Qazaqstan prezıdenti Nursultan Nazarbaev, Belarýs prezıdenti Aleksandr Lýkashenko telefon arqyly Reseı prezıdenti Vladımır Pýtınmen sóılesip, Ýkraınadaǵy jaǵdaıdy talqylady. Bul týraly keshe túnde Kremldiń baspasóz qyzmeti habarlady. "Ýkraınadaǵy daǵdarys, ásirese eldiń shyǵys aımaqtary men Qyrymdaǵy orystildi turǵyndardyń zańdy múddeleri men ómirlerine qaýip tóndiretin jaǵdaı talqylandy. Qoǵamdyq-saıası ahýaldyń shıelenisýi Eýrazıa joǵarǵy ekonomıkalyq keńesine múshe elderdiń onyń ekonomıkalyq jáne gýmanıtarlyq saldarlaryna alańdaýshylyǵyn týǵyzady. Memleket basshylary tyǵyz baılanysta bolýǵa ýaǵdalasty" delingen Kreml taratqan habarlamada. Keshe Qazaqstannyń syrtqy ister mınıstrligi Ýkraınadaǵy jaǵdaıdy kelissózder arqyly sheshýge shaqyratyn málimdeme jasaǵan. Qazaqstan "shıelenistiń odan ári órbýi aımaqtyq, sondaı-aq jahandyq aýqymdaǵy kútpegen nátıjelerge alyp kelýi múmkin" ekenin aıtyp, barlyq taraptardy jaǵdaıdy retteýde kúsh qoldanýdan bas tartýǵa jáne qalyptasqan máseleni kelissózder arqyly sheshý maqsatynda barynsha saıası kúsh-jiger tanytýǵa shaqyrǵan. "Bul sheshim halyqaralyq quqyqtyń fýndamentaldy qaǵıdattaryna negizdelýi tıis" delingen málimdemede. 1 naýryz kúni Reseıdiń Federasıı keńesi biraýyzdan Reseı qarýly kúshterin Ýkraına terıtorıasynda paıdalaný týraly Pýtın usynysyn qoldady. Reseı prezıdenti Vladımır Pýtın Federasıa keńesinen "jaǵdaı turaqtanǵansha Ýkraına terıtorıasynda ásker paıdalanýǵa" ruqsat suraǵan edi. Reseı parlamentiniń joǵarǵy palatasy - Federasıa keńesi spıkeri Valentına Matvıenkonyń aıtýynsha, qaýly qabyldanǵan mezetten bastap kúshine engen. Qazaqstan, Belarýs jáne Reseı - Keden Odaǵyna, Eýrazıa joǵarǵy ekonomıkalyq keńesine múshe elder.