قازىرگى كۇنى پرەزيدەنتتىڭ شەشىمىمەن قۇرىلعان مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەسى كۇن تارتىبىندە.
«بيلىك وكىلەتتىكتەرىن قايتا ءبولۋ جونىندەگى ۇسىنىستاردى ازىرلەۋ بارىسىندا جيناقتالعان وتاندىق جانە شەتەلدىك تاجىريبە، قولدانىستاعى زاڭنامانىڭ جانە قازاقستان رەسپۋبليكاسى كونستيتۋسياسىنىڭ نورمالارىن قولدانۋ پراكتيكاسى زەردەلەنىپ، تالداۋ جاسالادى. جۇمىس توبىنىڭ قىزمەتىنە زاڭگەر، عىلىمي-ساراپتامالىق قاۋىمداستىعى، سونداي-اق قالىڭ جۇرتشىلىق بەلسەنە تارتىلاتىن بولادى»، دەلىنگەن اقوردا تاراتقان حاباردا.
ءيا، سوڭعى كەزدەرى بيلىك ماسەلەسى قاتتى تالقىلانىپ جاتىر. قايتا ءبولۋ ماسەلەسى دەگەنىڭىزدىڭ ءوزى الداعى ۋاقىتتا كوپتەگەن ءاۋىس-تۇيىس پەن قىسقارتۋ-تاراتۋدىڭ، تاعايىنداۋ مەن سايلاۋدىڭ حابارشىسى بولسا كەرەك.
قوعامدا پارلامەنت تاراتىلۋى مۇمكىن ەكەنى ايتىلا باستادى. پارلامەنت تاراتىلسا ۇكىمەت تە قايتا جاساقتالادى. پارلامەنتتىڭ قۇزىرەتى ارتۋى دا مۇمكىن. ءبىز بولجامايمىز، ساياساتتىڭ سامالى سولاي ەسەدى.
حوش، وسىناۋ وكىلەتتىلىكتىڭ قايتا ءبولىنۋ ماسەلەسى قىلاڭ بەرسە، ەلدىڭ دە ەرتەڭ ەل تىزگىنىن ۇستار ازاماتتار كىم دەپ ەلەڭدەرى انىق. جوعارعى بيلىكتە قانداي ورىن اۋىستىرۋلار بولاتىنىن قويا تۇرىپ، بۇل ماقالانى وبلىستارعا ارنايىق. قازاقستاندا پارلامەنتتەگى دەپۋتاتتار سياقتى وبلىس اكىمدەرى دە شەتىنەن زەينەت جاسىنا تولا باستاعان. ەرتەڭ بيلىك اۋىسسا وزبەكستانداعى اكىمدى سايلاۋ رەفورماسىن ەنگىزە قويارىمىز نەعايبىل. دەسە دە، بيلىك بۋىنى جاسارارى انىق.
سونىمەن، وبلىس اكىمدەرىنىڭ ءبىرىنشى ورىنباسارلارىن شولىپ شىعايىق، كىم مىقتى؟ كىمنىڭ باعى جانايىن دەپ تۇر؟ ماقالانىڭ ماقساتى مىنەپ-سىناۋ ەمەس. ادەتتە اكىمدەردىڭ تاساسىندا قالىپ، كوپ ايتىلا بەرمەيتىن ازاماتتاردى القاۋ دەپ ءتۇسىنىڭىز، وقىرمان!
تۇرلاشوۆ ءلاززات ماحات ۇلى – الماتى وبلىسى
1960 جىلى تۋعان. الماتى تەمىر جول ترانسپورتى ينجەنەرلەرى ينستيتۋتىن قۇرىلىس ينجەنەرى ماماندىعى بويىنشا بىتىرگەن.
ەڭبەك جولىن قاسكەلەڭ اۋدانى «جەتىسۋ» كەڭشارىندا قۇرىلىس سەحىنىڭ جۇمىسشىسى بولىپ باستاعان.
