QR Sporttyq jekpe-jek jáne kúsh qoldanylatyn sport túrleri konfederasıasynyń «confederation.kz» saıtynda jarıa bolǵan kerek keńesti oqyrman nazaryna usynamyz. Sonymen, jaqsy tynyǵý úshin qajet 15 keńes qandaı?
1. Uıyqtar aldynda kitap oqymańyz, teledıdar kórmeńiz
Eger uıyqtar aldynda teledıdar kórý nemese kitap oqý tez uıyqtaýǵa kómektesedi dep oılasańyz, qatelesesiz. Kitap oqyp nemese teledıdar kórgennen keıin sizdiń mıyńyz birneshe saǵat boıy demalmaıdy. Sol sebepti, tátti uıqyǵa ketý úshin de taǵy biraz ýaqyt joǵaltasyz. Ásirese, túnimen uıyqtaı almaıtyn dertke ushyraǵan jandar úshin uıyqtar aldynda teledıdar kórgen qaýipti.
2. Uıqyńyz kelgende ǵana jastyqqa bas qoıyńyz
Jaqsy uıyqtap, densaýlyǵyńyzdy bir qalypta saqtaý úshin aǵzańyz sharshap, shynymen uıyqtaǵyńyz kelgende ǵana demalyńyz. Eshqashan da, «uıyqtaıtyn ýaqyt boldy» dep jatyp qalmańyz. Eger siz saǵat 9-da jatyp, túngi 12-ge deıin uıyqtamaıtyn bolsańyz, bul densaýlyǵyńyz zıanyn tıgizedi. Sonymen qatar, uıqy rejımi buzylǵan soń, biraz ýaqytyńyzdy joǵaltasyz.
3. Uıyqtar aldynda belsendi qımyldaýdan bas tartyńyz
Mamandar keshtiń ekinshi bóliginde belsendi qımyldaýdan bas tartý kerektigin aıtady. Erteńgi kúnniń josparlary men túrli máselelerdi uıyqtardan bir jarym saǵat buryn talqylaǵanyńyz jón. Bul ýaqyt aǵzanyń tynyǵýy úshin jetkilikti. Osydan soń, jaqsy uıyqtaıtynyńyzǵa tolyq kepildik bar.
4. Tynys alý jattyǵýlaryn oryndańyz
Kóptegen medısına mamandarynyń pikirinshe, tynys alý jattyǵýlaryn oryndaý jaqsy uıyqtaýdyń kepili. Mundaı jattyǵýlar tátti uıqyǵa daıyndyq esebinde oryndalady. Sonymen qatar, sharshaǵanyńyzdy basyp, jaqsy tynyǵýǵa áserin tıgizedi. Mamandar pikirine sensek, jatar aldynda kerilip-sozylý densaýlyqqa óte paıdaly.
5. Erkin demalatyn istermen shuǵyldanyńyz
Kereýet - jaqsy uıyqtap, demalatyn oryn. Eger sizdiń 15-20 mınýt boıy uıqyńyz kelmese, basqa nársemen aınalysý kerek. Mysaly, ózińizdi tynyshtandyratyn ispen aınalyssańyz, bul jaqsy uıyqtaýǵa áserin tıgizedi.
6. Jatar aldynda uıyqtaıtyn bólmeniń aýasyn tazartyp alyńyz
Jaqsy demalý úshin taza aýa qajettigi bárine belgili jaıt. Sondyqtan, kún saıyn uıyqtaıtyn bólmeni jeldetip alý kerek. Onyń ústine, jatyn bólmedegi aýa taza bolǵan saıyn, salqynyraq bolatynyn umytpańyz. Al dál osyndaı jaǵdaı sizdiń tátti uıqyǵa tez berilýińizge kómektesedi.
7. Qoı sanaýdyń qajeti joq
Úlkender jaǵynyń uıqysy kelmese qoı nemese pil sanaıtyn ádeti bar. Al shyn máninde munyń uıqyǵa esh áseri joq. Eger durystap baǵamdasańyz, sanaýǵa kirisken soń, mı kúndizgi ýaqyttaǵy sekildi, belsendi jumys isteıdi. Bul sizdiń tezirek uıyqtaýyńyzǵa áser etpeıdi. Sondyqtan, jatar aldynda eshteńe sanamaǵan jón.
