Qazaq estradasynda ózindik ereksheligi bar dýetterdiń biri «Sham-shyraqtyń»  ánshileri Asylbek Ysqaqov pen Ulmeken Begalıevamen suhbattasýymyzdyń sáti  túsken edi.  Nazarlaryńyzda eki  ánshiniń syrshyl áńgimesin  usynamyz...

-Sálemetsizder me?  Talǵamy bıik, taǵymy mol  óner aıdynyna qalaı keldińizder?

Ulmeken Begalıeva: -Bala kezimizden mektepterde, toı–tomalaqtarda án aıtyp, ónerge jaqyn  bolyp óstik. Osy talabymyz mýzyka ortalyqtaryna túsýge jetelese de, biraq jolymyz bolmaı túse almaı qaldyq. Keıin  Almatyǵa jol  túsip, Asylbekpen tanysyp, dýet bolyp án aıtý týraly sheshimge keldik. Sóıtip, ózderińizge belgili «Sham-shyraq» tobymn quryp,  óner aıdynyna boıladyq. Sol  qadamymyz  qutty bolyp,  kúni búginge deıin  óner sahnasynda  án  aıtyp kelemiz.

Asylbek Ysqaqov: -«Jigittiń jaqsylyǵy - naǵashydan» degendeı, meniń naǵashy jurtym  ónerge jaqyn  adamdar. Naǵashy atam da óte myqty dombyrashy jan  edi. Sol kisi meni qasynan tastamaı ilestirip júrip,ónerge baýlydy,án aıtqyzdy.  Ónerge jaqyn bop erjetýime naǵashy atamnyń yqpaly kóp boldy dep  oılaımyn. Keıinnen  alǵa  arman  jetelep, «Óner ordasy» dep Almatyǵa keldim. Biraz ýaqyt bos júrdim,    meıramhanada da án aıttym. Al, meniń shoý bızneske kelýim qyzyq boldy. Bireýge ótirik, bireýge shyn:  men túsimde «MýzArt» tobyn kórdim. Úsh kún qatarynan Sáken Maıǵazın: «Baýyrym, Asylbek, ne istep  júrsiń, sahnaǵa shyqpaısyń ba?»,-dedi (kúldi). Túsim túrtki boldy ma,  álde  ýaqyty  keldi me sodan bastap án jazýdy bastadym. Jurt birneshe án jazsa, men bir-aq án jazyp, ánge klıp túsirdim.  Jeke ánshi bolyp án aıtyp júrdim.

«Sham-shyraq» tobyn qalaı qurdyńyzdar?

Asylbek Ysqaqov: -2012 jyly quryldyq. Kezekti konsertterdiń birinde ádettegideı jalǵyz  emes,  bir ánshi qyzben shyǵýym kerek boldy. Tapsyrma solaı boldy. Sóıtsem, seriktesim osy Ulmeken eken. Eki kún arpalysyp júrip án jazdyq. Konsertke shyqtyq. Halyq jaqsy qabyldaǵan soń, ekeýmizde  birlesip  jumys isteý  týraly  ıdeıa týyndady.  Jumys isteýge kelistik. Biraq,  bas kezinde  Ulmekenge asa sene almaı júrdim. Dýet quraryn quryp alyp, jalǵastyǵy  týraly oılanyp júrdim. Kúnde kezdesip, áńgimelesip turdyq. Jumysymyzdyń barysynda Ulmekenniń ózin ónerge arnaǵan talantty qyz ekenine kózimdi jetkizdim. Sodan bastap dýet bop án aıtyp kelemiz. Inshalla, alǵan baǵytymyz jaman emes, bul kúngi jumystarymyzǵa kóńilim tolady.

 -Án óneri betaldy adam at basyn bura bermeıtin óner ǵoı. Osy ónerge sizderdi jetelegen kimder edi? Eliktegen ánshilerińiz bar ma nemese  boldy  ma?

Asylbek Ysqaqov:-Men eshkimge eliktep kelgen joqpyn. «Dýet qurǵan soń, sender Toqtar men Beıbittiń, bolmasa Janbolat pen Jazıranyń jolyn qýyp júrsińder» degendi bireýler aıtady. Joq!  Men qazaq  estradasy nemese sheteldik bolsyn eshkimge eliktemeımin.

Ulmeken Begalıeva: -Árkimniń óz armany bar ǵoı. Múmkin, mektep kezinde, kishkene kúnde ónerde júrgen ápkelerimizge eliktegen shyǵarmyn. Biraq, ózimiz jeke dýet bop shyǵa bastaǵannan keıin, elikteý degen nárse azaıtyp, erekshelený  jaǵy oılaýymyz arta tústi. «Basqa toptardan, basqa dýetterden bólekshe bolsaq» degen oıymyz bar. Sondyqtan, bizdiń dýetti eshqandaı topqa, dýetke eliktemeı, óz baǵytymen aıqyn  dýet dep aıtýǵa bolady.