ءار جىلداردا بريگادير، شەبەر، باس پروراب، قۇرىلىس ۋچاسكەسىنىڭ باستىعى، كووپەراتيۆ ءتوراعاسى، «الماتىاگروحيم» اق ءبولىم باستىعى، تالعار اۋدانى «كراسنوە پولە»، «گورنىي سادوۆود»، «گۇلدالا» اۋىلدىق وكرۋگتەرىنىڭ اكىمى، قاراساي اۋدانى اكىمىنىڭ ورىنباسارى، جامبىل، قاراساي اۋداندارىنىڭ اكىمى قىزمەتتەرىن اتقارعان. 2011-2016 جىلدارى قازاقستان رەسپۋبليكاسى پارلامەنتى سەناتىنىڭ دەپۋتاتى بولدى.
2016 جىلدىڭ ءساۋىر ايىنان – الماتى وبلىسى اكىمىنىڭ ءبىرىنشى ورىنباسارى. ول بۇل قىزمەتكە كەلە سالا، الماتى وبلىسىنىڭ ىلە، ەڭبەكشىقازاق جانە كوكسۋ اۋداندارىنا «نۇرلى جول» باعدارلاماسى بويىنشا سالىنعان ءۇش جاڭا مەكتەپ اشىلدى. مەكتەپتەردىڭ اشىلۋ سالتاناتىندا بولعان ول سونداي-اق، جىل اياعىنا دەيىن تاعى 9 مەكتەپ اشىلاتىنىن ايتقان. اشىلدى دا.
تۇرلاشيەۆ ەلدە ەكونوميكالىق داعدارىس ورىن العان كەزدە دە سەناتور رەتىندە حالىقتى سابىرعا شاقىرىپ، داعدارىستان شىعۋ ءۇشىن مەملەكەتتىك وزىندىك سەنارييى بار ەكەنىن بايان ەتكەن ەدى. ول سپورتتىڭ دا بەلگىلى دەڭگەيدەگى جانكۇيەرى.
ول، «ءبىزدىڭ ەلدىڭ جىگىتتەرى – جىگىتتەردىڭ تورەسى دەپ جىرلايتىن ەسەنقۇل اقىن ومىردەن وزعاندا بىلاي دەپ قابىرعاسى قايىسقان: ««تازقارا قۇستىڭ تاعدىرى» اتتى كىتابى جارىق كورگەندە «تەڭدەسسىز دۇنيە. بۇل جيناققا پارا-پار كەلەتىن جىر جيناعى جوق» دەگەن ەدىم. ءبىر عاسىردا ءبىرتۋار عاجاپ اقىن ەسەنقۇل باۋىرىمىزدىڭ ناعىز تۇلپارداي كوسىلەتىن، قىرانداي سامعايتىن كەزدە ءۇزىلىپ كەتكەنى وكىنىشتى-اق». بۇدان ءلاززات ماحات ۇلىنىڭ تەك اكىمشىلىك جۇمىستارمەن عانا شۇعىلدانباي، ەل ىشىمەن، ونەر كەنىشىمەن ەتەنە تانىس ەكەنىن دە اڭعاراسىز. ەكى ۇل مەن ەكى قىزعا اكە بولعان ءلاززات ماحات ۇلىنىڭ مايقى بي ەسىمىن ۇلىنا قويۋىنىڭ ءوزى دانالىعىنان حابار بەرسەك كەرەك.
ءلاززات ماحات ۇلى ەڭ اۋەلى الماتى وبلىسىنىڭ تۋماسى. ول، اۋدان اكىمى قىزمەتىنەن سەناتورلىققا دەيىن كوتەرىلگەن ساناۋلى شەندىلەردىڭ ءبىرى. الماتى وبلىسىن جاقسى بىلەتىن، بىرنەشە اۋداندا اكىم قىزمەتىن اتقارعان ازامات.
الماتى وبلىسى ورىنباسار ءسوزىنىڭ شىنىمەن ورىن باستىرار قىزمەت ەكەنىن دالەلدەگەن وبلىس. بۇعان دەيىن اڭسار مۇساقانوۆتىڭ ورنىن 13 جىل ورىنباسار وبلىس اكىمى بولعان اماندىق باتتالوۆ باسقان ەدى. كىم بىلەر، ءبىر كۇنى ونىڭ دا ورىنباسارى ورنىن باسىپ جۇرەر.
