Kóptegen ult pen din­niń ókilderin shashaý shy­ǵar­maı, tatý-tátti tirshi­likte ustap otyrǵan ortaq shańyraǵymyz Qazaq­stannyń ulttyq ıdeıasy – Elbasy Nursultan Nazarbaev aıshyqtaǵan «Máń­gilik El» jalpy­ult­tyq ıdeıasy ǵana emes, bir­neshe urpaqtyń ómirlik usta­ny­myna aınalatyn uly múdde.
Qoǵamdy uıystyratyn adamı qasıetter men per­zenttik mindetter turǵy­synda qazaqtyń kúmiskómeı ánshisi, Uly Dalanyń bulbul úni, KSRO halyq ártisi Bıbigúl TÓLEGENOVANY áńgimege tartqan edik.
– Bıbigúl apa, ónerińiz ben talantyńyzdyń arqasynda týǵan halqyńyzǵa qyzmet etýmen qatar, eldik pen teńdikti pash etip, ulttyq tatýlyqty nasıhattaıtyn rýhanı-mádenı sharalardyń da bel ortasynda júrsiz. Ult birligine úndeıtin sondaı ıgi sharalar jóninde ne aıtasyz?
– El birligin nasıhattap, memleketimizdiń nyǵaıýy men ulttar dostyǵynyń beriktigin baıandy etetin ıgi sharalar bizde udaıy ótkizilip turady. Halqymyzdyń aýyzbirshiligi men el tynyshtyǵyna mundaı basqosýlar men memlekettik ıdeologıalyq baǵdarlamalardyń qosary kóp. Bizdegi beıbit ómirdiń kilti de osynda bolsa kerek.
Bıyl elordamyz Astanada «Máńgilik El – bolashaǵy birtutas el» atty patrıottar forýmy bolyp, onda elimizdiń ár túkpirinen Otanyn qurmet tutyp, ultyn súıetin ul-qyzdar, óner jáne mádenıet qaıratkerleri, qazaq rýhanıaty men ekonomıkasyna zor úles qosyp júrgen tarlandarymyz, memleketimizde tatý-tátti ómir súrip jatqan barsha ult ókilderiniń atynan kelgen patrıottar qatysty. Kisini bir qýantatyny – Qazaqstandaǵy dostyq pen baýyrlastyqqa, elimizdiń damýy men ilgeri basýyna osy ulan-baıtaq jerimizdi meken etip jatqan barlyq ult ókilderiniń shynaıy atsalysyp otyrǵandaryna kýá bolý jáne adamzattyq uly mindet jolynda birlese eńbektenýdi seziný eken.
– Birlikti maqsat tutqan búgingi Qazaqstannyń baǵdary qandaı dep oılaısyz?
– El birliginiń rýhanı ózegi ári alǵa basýdaǵy naqty baǵdar ol jalpyhalyqtyq «Máńgilik El» ıdeıasy bolyp tabylady. Elbasy Nursultan Nazarbaev árdaıym el tynyshtyǵy men ulttar dostyǵy, álemde kezdesetin túrli kedergilerge birtutas ult retinde moıymaı, beıbit túrde jaýap bere bilý, ómir jolynda septesip qatar júre otyryp, qorshaǵan ortaǵa paıda keltirý týraly talmaı aıtyp keledi. Mine, adamzat qundylyǵynyń altyn tiregi bolǵan uly maqsat elimizdiń memlekettik ıdeıasyna aınalyp, tatý halqymyzdy taǵy da bir maqsat aıasynda biriktire túsýde.
Búginde Qazaqstan – kóptegen ıgi nátıjelerge qol jetkizgen el. Tirshiliktiń barlyq salasynda. Osyndaı birligi men berekesi jarasqan eldi nyǵaıta túsý úshin bizder, óner men ádebıet, saıasat pen ekonomıka, bilim men ǵylym salasynda júrgen árbir qazaqstandyq óz salamyzda ozyq bolýymyz kerek. Elin súıgen patrıottyq degenimiz osy, Elbasy aıtqan «Máńgilik El» osy. Aldyńǵy býyn ókilderi qazaq halqynyń tutastyǵy men keler ǵasyrǵa jetýine óz úlesin qosa bildi, endigi úmit jastarda. Eger bizdiń búgingi urpaq bilimi asyp, bir-bir salany meńgerse, óz isiniń maıtalmany bolsa, onda Qazaqstan damyǵan ústine damı bermek, ultymyzdyń adamzattyq keńistigi keńı túspek.
– «Ultty súıý, Otanǵa qyzmet etý – ımannan» dep aıtqan eken aldyńǵy aǵa býyn ókilderi, sizdiń paıymyńyzdaǵy naǵyz patrıot – ol kim?
– Meniń uǵymymdaǵy naǵyz patrıot – ol óz ómirin týǵan eline, týǵan halqyna arnaǵan adam. Eńbektiń belgili bir salasyn meńgerýmen qatar, oǵan baryn sala jandandyryp, jańalyq engizetin jáne sol isin óz memleketiniń ilgeri damýy úshin jasaıtyn adam, mine, naǵyz patrıot. Meniń júregimdegi úlken armanym – aspanymyz máńgi ashyq bolyp, elimiz beıbitshilikte, halqymyz tynyshtyq pen toqshylyqta kún keshse, sondaı-aq, memlekettiligimizdi qalyptastyra túsý jolynda esh kedergi bolmasa eken degen arman. «Máńgilik El» ıdeıasy barsha qazaqstandyqtardyń júreginen oryn aldy, endi kúlli álem bizdiń beıbit elimiz – Qazaqstannyń shyn mánindegi «Máńgilik El» ekendigine kýá bola berse eken deımin.
Áńgimelesken
Qanat ESKENDİR,

Derekkóz: Egemen Qazaqstan