QR Premer-mınıstriniń orynbasary - Mádenıet jáne aqparat mınıstri Aıda Balaeva 2030 jylǵa deıingi mıgrasıalyq saıasat konsepsıasynyń negizgi baǵyttaryn tanystyrdy.
Endi mıgranttar tek naqty kadr tapshylyǵy bar salalarǵa tartylatyn bolady, al olardyń aǵymy el ekonomıkasy men óńirlerdiń qajettilikterine sáıkes retteledi.
«Mıgrasıalyq zańdardy saqtaý qatań baqylanady, al zań buzǵandar – mıgrant ta, jumys berýshi de – jaýapqa tartylady. Qaýipsizdik elge kirgen sátten bastap shyǵýǵa deıin qamtamasyz etilýi tıis», – dedi mınıstr.
2026 jylǵy qańtardan bastap, sheteldikterdiń turaqty turýǵa ótinish berýi úshin aldyn ala baǵalaý júıesi engiziledi. Etnıkalyq qazaqtarǵa jeńildikter qarastyrylǵan bólek rásim ázirlendi. Bul azamattar «qandas» mártebesin alyp, eńbek tapshylyǵy bar óńirlerge – Aqmola, Abaı, Qostanaı, Pavlodar, Atyraý, Batys Qazaqstan, Shyǵys Qazaqstan jáne Soltústik Qazaqstan oblystaryna qonystanady.
Qandastar óńirlik kvota boıynsha kóshken jaǵdaıda bes jyldyq áleýmettik kelisimge qol qoıady. Eger belgilengen merzimnen buryn ketse, alǵan qarajatty qaıtarýǵa mindetti. Sonymen qatar, qarapaıym kóshi-qon tártibi de qoldanylady, biraq ol jeńildikter men qoldaýsyz júzege asady.
Aıda Balaeva jańa saıasat kezeń-kezeńimen engiziletinin, oǵan qoǵam, bıznes pen aımaqtardan alynatyn pikirler eskeriletinin atap ótti.
«Mıgrasıa tek zańdy, rettelgen jáne qaýipsiz jaǵdaıda ǵana memlekettiń jáne azamattardyń múddesine qyzmet etedi», – dep qorytyndylady A. Balaeva.
