Memleket – belgili bir aýmaqqa ıelik etip, sol jerdegi halyqtyń erkin damýyna múmkindik beretin, qoǵam tabıǵatynan týyndaıtyn ortaq isterdi atqarýǵa qajetti basqarýdyń joǵarǵy dárejede uıymdasqan júıesi, saıası bılik uıymy. Egemendikke ıe jáne qoǵamdy basqarýdy arnaıy mehanızmder (apparat) arqyly júzege asyratyn qoǵamdaǵy saıası bılikti uıymdastyrýdyń erkeshe túri, saıası júıeniń ortalyq ınstıtýty dep jatamyz. Qashan bolmasyn memlekettiń óz azamattarynyń ómiri men quqyqtarynyń qorǵalýy aldyndaǵy jaýapkershiligin joqqa shyǵara almaımyz. Iaǵnı, memleket óz azamattarynyń áleýmettik turǵyda tolysýyna, qoǵamǵa paıdaly bilim alyp, bilimi men tájirıbesin qoǵam ıgiligine jumsaýǵa qajet jaǵdaılar týǵyzýǵa mindetti bolsa, azamattar óz kezeginde soǵan laıyqty jaýap qatady. Kúsh-jigerin ortaq iske – Otanyn gúldendirýge jumsaıdy.
Bir qaraǵanda jalyndy pafosqa uqsaǵanymen, bul – ómir zańy. Osy turaqty úrdistiń kidirmeı qozǵalysta bolýyn, taraptardyń bir-biri aldyndaǵy mindettemelerin buljytpaı oryndaýyn qamtamasyz etetin bir kúsh bar. Ol kúsh – ádildik kúshi. Ádildik bolmaǵan jaǵdaıda ózara senim de bolmaıdy. Senim joǵalǵan jerde súıispenshilik pen adaldyqqa oryn joq ekeni taǵy belgili.
Kúndelikti qat-qabat tirshilik barysynda, san taraptan aǵylǵan aqparat leginiń ishinde júrip adam men qoǵam, memlekettiń damýyndaǵy adam faktory, adamdardyń tulǵalyq damýyndaǵy memlekettiń róli degen máseleler týraly oılanyp júrmiz be? Biz ózimizdi qoǵamnyń tolyqqandy múshesi retinde sezine alamyz ba? Qoǵam bizdi qanshalyqty qajetsinip otyr? Memleket pen adamnyń baılanysyn qamtamasyz etýshi altyn kópir – áleýemettik ádildik degen bar ma ózi? «Bar» deýge aýyz barmaıtyn sıaqty. Iá, eshkim qolyna shoqpar alyp, memleketke qarsy shaýyp jatqan joq. Árkim, hal-qadirinshe eńbek etip, áreket jasaýda. «Áıte qoımadyń, búıte qoımadyń. Ana jerde anany bermediń, myna jerde mynadan qur qaldym» deıtin masyldyq sanadaǵy jandar da sıregen qazir. Biraq, sonda da adam men memleket arasynda senimnen góri, sanasýshylyq basym sıaqty kórinedi. Qoǵamdyq úderisterdi retteıtin zańdar da sol senimsizdik qaǵıdalaryna negizdelgendeı.
Senim – erteńgi kúnge degen talpynysty qozǵaýshy kúsh deımiz. Biz erteńimiz týraly ne oılaımyz. Armandarymyz qandaı? Bizde arman degen bar ma jalpy? Joq sıaqty ma? Iá. Armandaýdy qoıǵanbyz. Armandaý úshin úmittendirýshi bir kúshter bolý kerek sıaqty. Al, biz bolashaǵymyzdy kóz aldymyzǵa elestete almaımyz. Elestetken kúnde de bulyńǵyr elesten ary eshteńe kóre almaımyz. Erteńge senbeımiz. Tek búginginiń kúıbeńine bas qatyrýdan ári aspaımyz. Tek búginmen ómir súrý áńgime basynda aıtylǵan adamǵa da, sol adamdar aldynda belgili bir jaýapkershilik arqalaıtyn memleketke de tán qasıet. Bálkim, qasiret...
