Aral aýdany Sekseýil kentinde bir kúnde emhana men klýb ashylyp, turǵyndar qýanyshqa bólenip ja­tyr. Sekseýil kenti – toǵyz jol­dyń torabyndaǵy eldi meken. Ob­lystaǵy tirekti eldi mekenniń biri retinde ótken jyly 405 mıllıon teńge qarjy bólinip, 2 mektep, 1 balabaqsha jóndeýden ótti, uzyn­dyǵy 8 shaqyrym bolatyn 7 kóshe asfálttalǵan edi.
Elbasy Nursultan Nazarbaevtyń qoldaýymen elimizde jalpy uzyn­dyǵy 988 shaqyrymdy quraıtyn ǵasyr jobasy «Beıneý – Jezqazǵan» te­mirjolynyń qurylysy bastalyp, byltyrǵy jyly paıdalanýǵa be­ril­di. Sekseýil kenti arqyly ótetin «Beı­neý – Jezqazǵan» jol boıynda 5 beket, 1 stansa jáne 2 páterli 38 tur­ǵyn úı qurylystary júrgizilýde. Osy joba aıasynda Sekseýil kentiniń 200-ge jýyq turǵyny jumyspen qam­tyldy. 10 myńnan astam halqy bar kent turǵyndaryna arnalǵan jańa emhana zamanaýı talapqa saı. Aýy­symyna 100 kelýshige arnalǵan emha­nanyń qurylysyna 248 mıllıon teńge qarjy jumsalǵan.
– Halqymyz qashannan «Birinshi baılyq – densaýlyq» dep denniń saý­lyǵyn dúnıedegi baılyq ataýlynyń barlyǵynan joǵary qoıǵany bel­gili. Deni saý ult qana básekege qa­bi­letti 30 eldiń qataryna kirýdi maqsat etken «Máńgilik Elimizdi» da­my­týǵa qabiletti bola alady. Qýa­nysh­taryńyz qutty bolsyn,– dedi emhananyń ashylýyna qatysqan oblys ákimi Qyrymbek Kósherbaev.
«Salamatty Qazaqstan» mem­le­kettik baǵdarlamasy aıasynda oblysta densaýlyq saqtaý salasy jyldan-jylǵa jaqsara tústi. Arnaıy «Jol kartasy» qabyldanyp, materıaldyq-tehnıkalyq bazasy nyǵaıtylyp, oblys turǵyndarynyń densaýlyq kórsetkishteri edáýir jaqsardy. Sońǵy 2 jylda aımaqta 35 medısınalyq nysan paıdalanýǵa berilse, onyń ishinde kópten qurylysy bitpeı kele jatqan jalpy quny 4,8 mıllıard teńgeni quraıtyn 200 tósektik «Ana men bala» perınataldy ortalyǵy iske qosyldy. Qyzylorda qalasynda 200 tósektik kópsalaly balalar aýrýhanasynyń qurylysy júrgizilýde. 2013-2014 jyldary Shıeli, Qarmaqshy, Syrdarıa aýdandarynda jalpy quny 4,4 mıllıard teńgeni quraıtyn aýysymyna 250 kelýshige arnalǵan emhanalar salyndy. Al Aral aýdanynyń Aralqum, Qaraqum, Qamystybas eldi mekenderinde jańa dárigerlik ambý­la­torıalar paıdalanýǵa berildi. Bıyl taǵy 3 jańa densaýlyq saqtaý ǵı­ma­raty halyq ıgiligine berilgeli otyr.
Osyndaı josparly túrde jasalǵan jumystardyń nátıjesinde oblysta halyqtyń ómir súrý jasynyń uzaqtyǵy sońǵy úsh jylmen salystyrǵanda 69,5-ten 71,6 jasqa ósti.
Mádenıet salasy da mundaı kórsetkishterden quralaqan emes. Sońǵy úsh jyldyń kóleminde oblysta 19 aýyldyq klýb pen 2 mýzeı paıdalanýǵa berildi. Sondaı jańa klýbtyń biri Aral aýdanyndaǵy Sekseýil kentinde ashyldy.
«Mundaı mádenıet ordasynyń ashylýy aýyldyń ajaryn kirgizip, ónerge serpilis beredi dep bilemin. Endi aýyl azamattarynyń rýhanı demalyp, mádenı sharalar uıymdastyrýyna barlyq jaǵdaı jasalyp otyr. Tek sony tıimdi paıdalanyp, rýhanı qundylyqtarymyzdy arttyrýǵa atsalysýlaryńyz qajet. Zamanaýı úlgidegi jańa klýby bar aýyldan Syr eliniń mereı-mártebesin asqaqtatar talaı talantty ul-qyzdardyń ósip-jetilerine senimim mol», degen Qyrymbek Eleýuly jańa klýbtyń jumysymen tanysty.
Jalpy, bul aýylda ónerli óren­der kóp. Máselen, Nurbolat Seıit­qalıuly jaqynda Túrkıada ótken ha­lyqaralyq baıqaýda İ oryndy ıelen­di. Endi jańa klýbta tálim alatyn jer­gilikti ónerpazdar budan da joǵa­ry belesterdi baǵyndyratyny sózsiz.
Aıta keteıik, osy jyldyń maýsym aıynda Qamystybas eldi mekeninde 150 oryndyq jańa mádenıet úıi el ıgiligine berilse, ótken jyly aýdannyń mádenıet mekemeleri oblys búdjetinen bólingen 94 mıllıon teńgege zamanaýı úlgidegi sandyq júıedegi led-ekran, mýzykalyq aspaptar, sahnalyq kıimder, dybys jáne jaryq qondyrǵylarymen qamtamasyz etildi. Jyl aıaǵyna deıin oblysta taǵy 3 aýyldyq klýbtyń qurylysy aıaqtalady dep josparlanyp otyr.

Derekkóz: Egemen Qazaqstan