 -Án qorjyndaryńyz estradalyq ánderge toly. Bolashaqta halyq ánderine oıysý oılaryńyz bar ma?

Asylbek Ysqaqov: -Bul óte jaqsy suraq eken. Aldaǵy ýaqytta halyq ánderin oryndaımyz dep  Sizge ýáde bere alam. Óıtkeni halyq áni óte kerek.

Bul kúndegi ózderińizge degen halyqtyń yqylasy qalaı?

Ulmeken Begalıeva: -Kez-kelgen isti bastaǵan soń, jaqsy jaǵyn kórmeseń, ári qaraı shabyttanyp jumys jasaý múmkin emes dep oılaımyn. Biz sahnada bolsyn, toıda bolsyn án shyrqaǵan kezde halyqtyń yqylasynyń erekshe ekendigin sezinemiz. Eger halyq tyńdamaı, ánimizdiń unamaǵanyn sezinsek, onda bul kúnde dýet bop án aıtyp júrmes edik. Sondyqtan, halyqtyń jaqsy qoldaýynyń arqasynda shabyttanyp, qulshynyp jumys istep kele jatqan jaıymyz bar.

 Dýetterińizdiń atyn «Sham-shyraq» dep nege qoıdyńyzdar? Aty da bir ózgeshelik tanytyp turǵandaı...

Ulmeken Begalıeva: - Asylbek aıtqandaı, bulaı dep ataýymyz alǵashqy konsertten keıin «endi birigip jumys jasaımyz ba álde jasamaımyz ba?» degen oı túrtki boldy. Birigip jumys jasaýǵa kelisken soń , árıne, dýetke at qoıý kerek. Neshe túrli ataýlar oıǵa keldi. «Talpynys», «Aı-juldyz» degen ıdeıalar boldy. Sońynda osy «Sham-shyraq» degen eki uǵymdy bildiretin ataýǵa turaqtadyq. Sham jáne Shyraq. Dýetke de saı keledi dep oılaımyn. Sham men Shyraq qarańǵy jerge jaryq pen jylý beretin dúnıe ǵoı. Sol sıaqty biz de halyqqa ánimizben jaryq, jylý syılaıtyn dýet bolsaq degen arman-nıetpen «Sham-shyraq» dep qoıdyq.

 -Qazir  óz eńbekterińiz baǵasyn bere  alatyn kezdesizder. Allaǵa shúkir! Al, endi osy dýetti qurǵan kezdegi oılaǵan armandaryńyzǵa jettik dep oılaısyzdar ma? Kózdegen maqsattaryńyz...

Asylbek Ysqaqov: - Biz armanymyzǵa jettik dep aıta almaımyz. Biraq, ózimizdi sál de bolsa bir baspaldaqtan attadyq dep sezinemiz. Áli de kóp jumys isteý kerek. Hıt bolsaq dep armandamaımyz, ózimizdiń ornymyzdy Qazaq estradasynan taýyp alsaq, sol da jetkilikti. Eń aldy da emes, eń arty da emes halyq kóńilindegi qalaýly toptardyń bir bolsaq, Allaǵa shúkir deımiz.

- Qazirgi kúnde ánshilerdiń kóbi halyqtyń án ónerin shoý-bızneske aınaldyryp jiberdi, sizder buǵan qalaı qaraısyzdar?

Ulmeken Begalıeva: -Endi shoý-bızneske aınaldyryp jiberdi degende, «bul bir aqsha tabýdyń joly ma?» dep oılaımyn. Óner adamdaryna eshqandaı jaǵdaı jasalmaǵan. Olarda esh jerde turaqty jumys orny joq. Olar án jazdyrady, sony toıda aıtyp nápaqasyn tabady. Sondyqtan, «shoý-bızneske aınaldyryp jiberdi» deý bir jaǵynan durys emes dep oılaımyn. Qazaqtyń qaı kezde de toısyz kúni joq, al ánshiler osy toıda án aıtyp, óz eńbekterimen aqsha tapqandarynda turǵan eshteńe joq. Ár bir ánshi bir-eki án jazyp alyp, tek toıda án aıtyp júre bermeı, sahnaǵa da shyǵyp, óziniń shyǵarmashylyq jolyn qalyptastyrýy kerek.

- Altyn ýaqyttaryńyzdy bólip, áńgimeleskenderińizge kóp rahmet. Sizderge shyǵarmashylyq tabys tileımiz. Halyqqa  degen bir aýyz tilekterińiz...

Ulmeken Begalıeva: - Halqymyz aman, zamanymyz tynysh bolsyn! Sábılerimiz jylamasyn, úlkenderimiz qaıǵyrmasyn!

Asylbek Ysqaqov: - Qazaqstandaǵy barlyq halyq kúlip-oınap júre bersin, júzinen kúlki ketpesin!

Áńgimelerińizge rahmet!

Suhbattasqan Qýanáli Almasbekuly