Keshe Prezıdent janyndaǵy Ortalyq komýnıkasıalar qyzmetinde ótken kezekti baspasóz máslıhatynda Astana turǵyndaryn jumyspen qamtý jaıy talqylandy. Onda málim bolǵandaı, Qazaqstan boıynsha jumyssyzdyqtyń eń tómengi kórsetkishi Astanada tirkelgen eken. Iaǵnı, jumyspen qamtý baǵdarlamalarynyń aıasynda Astananyń jeti myńnan astam turǵyny jumyspen qamtylǵan.
«Astananyń eńbek naryǵyna júrgizgen taldaýynyń negizinde ákimdik azamattardy jumyspen qamtý máselelerin sheshýge baǵyttalǵan naqty is-qımyldar júıesin ázirledi. Barlyq jumys Astana qalasynyń 2011-2015 jyldarǵa arnalǵan baǵdarlamasy jáne «Jumyspen qamtýdyń jol kartasy-2020» aıasynda júrgizilip jatyr», dedi baspasóz máslıhatyna qatysqan Astananyń jumyspen qamtý jáne áleýmettik baǵdarlamalar basqarmasy basshysynyń orynbasary Olga Demoshkan. Sondaı-aq, ol Astananyń eńbek naryǵyndaǵy jaǵdaıdy turaqtandyrý úshin «Astana qalasynyń halqyn jumyspen qamtamasyz etýdiń 2015 jylǵa arnalǵan keshendi jospary» iske asyrylyp jatqanyn tilge tıek etti. Osy oraıda qyzmetinen bosaǵan jumysshylardy eńbekpen qamtýǵa negizdelgen sharalar atqarylýda. O.Demoshkannyń málimdeýinshe, jeti myńnan astam adam baǵdarlamaǵa jumyldyrylyp, olardyń 6590-y jumyspen qamtylǵan, kásibı oqytýǵa 772 adam jiberilipti, tólenetin qoǵamdyq jumystarda 1375 adam isteýde. Sonymen qatar, áleýmettik jumystarǵa 102 adam ornalastyrylǵan, taǵy 416-sy jastar tájirıbesine jiberilipti.
«Búginde elordamyzdaǵy ekonomıkalyq belsendi halyqtyń sany 428 myńǵa jetti, ózin-ózi jumyspen qamtyǵandar – 22 myń. Jumyssyzdyq deńgeıi 0,6 paıyzǵa tómendep, 4,6 paıyzdy qurady. Bul óz kezeginde Astanaǵa Qazaqstan boıynsha kóshbasshy pozısıada turaqtaýǵa múmkindik berdi», dedi O.Demoshkan.
Al endi Astana ákimdiginiń jumyspen qamtý ortalyǵynyń dırektory Oljas Omarovtyń aıtýynsha, elordada Jumyspen qamtý ortalyǵyna júgingen árbir ekinshi jumyssyz eńbekpen qamtylyp jatyr. «Jyl basynan bergi 10 aıda bizge 10 myńǵa jýyq adam kelip, 4,5 myńyn jumysqa ornalastyrdyq. Iaǵnı, bizge jolyqqandardyń árbir ekinshisi jumyspen qamtyldy», dedi ol. O.Omarovtyń sózine qaraǵanda, eger de qandaı da bir sebeptermen jumysqa ornalasý múmkin bolmaı jatsa, onda qaıta daıarlaý kýrstary usynylady. Osy oraıda aǵymdaǵy jyly 627 adam qaıta daıarlaýdan ótken.
Sonymen qatar, jastarǵa, ortasha arnaıy, joǵary oqý oryndarynyń túlekteri úshin eńbegi tólenetin jastar tájirıbesinen ótý usynylady. Bıyl 585 adam jastar tájirıbesine jiberildi. Atap aıtqanda, memleket aıyna 40 myń teńge tóleıdi. Budan bólek O.Omarov halyqtyń maqsatty toptary úshin áleýmettik jumys oryndaryna jumysqa ornalasýdyń arnaıy baǵdarlamasy bar ekenin eske salyp ótti. Munymen qosa, jumyssyzdar ýaqytsha jumys oryndaryna jiberiledi, ıaǵnı eńbekaqysy tólenetin qoǵamdyq jumystarmen qamtylady. Bıyl 1700 adam osyndaı jerlerge baǵyttaldy.
«Oqýdaǵy jastarǵa, stýdentterge arnalǵan tıisti shara bar. Oqýdan bos ýaqytynda olar qosymsha tabys taba alady. 1,5 myńǵa jýyq stýdent osy sharamen qamtyldy. Sonymen birge, ortalyq bos jumys oryndary jármeńkelerin ótkizedi. Bıyl 12 jármeńke uıymdastyryldy», dedi ol.
Derekkóz: Egemen Qazaqstan
