Qońyr keshter... Qońyr kúı... Qońyr dala...
Qońyr áýen áldıler kóńildi ana.
Qońyr ultqa bir túrli músirkegen
Qońyraıyp qaraı ma, ómir-dana?..
Sıaqty ma zańdylyq ómirde bul,
Qońyr tartyp turǵandaı óńim de bul.
Qazaǵym-aý, shynymen osy sen be,
Qońyr dala... Qońyr úı... Qońyr kóńil...
Qońyr minez... Qońyr oı... Shóp te qońyr,
Jer de qońyr, keshkilik kók te qońyr,
Qońyr... Qońyr... Barlyǵy tegis qońyr,
Az da qońyr, qaptaǵan kóp te qońyr...
Qońyr tústiń ishinde jaman bar ma?
Qońyr ma ózi almasqan zamandar da?
Bul qazaqta bar ózi qansha qońyr,
Qońyr... Qońyr... Sanaǵan adam bar ma?
Qońyr minez... Qońyr oı... Qońyr qabaq,
Qońyr úıge qonatyn qońyr ma Baq?
Ókinishten qop-qońyr sharshap, aryp,
Ketkenderdiń otyrmyz jolyn qarap...
Taýysa almaı qyzyǵyn bir kúniniń,
Bir kóre almaı paıdasyn birliginiń,
Bul qazaǵym shynymen Qońyr Ult pa,
Bári qońyr óıtkeni tirliginiń.
Tek qońyrdan tańdaısyń barqyt túrin,
Tártiptiniń, sen be ózi tártiptiniń
Qazaǵym-aý, bul seniń basqalardan
Shynymenen bolar ma, artyqtyǵyǵyń?
Keziń qaıda, jarq etip, ot ta bolar,
Keziń qaıda, qyzdyrar shoq ta bolar?
Qazaǵym-aý, dál osy qońyrlyǵyń
Dep oılaımyn esh ultta joq ta bolar.
Qońyr keshteı qop-qońyr kóńiliń de,
Qońyr saltaq qop-qońyr óńirińde.
Qońyltaqsyp turatyn qońyr tirlik,
Ashyq ta emes, qop-qońyr ómiriń de.
Básekege mineziń janasa ma,
Jańasha oılar, bar ma ózi jańa sana?
Sory qalyń qazaǵym, oılap kórshi,
Qońyrlyǵyń ózińe jarasa ma?
Tursa daǵy bar baılyq, qolyńda altyn,
Bógde ulttar kórýde-aý onyń narqyn...
Qońyr tirlik keshýden sharshamaısyń,
Qoıdan jýas, qozydan qońyr halqym...
Tiliń menen dinińe em qonbady,
Jatqa ketti qop-qońyr jer qoldaǵy.
25 jyl, keshesiń qońyr tirlik,
25 jyl, Táýelsiz el bolǵaly...
Ál-dármeniń ketken be, ras, boıdan?
Óletiniń qazaǵym, ras pa, oılan...
25 jyl, urylar eli boldyń
Qazaǵym-aı, qop-qońyr jýas qoıdan.
Serigiń joq, búginde qol ustarǵa,
Qul boldyń-aý, jasandy «bolystarǵa».
Jem boldyń-aý, Qazaǵym, 25 jyl
Shúrshit, jońǵar jáne de orystarǵa...
Qazaqtarǵa – sananyń jaryǵy muń,
Bile, bilseń, qazaqtyń tamuǵy bul.
Men olardy basqasha aıtar bolsam,
Shalaqazaq – qazaqtyń jaýy búgin.
Qońyr keshte qońyr ult eńireýde,
Qyryn qarap ketken be ómir elge?
Urpaqtary keshegi qyzyldardyń
Qyzyl qyrǵyn jasaýda qońyr elge.
Túk kórmegen qul-qutan asap jatyr,
Bir-birine... Qoınyna tas ap jatyr.
Dinsiz, tilsiz, teksizder, bılikti alyp,
Oılaryna kelgenin jasap jatyr.
Kóringenge jem bolyp dala jatyr,
Jórgeginde shyryldap bala jatyr.
Qońyr ultym, namystan qap-qara bop,
Birte, birte, qaraıyp bara jatyr.
Alla biler, ne joqsyń, bar bolarsyń,
Kileń qulǵa – qul bolǵan jan bolarsyń.
Sol keshegi qop-qońyr tirligińe,
Búıte berseń, qazaǵym zar bolarsyń.
Syrt aınalǵan ózińnen taza qudaı,
Qońyr tústi taǵdyrdyń mazaǵyn-aı...
Qop-qońyr bop barasyń qońyraıyp,
Qoıdan jýas qop-qońyr qazaǵym-aı...
Jumash KENEBAI