***
بەكبولات سەرىكبەك ۇلى ورىنبەكوۆ – جامبىل وبلىسى
2013 جىلعى 28 جەلتوقسان جامبىل وبلىسى اكىمىنىڭ وكىمىمەن جامبىل وبلىسى اكىمىنىڭ ءبىرىنشى ورىنباسارى بولىپ بەكبولات سەرىكبەك ۇلى ورىنبەكوۆ تاعايىندالدى.
بەكبولات سەرىكبەك ۇلى 1957 جىلى تۋعان، ءبىلىمى جوعارى، الماتى ەنەرگەتيكالىق ينستيتۋتىن «ينجەنەر-ەلەكتريك» جانە قاراتاۋ قالاسىنداعى اگروتەحنيكالىق ينستيتۋتتى «ەكونوميست-بۋحگالتەر» ماماندىقتارى بويىنشا بىتىرگەن. ەڭبەك جولىن 1979 جىلى تالاس اۋدانىنداعى №110 قاراتاۋ كاسىپتىك تەحنيكالىق ۋچيليششەسىنىڭ وقىتۋشىسى بولىپ باستاعان. 1980-1992 جىلدارى تالاس اۋدانىنداعى №110 قاراتاۋ كاسىپتىك تەحنيكالىق ۋچيليششەسىنىڭ شەبەرى، وقۋ-وندىرىستىك جۇمىسى جونىندەگى ديرەكتورىنىڭ ورىنباسارى، 1992-1993 جىلدارى «قاراتاۋ» اسسوسياسياسىنىڭ باس ديرەكتورى، 1994-1997 جىلدارى «بىرلىك» شاعىن جەكەمەنشىك كاسىپورنىنىڭ ديرەكتورى، 1997-1998 جىلدارى «جامبىل اۆتودور» قازىنالىق كاسىپورنىنىڭ جەتەكشى مامانى، 1999-2003 جىلدارى تالاس اۋدانى قاراتاۋ قالاسى اكىمىنىڭ ورىنباسارى، 2003-2010 جىلدارى تالاس اۋدانى قاراتاۋ قالاسىنىڭ اكىمى، 2010 جىلدىڭ اقپانى مەن قاراشاسى ارالىعىندا سارىسۋ اۋدانىنىڭ اكىمى، 2010 جىلدىڭ قاراشا ايىنان باستاپ تاراز قالاسىنىڭ اكىمى قىزمەتتەرىن اتقارعان.
بەكبولات ورىنبەكوۆ بيىل الپىسقا تولادى. ول جاستاردىڭ اراسىنان ورىن الماسا دا وڭىردەگى مادەني-ادەبي شارالاردىڭ باسى-قاسىندا جۇرەدى. دەگەنمەن دە بەكبولات سەرىكبەكۇلىن كوپ كوزگە تۇسە بەرمەيتىن، دۇرىسى گازەت-جۋرنالعا كوپ شىعا بەرمەيتىن تۇلعالاردىڭ قاتارىنا جاتقىزۋعا بولادى. ول قوعامداعى رۋحانيات، ءدىني ساۋات تۋرالى كوپ ايتادى.
ول ەلباسى نازاربايەۆتىڭ ەڭبەك جولىن ۇلگى ەتكەن. ءبىر سۇحباتىندا «جامبىل جەرى ەجەلدەن ماڭگىلىك ەل يدەياسىنان تۋىنداپ وتىرعان ۇلتتىق بىرلىكتى سانادا ساقتاعان، تاتۋلىقتىڭ ورداسى بولعان ءوڭىر. وتانداستارىمىزدىڭ بەرەكە-بىرلىگىنىڭ تەمىر قازىعى بولاتىن يدەيانى ودان ارمەن دامىتۋعا مىندەتتىمىز. كوپۇلتتى قازاق دالاسىندا بەيبىتشىلىك پەن تۇراقتىلىقتىڭ سالتانات قۇرۋى – ەلباسىمىز نۇرسۇلتان ءابىش ۇلى نازاربايەۆتىڭ كورەگەن ساياساتى ارقاسىندا جۇزەگە اسۋدا»، - دەگەن ەدى.
