ALMATY. QazAqparat - Almatyda tańǵy saǵat 09:45-te halyqaralyq «Almaty týry-2015» birkúndik tas joldyq velojarysy bastaldy.
Jarystyń saltanatty ashylý rásiminde sóılegen sózinde Almaty qalasynyń ákimi Baýyrjan Baıbek veloshabandozdardy bıylǵy týrǵa qatysyp jatqandaryna alǵysyn bildirip, olarǵa sáttilik tiledi.
«Bul sport merekesi jyl ótken saıyn ulǵaıyp, velosaıys áleminde úlken bedelge ıe bolýda. Týrǵa qatysýshy álemniń úzdik komandalary men velosport maıtalmandarynyń sany kún ótken saıyn artyp keledi. Bul - biz úshin úlken mártebe. Otandyq velosportshylarǵa halyqaralyq deńgeıde kúsh synaýǵa berilgen biregeı múmkindik. Al qala turǵyndaryna jasalǵan úlken syı. «Almaty týry» velojarysy bıyl úshinshi ret ótkizilip jatyr. Ótken jyly halyqaralyq velosıpedshiler odaǵy bul týrdyń mártebesin 1.1sanatyna kótergen. Endi oǵan álemdik deńgeıdegi kásipqoı komandalar da qatysa alady. Bul sózsiz, jarystyń bedelin de, mártebesin de arttyra túsedi. Endi komandalar arasynda jarys barynsha tartysty bola túsedi degen senimdemin. Júzden júırik, myńnan tulpar shyqsyn», - dedi B. Baıbek.
«Nurly taý» bıznes ortalyǵynyń aldyndaǵy sórege jınalǵan komandalar tańǵy saǵat 09:45-te jarys jolyna shyqty. Búgingi sporttyq sharanyń ashylý rásimine qurmetti qonaq retinde qatysqan «Astana EKSPO-2017» ulttyq kompanıasynyń basqarma tóraǵasy Ahmetjan Esimov «start» tapanshasynan áýege oq atyp, jarysty bastap berdi.
Veloshabandozdar 31 shaqyrymnan turatyn alty aınalymdy júrip ótedi. Iaǵnı, jarys jolynyń jalpy qashyqtyǵy - 186 shaqyrym.
«Astana Pro Team» komandasynyń quramynda myna qazaqstandyq veloshabandozdar qatysady: «Týr Almaty 2014» jeńimpazy Alekseı Lýsenko, Arman Qamyshev, Rýslan Tleýbaev, Danııl Fomınyh, Andreı Zeıs ı Bahtıar Qojataev, jáne de «Výelta Ispanıa-2015» velokópkúndiktin trıýmfatory ıtalályq Fabıo Arý men onyń otandasy Paolo Tıralongo.
Aıta ketelik, veloshabandozdar ál-Farabı dańǵyly boıymen batys baǵytta jarysa otyryp, Mustafın kóshesi tusyndaǵy aınalma jolmen keri burylyp shyǵysqa qaraı betteıdi. Ál-Farabı dańǵylymen Shyǵys aınalma jolyna shyqqan veloshabandozdar Talǵar baǵyty tusynan aınalma jolmen keri burylady. Osy aınalymdy olar alty ret aınalady. Máre syzyǵy - «Nurly taý» bıznes ortalyǵynyń aldy (ál-Farabı dańǵyly men Panfılov kóshesiniń qıylysy).
