QYZYLORDA. QazAqparat - Búgin Qyzylordada «Altyn kúz-2015» merekesine oraı aýyl sharýashylyq jármeńkesi ótti. 
Barlyq aýdan men qala mańyndaǵy sharýa qojalyqtarynan 522 kólikpen 1690 tonna ónim ákelindi. Jalpy sommasy 406,1 mıllıon teńgeni quraıdy. Aýyl sharýashylyq daqyldary naryq baǵasynan 15-20 paıyz arzan satyldy. Jármeńkeler oblys ortalyǵynyń 9 móltek aýdanynda ótti. Aımaq basshysy Qyrymbek Kósherbaev barlyq jármeńkeni aralap, turǵyndarmen tildesti.

Syr dıhandary bıylǵy jyly kúrishtiń ár gektarynan 50,5 sentner ónim jınap, el qambasyna 423 myń tonnadan astam astyq quıdy. Bul el táýelsizdigi kezeńindegi rekordtyq kórsetkish sońǵy 3 jyl boıy qatarynan qaıtalanyp otyr. 

Aımaqta egin sharýashylyǵymen birge mal, balyq sharýashylyǵyn damytý barysynda da tabystar kóp. Bul salalardy ári qaraı damytý maqsatynda Jańaqorǵan aýdanynda birinshi ret malshylar sleti jáne  Aral aýdanynda   birinshi ret balyqshylar sleti ótti.  Aıta keteıik, bıyl oblysta qýaty jylyna 7 myń tonna toqty etin óńdeıtin et kombınatyn jáne iri mal bordaqylaý alańdaryn salý jumystary qolǵa alyndy.

Bir ereksheligi bul jolǵy jármeńkede ulttyq sýsyndar molynan boldy. Sondaı-aq, kartop, jýa, sábiz sekildi daqyldardy turǵyndar talasa-tarmasa aldy. Óıtkeni, baǵasy qaltaǵa qonymdy. 50-60 teńgeniń shamasynda saýdalandy. Qala turǵyndary qystyq azyqtaryn arzan baǵada alyp jatqandyqtary rızashylyqtaryn bildirdi.