Venesýela AQSH-pen munaı kelisimine daıyn — Tramp ákimshiligi eldiń resýrstaryna tolyq baqylaý ornatatynyn málimdedi.
Venesýelanyń ýaqytsha prezıdenti Delsı Rodrıges AQSH-pen munaı salasynda kelisim jasaý múmkindigin qorǵap, Vashıngtonmen energetıkalyq yntymaqtastyqqa ashyq ekenin málimdedi. Onyń aıtýynsha, AQSH-tyń burynǵy prezıdent Nıkolas Madýrony bılikten kúshpen ketirýi eki el arasyndaǵy qatynastarǵa «daq túsirgenimen», Amerıkamen saýda jasaý tosyn jaǵdaı emes.
Bul málimdeme Tramp ákimshiligi Venesýela munaıyna tikeleı baqylaý ornatýǵa kóshkenin málimdegen tusta aıtyldy. Osy aptada AQSH sanksıalanǵan eki munaı tankerin tárkilep, bolashaqta Venesýeladan óndiriletin munaıdyń barlyq satylymyn ózi basqaratynyn habarlady.
AQSH-tyń energetıka mınıstri Krıs Raıttyń aıtýynsha, Vashıngton Venesýeladan shyqqan munaıdy halyqaralyq naryqta ózi ótkizedi jáne bul baqylaý uzaq merzimge jalǵasady.
Al vıse-prezıdent Djeı Dı Vens Venesýela munaıyn satý AQSH-tyń ulttyq múddesine saı bolǵan jaǵdaıda ǵana múmkin bolatynyn ashyq aıtty. Onyń sózinshe, Venesýela óz resýrstaryn tek Amerıka talaptaryna sáıkes paıdalana alady.
Osy aptada Donald Tramp Venesýela munaıyna qol jetkizýge arnalǵan 2 mıllıard dollarǵa deıingi kelisim jarıalap, el bıligi AQSH kompanıalaryna naryqty ashýǵa májbúr ekenin ańǵartty. Áıtpese, jańa áskerı qysym bolýy múmkin ekenin de jasyrmady.
Aq úıdiń málimetinshe, Venesýelaǵa kirip-shyǵatyn munaı tasymaly tek AQSH maquldaǵan arnalar arqyly júzege asady. Bul — álemdegi eń iri dáleldengen munaı qoryna ıe eldiń energetıkalyq sektoryna buryn-sońdy bolmaǵan deńgeıde baqylaý ornatý degen sóz.
Tramp Venesýela munaıynan túsken tabysqa eldiń tek amerıkalyq ónimderdi ǵana satyp alatynyn da málimdedi. Aldaǵy kúnderi ol Aq úıde iri munaı kompanıalarynyń basshylarymen kezdesip, Venesýelada óndiristi arttyrý joldaryn talqylaıdy.
Financial Times basylymynyń habarlaýynsha, amerıkalyq munaı alpaýyttary Venesýelaǵa iri ınvestısıa salý úshin Vashıngtonnan qatań quqyqtyq jáne qarjylyq kepildikter talap etip otyr.
Sarapshylar bul jaǵdaıdy AQSH-tyń Latyn Amerıkasyndaǵy yqpalyn kúsheıtý ǵana emes, jahandyq munaı naryǵyna áser etetin jańa geosaıası kezeńniń bastalýy dep baǵalap otyr.