***
دارحان امانگەلدى ۇلى ساتىبالدى – وڭتۇستىك قازاقستان وبلىسى
دارحان امانگەلدى ۇلى ءبىرىنشى ورىنباسارلار اراسىنداعى ۇقك-دە، پرەزيدەنت اكىمشىلىگىندە دە قىزمەت ەتكەن جالعىز تۇلعا.
وبلىس باسشىلىعىنا كەلگەنگە دەيىن 2 جىلدان استام قالا اكىمى بولىپ جۇمىس ىستەپ كەلگەن ساتىبالدى دارحان امانگەلدى ۇلى وڭتۇستىك قازاقستان وبلىسى اكىمىنىڭ ءبىرىنشى ورىنباسارى قىزمەتىنە 2015 جىلى تامىز ايىندا تاعايىندالدى. ال، شىمكەنتكە باسقالار سياقتى اۋدانداردان ءوسىپ بارعان جوق، استانادان كەلدى.
1974 جىلى تۋىلعان، ءبىلىمى جوعارى، ماماندىعى بويىنشا ەكونوميست-مەنەدجەر، زاڭگەر، ەكونوميكا عىلىمدارىنىڭ كانديداتى.
ەڭبەك جولىن 1991 جىلى كەلەس اۋدانى كەلەس كەڭشارى كوممۋنيزم بولىمشەسىنىڭ جۇمىسشىسى بولىپ باستاعان. 1996-1999 جىلدارى كەلەس اۋدانى «كەلەس» مەملەكەتتىك قازىنالىق كاسىپورنىنىڭ اعا ەكونوميستى، اقمولا قالاسى «كۋراكوۆ ي كو» ءجشس-نىڭ باس بۋحگالتەرى، 1999-2011 جىلدارى قازاقستان رەسپۋبليكاسى قارجى مينيسترلىگى قارجى باقىلاۋ كوميتەتى مەملەكەتتىك مەكەمەلەردەگى بيۋدجەتتىك راسىمدەرىنىڭ ورىندالۋىن باقىلاۋ باسقارماسىنىڭ مادەنيەت جانە سپورت ۇيىمدارىندا بيۋدجەتتىك قاراجاتتاردىڭ پايدالانىلۋىن باقىلاۋ ءبولىمىنىڭ جەتەكشى باقىلاۋشى-ريەۆيزورى، دەنساۋلىق ساقتاۋ جانە الەۋمەتتىك قورعاۋ ۇيىمدارىندا بيۋدجەتتىك قاراجاتتاردىڭ پايدالانىلۋىن باقىلاۋ ءبولىمىنىڭ باس مامانى-باس باقىلاۋشى-ريەۆيزورى، قازاقستان رەسپۋبليكاسى پرەزيدەنتىنىڭ ىستەر باسقارماسى قارجى-ەكونوميكالىق ءبولىمىنىڭ ەكونوميكالىق تالداۋ جانە باقىلاۋ سەكتورىنىڭ رەفەرەنتى، كونسۋلتانتى، باس ساراپشىسى، بيۋدجەتتىك جوسپارلاۋ جانە قارجىلىق باقىلاۋ ءبولىمىنىڭ مەملەكەتتىك ساتىپ الۋلاردى ۇيىمداستىرۋ سەكتورىنىڭ مەڭگەرۋشىسى، استانا قالاسىنىڭ تۇرعىن ءۇي دەپارتامەنتى «جىلۋ» مەملەكەتتىك كوممۋنالدىق كاسىپورنى ديرەكتورىنىڭ مىندەتىن اتقارۋشى، قازاقستان رەسپۋبليكاسى جوعارعى سوتى جانىنداعى سوت اكىمشىلىگى جونىندەگى كوميتەتىنىڭ سوت ورىنداۋشىسى، قازاقستان رەسپۋبليكاسى ءبىلىم جانە عىلىم مينيسترلىگى بيۋدجەتتىك، قارجى دەپارتامەنتتەرى ديرەكتورىنىڭ ورىنباسارى، عىلىم كوميتەتى ءتوراعاسىنىڭ ورىنباسارى، قازاقستان رەسپۋبليكاسى ۇلتتىق قاۋىپسىزدىك كوميتەتى دەپارتامەنتىنىڭ باستىعى، قازاقستان رەسپۋبليكاسى پرەمەر-مينيسترىنىڭ كەڭسەسى الەۋمەتتىك-ەكونوميكالىق ءبولىم مەڭگەرۋشىسىنىڭ ورىنباسارى، وڭتۇستىك قازاقستان وبلىسى شىمكەنت قالاسىنىڭ اكىمى قىزمەتتەرىن اتقارعان. 2015 جىلعى تامىزدان - وڭتۇستىك قازاقستان وبلىسى اكىمىنىڭ ءبىرىنشى ورىنباسارى.
