ASTANA. QazAqparat - «Aqtaý halyqaralyq teńiz saýda porty» UK» AQ prezıdenti Mıhaıl Ialbachev bastaǵan delegasıa Sankt-Peterbýrg qalasynda ótken «Kóliktik-tranzıttik áleýet» VIII halyqaralyq forýmyna qatysty. 
Bul týraly «QTJ» UK» AQ baspasóz qyzmetinen habarlady.

Forýmǵa qatysýshylar kólik júıesiniń tıimdiligin arttyrý, kólik kesheniniń jańa ekonomıkalyq jaǵdaıǵa baılanysty jańǵyrtylýyn talqylady.

Eki kúndik pikir talas barysynda ınfraqurylymdy damytý jobalary memleket - jeke kásipkerlik seriktestigi, ınvestısıa tartý, kóliktegi keden, tarıf, salyq saıasaty máselelerin talqylady.

Pikirsaıysqa qatysqan Aqtaý teńiz portynyń jetekshisi M.Ialbachev óziniń baıandamasynda «Jańa Jibek joly» baǵdarlamasyn júzege asyrýda Eýrazıalyq naryqtaǵy kólik qyzmeti salasynyń tranzıtti memleket retinde Aqtaý portynyń mańyzy zor ekendigin atap ótti.

Qazirgi tańda teńiz porty júk tasymalyn jylyna 3 mıllıon tonnaǵa arttyrý maqsatynda «Aqtaý portyn soltústik baǵytta keńeıtý» jumystary júrgizilip jatyr. Bul joba «Nurly jol» baǵdarlamasy aıasynda júzege asyrylýda.

«Búgingi tańda Aqtaý teńiz portynda Kaspııdiń ózge porttarymen birge básekelestikke saı bolý maqsatynda keshendi sharalar júzege asyrylýdy. Onyń ishinde júkterdiń jańa túrlerin tasymaldaýdy júzege asyrý, qazirgi qyzmet etip otyrǵan parom keshenin jańǵyrtý josparyn jáne jańa parom kesheni qurylysyn júrgizý, resimdeýdiń jeńildetilgen túri - munyń barlyǵy porttyń mýltımodaldyq logıstıkalyq senimdi tizbekti quraıdy»,- dedi M.Ialbachev.