ALMATY. QazAqparat - Halyqaralyq «Almaty týry-2015» birkúndik velojarysy óte joǵary deńgeıde uıymdastyrylǵan. Bul týraly búgin Almatyda ótken arnaıy baspasóz máslıhaty barysynda reseılik «Katusha» kásibı velo komandasynyń sport dırektory Gennadıı Mıhaılov málim etti.

«Biz bul jarysqa osymen ekinshi ret qatysyp otyrmyz. Ótken jyly ekinshi oryn alǵan bolatynbyz. Bıyl óte myqty qurammen keldik. Aramyzda, ótken jylǵy jarysta kúmis júldege ıe bolǵan Sergeı Cherneskıı de bar. Ótken jyly jarys biz úshin sátti boldy. Trassa bir qaraǵanǵa qıyn emes sıaqty kórinedi. Jarys joly keń, úlken ári tegis. Biraq, jarys barysynda bıiktik deńgeıiniń aıyrmasy áserin tıgizbeı qoımaıdy. Ásirese, jarystyń sońǵy shaqyrymdary jigitterge óte qıyn soǵady. Biraq, bizdiń jigitter bul qashyqtyqqa daıyn. Menińshe sońǵy shaqyrymdarda sytylyp alǵa shyqqan myqty veloshabandozdar jarys taǵdyryn sheshedi dep oılaımyn. Erteń jarys óte qyzyqty ótetindigi sózsiz. Úzdik nátıjege qol jetkizemiz degen úmittemiz», - dedi G. Mıhaılov.

Óz sózinde «Katusha» kásibı velokomandasynyń múshesi Sergeı Cherneskıı bıylǵy jarysqa tyńǵylyqty daıyndyqpen kelgendigin jetkizdi.

«Alekseı Lýsenkomen márege jaqyndǵanda jarysý qıyn. Óıtkeni ol tez, batyl qımyldaıdy. Eger máre aldyndaǵy sońǵy dóńeste odan buryn alǵa umtylyp, sytylyp ketýge áreket jasasań, onda jeńise jetýge múmkindik bar. Ótken jyly ol menen myqty boldy. Ol bıyl da babynda. Al endi bul joly kimniń bǵy janatyndyǵyn jarys kórsetedi», - dedi S. Cherneskıı.

Aıta ketelik, ótken jylǵy jarysta birinshi oryndy «Astana Pro Team» velokomandasynyń shabandozy Alekseı Lýsenko jeńip alǵan bolatyn.

"Qamshy"silteıdi

Derekkóz: QazAqparat