ول حالىققا شىمكەنت اكىمى كەزىندە تانىلدى. شىمكەنتتى «ميلليونەر قالا» ەتۋشىلەردىڭ ءبىرى بولدى. ول اكىم بولىپ كەلگەن سوڭ شىمكەنت كەڭەيە تۇسكەن. كوشەلەردى دە جارقىراتتى. ول جاستاردى ىلعي عىلىم ءبىلىم الۋعا ۇندەپ ءجۇردى. ول، وبلىسقا تۇركيادا ەلشىلىك قىزمەت اتقارعان جانسەيىت تۇيمەبايەۆ اكىم بولىپ كەلگەن دە ورنىندا قالدى
***
ىسقاقوۆ قۋانىشبەك دوسمايىل ۇلى – قىزىلوردا وبلىسى
قىزىلوردا اكىمدىگى سايتىندا ءبىرىنشى ورىنباسار قىزمەتى ايتىلماعان. دەگەنمەن، قۋانىشبەك دوسمايىل ۇلى وبلىسقا اكىمنىڭ ءبىرىنشى ورىنباسارى رەتىندە 2011-2015 جىلدارى قىزمەت ەتتى.
قۋانىشبەك ىسقاقوۆ 1968 جىلى قىزىلوردا قالاسىندا دۇنيەگە كەلگەن. جاقايەۆ اتىنداعى قىزىلوردا اگروونەركاسىپ ءوندىرىسى ينجەنەرلەرى ينستيتۋتىن - ينجەنەر-قۇرىلىسشى، قىزىلوردا پوليتەحنيكالىق ينستيتۋتىن - بۋحگالتەر-ەكونوميست، قازاقستاندىق يننوۆاسيالىق جانە تەلەكوممۋنيكاسيالىق جۇيەلەر ۋنيۆەرسيتەتىن - زاڭگەر ماماندىقتارى بويىنشا بىتىرگەن.
1986-1988 جىلدارى اۋعانستاندا كەڭەس جاۋىنگەرلەرىنىڭ شەكتەۋلى قۇرامىندا اسكەري بورىشىن وتەگەن. كسرو جوعارعى كەڭەسى پرەزيديۋمىنىڭ قۇرمەت گراموتاسىمەن ماراپاتتالعان.
ەڭبەك جولىن 1985 جىلى قىزىلوردا جيھاز فابريكاسىندا 1ء-شى رازريادتى ستانوكشى رەتىندە باستاعان. 1993-2003 جىلدارى قىزىلوردا وبلىسى بويىنشا سالىق كوميتەتىندە مامان، ينسپەكتور، سەكتور مەڭگەرۋشىسى، ءتوراعا ورىنباسارى قىزمەتتەرىن اتقارعان. 2003-2011 جىلدارى - باتىس-قازاقستان وبلىسى بويىنشا سالىق كوميتەتى ءتوراعاسىنىڭ ورىنباسارى، ءتوراعاسى، قىزىلوردا وبلىسى بويىنشا سالىق دەپارتامەنتىنىڭ باستىعى، 2011-2015 جىلدارى - قىزىلوردا وبلىسى اكىمىنىڭ ءبىرىنشى ورىنباسارى، قىزىلوردا وبلىسىنىڭ قارجى باسقارماسىنىڭ باستىعى، ماڭعىستاۋ وبلىسى بويىنشا سالىق دەپارتامەنتىنىڭ باسشىسى، قىزىلوردا قالاسى بويىنشا مەملەكەتتىك كىرىستەر باسقارماسىنىڭ باسشىسى قىزمەتتەرىن اتقارعان.
