Galymzhan Orazymbettiń jazbasynan keıin Qanat Islamnyń "Syrlasýyn" kórip shyqtym. Qanatty "Astanada" "syrlasty" dep atyn dabyraıtpasań, sonshalyqty jańa eshteńe aıtqan joq. Jýrnalısiń suraqtary sol baıaǵy Qanatty ultshyldyqtyń sımvoly retinde sanap, qazaqtardy bárinen qıynshylyq kóretin baıqus halyq dep esepteıtin taptaýryn joldan asyp kete almapty, ókinishke qaraı.
Jo, bu jerde Qanatty ultshyl emes degim kelip turǵan joq. Álbette, ol - qazaq elin jan-júregimen súıetin batyr ul. Qytaıdyń salǵan ınvestısıasy men artqan úmitine qaramastan, ata jurtym dep elge oraldy. (Qytaıda boksshylar, ásirese chempıondar qatty qurmetteletinin qytaı grýppalasymnan bildim jaqynda. Kórshi elde Zoý Shımıng ájepteýir juldyz kórinedi). Munyń ózi eren erlik. Ekiniń biri sonshalyqty ataq-dańqty tastap, ata jurtyna orala bermeıdi. (Kerisinshe, sol ataqty izdep basqa el azamattyǵyn alady. Mysaly, Podobedova, Hrýstaleva dep tizimdi jalǵastyrýǵa bolady). Iaǵnı, osy turǵydan alǵanda Qanat Islam naǵyz patrıot! Bul - anyq.
Qanat Islamnyń Olımpıadaǵa Qazaqstan atynan qatyspaýy da biraz talqylandy ǵoı. Oǵan da jıi-jıi oralýdyń qajeti shamaly. Qanattyń Londonǵa bara almaýynyń negizgi sebebi - Halyqaralyq Olımpıada Komıtetiniń 41 erejesi. Atalǵan erejege sáıkes, eki eldiń azamattyǵy bar nemese jańa azamattyq alǵan sportshy burynǵy eliniń atynan halyqaralyq deńgeıi bar jarysqa qatysqanynan keıin úsh jyl ótpeıinshe, jańa eliniń atynan Olımpıadalyq básekede baq synaı almaıdy. Bul ýaqyt lımıti eki eldiń arasyndaǵy kelisimmen nemese HOK-tyń basshysy sheshimimen azaıtylýy ne múldem alynyp tastalýy múmkin. Qanat Islam men bizdiń boks federasıasy arasyndaǵy qarym-qatynastyń qalaı bolǵanynan habarsyzbyn. Maǵan belgilisi - Qanattyń Qazaqstan atynan shyǵýyna qarsy bolǵan Qytaı.
Bizdiń keı jýrnalıserde qazaqty Qazaqstandaǵy basqa ulttan bólip qarap, qazaqty bárinen japa shegip otyrǵan ult retinde kórsetý úrdisi qatty baıqalady. Ultshyldarymyz da "qazaqty qyryp bitti" dep qur aıqaı berýden basqa eshteńe bilmeıdi. Ózderiniń ásirelikterin kúshteıtý úshin álgi toptyń ókilderi Qanatty tý qylyp ustap alǵan. Olardyń bul áreketi Qanatqa da, qazaqqa da, Qazaqstanǵa da paıda bermeıdi. ("Syrlasýdaǵy" suhbatynda Qazaqstandaǵy basqa ult týraly jaqsy aıtqan Qanat).
Máseleniń bári "Syrlasýdan" bastaldy ǵoı. Buǵan deıin de Áıgerim Seıfollany myqty jýrnalıs dep eseptegenmin, áli de esepteı beremin. Biraq ol kisige sportshylardan suhbat alǵanda, ásirese Qanat Islam sekildi tulǵamen syrlasqanda jýrnalısıka salasyna jańadan qosylǵan tájirıbesizdiń suraqtaryn qoımaýdy ótiner edim. Tipti, sporttan habary joq bolǵannyń ózinde sporttan habary bar jýrnalıske suraq daıyndatyp alýǵa bolatyn edi. (Mysaly, Tabigatqa suraq daıyndap bershi dese, túbin túsiretin suraq ázirlep beretin edi).
"Syrlasýmen" toqtamaı, "Jastar únindegi" suhbatyn da oqyp shyqtym. Alaıda ózim bilgim keletin suraqtyń jaýabyn ala alǵanym joq. Mysaly, maǵan Amerıkada kásipqoı bokstyń qalaı ekeni, qalaı damyǵany, elimizde kásipqoı boksty qalaı damytýǵa bolatyny týraly pikirler qyzyq edi. Eki-úsh aı buryn Qanat Islam El Heımonmen kelisimshartqa otyrǵan-tuǵyn. Osy kelisimniń bolashaǵy qandaı bolmaq, aldaǵy ýaqytta kimmen judyryqtasý josparda bar, álem chempıony ataǵyna talasýǵa bıyl múmkindik bar ma degen sekildi suraqtarǵa jaýap alǵym keledi. Ókinishke qaraı, mundaı suraqtar joǵaryda atalǵan suhbatta qoıylǵan joq. Kerisinshe, negizgi aksent "ultshyl Qanatqa" qoıyldy. (Aq Jaıyqqa shyqqan suhbaty áldeqaıda jańalyqqa toly, aıtpaqshy).
Qanat Islam - ultyn súıetin azamat. Halqynyń janashyry. Sondaı-aq, ol - áleýetti boksshy. Qanatty "qazaqtyń kórgen qıynshylyǵy" retinde kórsete berýdi qoıý kerek. Kerisinshe, onyń boksshylyq qyryna tereńirek mán berý kerek dep oılaımyn. Qanat Islam kim? Ol - qazaq eliniń batyry. Týra Serik Sápıev, Gennadıı Golovkın, Ermahan Ybraımov, Bekzat Sattarhanov, Vasılıı Jırv, Baqtıar Artaev, Ilá Ilın sekildi qazaq eliniń batyr uly. Endeshe, Qanatty "japa kórgen qazaqtyń sımvoly" retinde kórsetýdi qoıý kerek.
P.S. Aıtpaqshy, Qanat Islamnyń sózderinen sıtata keltiretin bolsańyz, "Syrlasýda" ol bylaı dep aıtty:
"-Men álemdik deńgeıde eshkim emespin qazir. Kimmin? Amerıka tanymaıdy meni. Telearnalardan endi usynystar túsip jatyr... Adam jetistikke jetý úshin ózinen joǵaryǵa qaraý kerek..." Jáı, bizdiń jaǵdaıymyz basqaǵa qaraǵanda táýir ǵoı deıtinder úshin.
Abaıýs Otarıýstyń "Feısbýktegi" paraqshasynan alyndy
