QYZYLORDA. QazAqparat - Búgin Qyzylordada «Altyn kúz-2015» merekesinde jańadan ıpodrom ashylyp, at báıgesi ótti. Sharaǵa aımaq basshysy Qyrymbek Kósherbaev qatysyp, oblys jurtshylyǵyn merekelerimen quttyqtady.
Oblys ortalyǵynda jańadan paıdalanýǵa berilgen ıpodrom memlekettik jeke-áriptestik aıasynda «QazGerMunaı» jaýapkershiligi shekteýli seriktestiginiń qarjysynan salyndy. Barlyq halyqaralyq talaptarǵa saı. Munda, at sport túrlerin úıretetin úıirmeler jumys jasaıtyn bolady. Endi aımaqta joǵary deńgeıdegi jarystardy ótkizip, ulttyq sportty ulyqtaýǵa múmkindik bar.
«Qazaqta atqa baılanysty teńeýler, ánder, jyrlar kóp. Bul jylqy janýaryn kıeli sanaǵannyń belgisi. Respýblıkalyq jarystarǵa oblysymyzdan qatysqan aýyzdyǵynan jel esken, asyl tuqymdy «Imperator», «Qara qyz» sekildi tulparlar el aýzynda ańyz bolyp aıtylyp júr. Búgin paıdalanýǵa berilip otyrǵan jańa ıpodromda sol sáıgilikterdiń izin jalǵaıtyn tulparlar shyǵatynyna senimdimiz. Mereke barshańyzǵa qutty bolsyn», - dedi oblys ákimi Q.Kósherbaev.
Kúni keshe oblysta egin jınaý naýqany aıaqtaldy. Dıqandar bıylǵy jyldy tabysty aıaqtady. Solardyń arasyndaǵy úzdikteri mereke barasynda marapattalyp, avtokólik kiltteri tabystaldy.
At báıgesi úsh túri boıynsha ótti. Jarysqa Almaty, Shymkent, Taraz jáne Qyzylordadan 42 sáıgilik qatysty. Qunan báıgede shıelilik Mahanbet Maılybaıdyń «Reana» atty jylqysy top jardy. Shabandozy Medet Esentur. Al qyzylordalyq Sabyrhan Erasyl shapqan «Daraboz» atty sáıgilik toq báıgede shashasyna shaq juqtyrmady. Attyń ıesi - Baqtıar Bekejanov. 25 shaqyrymǵa sozylǵan alaman báıge jarys kórkin qyzdyrdy. Kórermenderdiń qıqýy, sáıgilikterge shabyt berdi. Bul syndada qyzylordalyq «Aıtory» esimdi jylqy jeńimpaz atandy. Shabandozy Erbolat Dosjanov, at ıesi - Talǵat Kıikbaev. Jeńimpazdar men júldegerler aqshalaı syılyqtarmen jáne arnaıy dıplomdarmen marapattaldy.
"Qamshy"silteıdi
Derekkóz: Qazaqparat