2015 جىلدىڭ شىلدە ايىنان جەلتوقسان ايىنا دەيىن قىزىلوردا وبلىسى بويىنشا قارجىلىق باقىلاۋ ينسپەكسياسىنىڭ باسشىسى لاۋازىمىندا بولعان.
2015 جىلدىڭ جەلتوقسان ايىنان باستاپ قىزىلوردا وبلىسى اكىمىنىڭ ورىنباسارى. ول باسقا تۇلعالار سياقتى تۋعان وڭىرىنەن ۇزاپ الىسقا كەتپەگەن. ءوز وبلىسىنىڭ جايىن جاقسى بىلەتىن ازاماتتىڭ ءبىرى.
***
الداشيەۆ سۇيىندىك تاسەمەن ۇلى – ماڭعىستاۋ وبلىسى
سۇيىندىك تاسەمەن ۇلى اكىمدىك سايتىنداعى قىزمەتى بويىنشا وبلىس اكىمىنىڭ كولىك جانە قۇرىلىس بويىنشا ءبىرىنشى ورىنباسارى. ول 1963 جىلى 25 ماۋسىمدا دۇنيەگە كەلگەن. 1986 جىلى ي. م. گۋبكين اتىنداعى ماسكەۋ مۇناي جانە گاز ينستيتۋتىن جانە 2008 جىلى ورتالىق ازيا ۋنيۆەرسيتەتىن ءتامامداعان. ماماندىعى بويىنشا بىلىكتىلىگى – تاۋ-كەن ينجەنەرى جانە ەكونوميست.
ەڭبەك جولىن 1979 جىلى وزەن بۇرعىلاۋ جۇمىستارى باسقارماسىندا توكار بولىپ باستاپ، بۇرعىشىنىڭ كومەكشىسى، بۇرعىلاۋ شەبەرىنىڭ كومەكشىسى، وندىرىستىك قىزمەت كورسەتۋ بازاسىنىڭ ينجەنەرى، بۇرعىلاۋ شەبەرى، تەحنولوگيالىق ءبولىم باستىعىنىڭ ورىنباسارى قىزمەتتەرىندە بولدى.
1994-1996 جىلدارى – «قازترانسويل» اق ماگيسترالدىق مۇناي قۇبىرلارى وڭتۇستىك باسقارماسىنىڭ «وزەن» ءجودس باستىعى. 1996-1998 جىلدارى - «قازترانسويل» اق باتىس فيليالىنىڭ ماڭعىستاۋ مۇناي قۇبىرلارى باسقارماسىنىڭ تكب بويىنشا باستىعىنىڭ ورىنباسارى. 1998-1999 جىلدارى – «قازترانسويل» اق باتىس فيليالىنىڭ «اقتاۋ» ءجودس باستىعى. 1999-2000 جىلدارى – «قازترانسويل» اق باتىس فيليالى پايدالانۋ ءبولىمىنىڭ باستىعى. 2000-2004 جىلدارى – «قازترانسويل» جاق اقتوبە فيليالىنىڭ باس ينجەنەرى – ديرەكتوردىڭ ءبىرىنشى ورىنباسارى، ديرەكتورى. 2004-2010 جىلدارى – «قازترانسويل» باتىس فيليالىنىڭ ماڭعىستاۋ مۇناي قۇبىرلارى باسقارماسىنىڭ ماگيسترالدىق قۇبىرلاردى پايدالانۋ قىزمەتىنىڭ باستىعى. 2010 جىلدان باستاپ - «قازترانسويل» باتىس فيليالى ماڭعىستاۋ مۇناي قۇبىرلارى باسقارماسىنىڭ باس ينجەنەرى. 2012 جىلدىڭ قازان ايىندا ماڭعىستاۋ وبلىسى اكىمىنىڭ ءبىرىنشى ورىنباسارى بولىپ تاعايىندالدى.
