldadyq. Memleket basshysy on jylǵa arnalǵan memlekettik strategıany bekitti. Bul máseleler Elbasy usynǵan 5 ınstıtýsıonaldyq reformadan kórinis tapty. Biz úshin bul asa jaýapty mindet», - dedi partıa fılıalynyń tóraǵasy.
Otyrys barysynda jemqorlyq kórinisin túbegeıli joıý maqsatynda ákim apparaty men Memlekettik qyzmet isteri jáne sybaılas jemqorlyqqa qarsy is-qımyl jónindegi departamentke bir aı merziminde aımaqtyq baǵdarlamany qaıta qaraý jáne birqatar naqty sharalarmen tolyqtyrý tapsyryldy.
Qalalyq Máslıhat depýtaty Alshanov Rahmannyń aıtýynsha, kóptegen memlekettik mekemelerde saıt jumys jasamaıdy nemese múlde joq. Senim telefondaryna eshqashan habarlasý múmkin emes.
«36 jergilikti atqarý organynyń 5-inde saıt joq. Onyń ishinde aýylsharýashylyǵy, jer qatynastary, din isteri, avtojoldar, turǵyn-úı ınspeksıasy basqarmalarynyń arnaıy saıttary joq. Saıty bar basqarmalardyń ózinde kópshiliginde senim telefondary, azamattardy qabyldaý ýaqyty kórsetilmegen», - dedi Rahman Alshanov
Akademık R.Alshanov partıa men memlekettik organdar qyzmetin úılestirýdiń qoǵamdyq keńeske júktelýi qaladaǵy áleýmettik, medısınalyq, quqyqtyq qyzmettiń sapasyn kóterýge, bilim salasyndaǵy «aqsha jınaý» sıaqty úrdisterge tosqaýyl qoıýǵa yqpal eterine senim bildirdi.
Derekkóz:QazAqparat
