استانادا پاتەرىن جالعا بەرۋشى ەكى بالاسى بار انانى ۋاقىتشا تىركەي الماعانى ءۇشىن پاتەردەن شىعارىپ جاتىر، - دەپ حابارلايدى "كرىشا".

"جالعا بەرۋشىلەر مەملەكەتتىك باعدارلاما بويىنشا پاتەر كەزەگىندە تۇرعانىن ايتىپ، پاتەردى ءوز اتتارىنا اۋدارا المايتىنىن جانە ۋاقىتشا تىركەۋگە قويا المايتىنىن ايتتى. ول بىزگە 24 قاڭتارعا دەيىن ۋاقىت بەردى، الايدا ءبىز ول ۋاقىتقا دەيىن ىڭعايلى پاتەر تابا المايتىن سياقتىمىز"، - دەدى بوتاگوز سۇلتانوۆا. 

وتباسىنداعى ۇلكەنى - التى جاستاعى ءادىل - ونكولوگيالىق اۋرۋعا شالدىققان. ونىڭ جاقىندا ينفەكسيا جۇقتىرىپ، ءبىر كوزى كورمەي قالعان. 

"ءادىل 2013 جىلى اۋىرىپ باستادى. ونىڭ شەت ەلدەگى ەمىنە ءبىز كولىگىمىز بەن مەنىڭ اتىما تىركەلگەن جاتاقحاناداعى بولمەمىزدى ساتتىق. ءقازىر كۇيەۋىم مەن بالام "مۇگەدەك بالانى تاربيەلەپ وتىرعان وتباسىلارعا ارنالعان باعدارلاما" بويىنشا كەزەكتە تۇر. وسىعان جانە بالامنىڭ اۋرۋىنا بايلانىستى بىزگە ءبىر جەردە تۇراقتى تىركەۋدە بولۋ قاجەت"، - دەپ ءتۇسىندىردى بوتاگوز. 

باسىلىمنىڭ مالىمەتىنشە، استانالىق تۇرعىن جۇمىس ىستەي المايدى، سەبەبى بالالارىنا قاراۋى ءتيىس: ءادىلدىڭ مۇمكىندىگى شەكتەۋلى جاندارعا بەرىلەتىن زەينەتاقى مەن جاردەماقىسى 52 مىڭ تەڭگە، سونىمەن قاتار پاتەردىڭ اقشاسى مەن بەس جاستاعى ءاديننىڭ بالاباقشاسىنا اقشا تولەۋ قاجەت. ۇيدە تەك كۇيەۋى عانا جۇمىس ىستەيدى.

وسى ورايدا بوتاگوز استانالىقتاردان كومەك سۇرادى. Facebook جەلىسىندە ونىڭ ۇندەۋىن لاۋرا تۇسىپبەكوۆا ءوز پاراقشاسىندا جاريالادى.

"بىزگە استانادان ءبىر بولمەلى پاتەر قاجەت، ۇزاق مەرزىمگە، مىندەتتى تۇردە ۋاقىتشا تىركەلۋ قاجەت، شامامەن 70 مىڭ تەڭگە + كوممۋنالدىق تولەمدەر. ەڭ باستىسى - قۇرعاق بولعانى. ادىلگە ىلعالدى جەردە تۇرۋعا بولمايدى. مۇمكىن بولسا، اگروقالاشىق، ۆوكزال اۋداندارىندا، گەرسەن كوشەسى كولىكتەر كوپ قاتىنايتىن جەردە بولسا دۇرىس بولار ەدى، سەبەبى كولىگىمىز جوق"، - دەلىنگەن جازبادا.