«ماگيسترالدى قۇبىر كولىگىنىڭ قۇرمەتتى قىزمەتكەرى» (2010 ج.) قۇرمەتتى اتاعىنا يە.
مۇنايلى ولكەنىڭ شارۋاشىلىق جۇمىستارىن ءبىر كىسىدەي بىلەتىن ازامات.
***
دۇيسەمبايەۆ عۇمار يسلام ۇلى – اتىراۋ وبلىسى
اتىراۋ وبلىسى اكىمىنىڭ ءبىرىنشى ورىنباسارى دۇيسەمبايەۆ عۇمار يسلام ۇلى 1956 جىلى تۋعان. باتىس قازاقستان اۋىل شارۋاشىلىعى ينستيتۋتىن جانە ورال ەڭبەك جانە الەۋمەتتىك قاتىناستار زاڭ اكادەمياسىن مەحانيك، زاڭگەر ماماندىقتارى بويىنشا ءتامامداعان.
ەڭبەك جولىن 1978 جىلى اقتوبە وبلىسىنىڭ كالينين اتىنداعى كولحوزىنىڭ تەحنيكا قاۋىپسىزدىگى جونىندەگى ينجەنەرى بولىپ باستادى. كەيىن بقو ءبورلى اۋدانىنداعى ورال اۋىل شارۋاشىلىعىن مەحانيكالاندىرۋ تەحنيكۋمىندا وقىتۋشى، كومسومول كوميتەتىنىڭ حاتشىسى، ءبورلى اۋدانى «پوبەدا» كولحوزىنىڭ باس ينجەنەرى، ءبورلى اۋدانىنداعى «40 لەت وكتيابريا» كولحوزى ءتوراعاسىنىڭ ورىنباسارى، پارتيا كوميتەتىنىڭ حاتشىسى، «كراسنىي ماياك» كولحوزىنىڭ باسقارما ءتوراعاسى، ءبورلى اۋداندىق اۋىل شارۋاشىلىعى اسسوسياسياسىنىڭ ءتوراعاسى، ءبورلى اۋدانى اكىمىنىڭ ورىنباسارى، اكىمى، باتىس قازاقستان وبلىسى اكىمىنىڭ اپپاراتى قۇرىلىس جانە وتىن-ەنەرگەتيكا كەشەنى ءبولىمىنىڭ مەڭگەرۋشىسى، بقو ونەركاسىپ جانە ەنەرگەتيكا كەشەنى باسقارماسىنىڭ باستىعى، بقو كاسىپكەرلىك جانە ونەركاسىپ دەپارتامەنتىنىڭ ديرەكتورى، بقو ەنەرگەتيكا جانە كوممۋنالدىق شارۋاشىلىق باسقارماسىنىڭ باستىعى، باتىس قازاقتان وبلىسى اكىمىنىڭ ورىنباسارى قىزمەتتەرىن اتقاردى.
2012 جىلعى قاڭتاردان باستاپ باتىس قازاقتان وبلىسى اكىمىنىڭ ءبىرىنشى ورىنباسارى.
2012 جىلعى تامىز ايىنان باستاپ اتىراۋ وبلىسى اكىمىنىڭ ءبىرىنشى ورىنباسارى.
عۇمار يسلام ۇلىنىڭ ەسىمى اتىراۋدىڭ ىسكەر اكىمى نۇرلان نوعايەۆتىڭ قاسىندا كوپ ايتىلا بەرمەگەنمەن، ول باتىستاعى بىرنەشە وبلىستا قىزمەت ەتكەن تاجىريبەلى ادام.
***
وتەعۇلوۆ ارمان كارىم ۇلى – باتىس قازاقستان وبلىسى
باتىس قازاقستان وبلىسى اكىمىنىڭ ءبىرىنشى ورىنباسارى - وتەعۇلوۆ ارمان كارىم ۇلى.