8. Keshkisin sportpen shuǵyldanbańyz
Uıyqtar aldynda fızıkalyq turǵyda belsendi qımyldaý uıqyǵa keri áser etetinin psıhologtar baıaǵyda dáleldedi. Aǵza túgeldeı belsendi jumysqa kirisken soń, uıqynyń aýyly alystap ketedi. Eger siz keshkisin júgirip kelýdi ádetke aınaldyrsańyz, bul jattyǵýdy uıyqtardan 2-3 saǵat buryn oryndaǵan durys. Aǵza demalyp, uıyqtar aldynda qandaı da bir qıyndyq bolmaý úshin bul ýaqyt jetkilikti.
9. Uıyqtar aldynda kóp tamaq jemeńiz
Uıyqtar aldynda eshqashan kóp tamaq jeýge bolmaıdy. Meıilinshe, jatardan 2-3 saǵat buryn tamaqtanǵan jón. Osy ýaqyt aralyǵynda asqazandaǵy as qorytylyp, aǵza demalýǵa daıyn bolady. Eger qarnyńyzdy toıdyryp alyp, uıyqtaýǵa bet alsańyz, aǵza bir túnniń ishinde tolyqqandy qalpyna kelmeıdi de, kelesi kúni ózińizdi jaısyz sezinesiz.
10. Kúndiz qalǵymańyz
Kúndizgi ýaqytta qalǵyp ketý árkimde bar ádet. Alaıda, meıilinshe bul ádetten qutylýǵa tyrysyńyz. Sebebi, kúndiz qalǵyǵan túnde jaqsy uıyqtaýǵa keri áser etedi. Aǵza mıǵa demalyp, uıyqtaıtyn ýaqyt bolǵany jóninde sıgnal beredi. Al bul bar bolǵany qalǵý bolǵan soń, tez úzilip qalady. Sol sebepti, keshkisin uıyqtaý siz úshin úlken qıyndyq týdyrmaq.
11. Ózińizdi qınap uıyqtaýǵa tyryspańyz
Keıde tún ortasynda oıanyp ketip, qaıtadan uıyqtaı almaıtyn kezder bolady. Mundaı ýaqytta ózińizdi qınap uıyqtaýǵa tyryspańyz. Mamandar mundaı kezde tósekten turyp, basqa tynyshtandyratyn sharýamen aınalysý durystyǵyn aıtady. Tek sharshap, uıqyńyz kelgende ǵana qaıtadan jastyqqa bas qoıyńyz.
12. Jatar aldynda alkogóldi ónim qabyldamańyz jáne shylym shekpeńiz
Shylym jáne alkogól sizdiń densaýlyǵyńyzǵa ǵana emes, jaqsy uıyqtaýyńyzǵa da keri áser etedi. Sondaı-aq, jatar aldynda kofe ishpegenińiz jón. Bul zattardyń barlyǵy mıdyń belsendi jumys isteýine ákeledi. Sondyqtan, uıyqtap ketý qıyndyq týdyrady. Kópshiliktiń pikirinshe, alkogól ónimderin qabyldaǵan soń, uıyqtap ketý ońaı sekildi kórinedi. Alaıda, bul pikir durys emes. Kerisinshe, dál osy qalypta uıyqtaý sizdiń densaýlyǵyńyzǵa keri áserin tıgizedi.
13. Qorqynyshty tústerden qoryqpańyz
Keıde tún ishinde qorqynyshty tústen oıanyp ketetin kezder bárimizdiń ómirimizde kezdesedi. Bul jaǵdaıda, tústi jaqsyǵa joryp jatyńyz.
14. Jan dúnıeńizdi tynyshtandyratyn áýender tyńdańyz
Eger tezirek uıqyńyz kelgenin qalasańyz, mýzyka tyńdaǵan durys. Bul jerde áńgime asyqpaı oryndalatyn áýender týrasynda. Ásirese, uıyqtar aldynda klasıkalyq áýender tyńdaýǵa keńes beremiz. Bul aǵzanyń demalýy men sizdiń jaqsy uıyqtaýyńyzǵa kóp kómektesedi. Eger siz mundaı áýenderdi aýtotrenıngpen baılanystyrsańyz, áseri jaqsyraq bolady.
15. Bir shaı qasyq baldan bas tartpańyz
Baldyń adam aǵzasyn bosańsytyp, uıqy shaqyratyn qural retinde qoldanylatyny baǵzy zamannan beri belgili. Sol sebepti, uıyqtardan jarty saǵat buryn bir stakan bal qosylǵan jyly sý ishken jón. Mundaı sýsyn jaqsy uıyqtaýǵa ǵana emes, júıke júıesin qataıtýǵa kómektesedi.