ا.ك.وتەعۇلوۆ 1964 جىلى تۋعان، ءبىلىمى جوعارى، 1989 جىلى ساراتوۆ زووتەحنيكتىك-مالدارىگەرلىك ينستيتۋتىن ۆەتەرينار-دارىگەر، 2007 جىلى باتىس قازاقستان ينجەنەرلىك-تەحنولوگيالىق ۋنيۆەرسيتەتىن ەكونوميست ماماندىعى بويىنشا بىتىرگەن.
1989-1996 جىلدار كەزەڭىندە فۋرمانوۆ اۋدانىنداعى «اقكول» كەڭشارىندا اعا، باس ۆەتەرينارلىق دارىگەر بولىپ جۇمىس ىستەدى. 1996-1998 جىلداردا – قازتالوۆ اۋدانىنداعى «تالدىاپان» ۇجىمدىق اۋىل شارۋاشىلىعى كاسىپورنىنىڭ ديرەكتورى. 1998-2002 جىلداردا – قازتالوۆ اۋدانى اكىمىنىڭ ورىنباسارى، وبلىس اكىمى اپپاراتىنىڭ اگروونەركاسىپتىك كەشەنى ماسەلەلەرى جونىندەگى باس ينسپەكتورى.
2002-2010 جىلدارى – قاراتوبە اۋدانىنىڭ اكىمى.
2010-2013 جىلدارى – تەرەكتى اۋدانىنىڭ اكىمى.
2013-2014 جىلدارى وبلىستىق اۋىل شارۋاشىلىعى باسقارماسىنىڭ باسشىسى.
2014-2015 جىلدارى وبلىس اكىمىنىڭ ورىنباسارى قىزمەتىن اتقاردى.
2015 جىلدىڭ قاڭتارىنان بەرى وبلىس اكىمىنىڭ ءبىرىنشى ورىنباسارى.
ارمان كارىم ۇلى دا ءوز وبلىسىنىڭ شارۋاشىلىعىن بەس ساۋساعىنداي بىلەتىن، باسقا وبلىستارعا قىزمەتپەن كەتە قويماعان تۇلعا. ارمان وتەعۇلوۆ ەلباسىنىڭ «ۇلت جوسپارى، 100 ناقتى قادام» جوبالارىن ىسكە اسىرۋشىلاردىڭ ءبىرى.
ونىڭ اتاپ ايتۋعا بولاتىن ەرەكشە تۇسى ءبىر جىل بۇرىن جەر داۋىنا بايلانىستى ميتينگ وتكەن تۇتسا حالىقپەن ديالوگقا شىعا بىلگەندىگى.
***
شەريازدانوۆ اسقار تۇرار ۇلى – اقتوبە وبلىسى
اقتوبە وبلىسىنىڭ دا اكىمدىك سايتىندا ساپاربايەۆتىڭ قايسى ورىنباسارى ءبىرىنشى ورىنباسار ەكەنى جازىلماعان.
دەگەنمەن، اكىمدىكتە قولىنا ەڭ كوپ باسقارمانى ۇستاعان سول ءوڭىردىڭ تۋماسى شەريازدانوۆ اسقار تۇرار ۇلى.
اسقار تۇرار ۇلى 1968 جىلى دۇنيەگە كەلدى. ول جۇبانوۆ اتىنداعى اقتوبە پەداگوگيكالىق ينستيتۋتىن «ورىس ءتىلى مەن ادەبيەتىنىڭ ءمۇعالىمى» ماماندىعى بويىنشا تامامداسا، الماتى ەكونوميكا جانە ستاتيستيكا ينستيتۋتىندا ەسەپشى-ەكونوميست كاسىبىنىڭ قىر-سىرىن مەڭگەردى.
1992 جىلى العاشقى ەڭبەك جولى №7 كتۋ-دىڭ قازاق ءتىلى مەن ادەبيەتىنىڭ وقىتۋشىسى رەتىندە باستالعان. ول ءتۇرلى جىلدارى تىلدەر بويىنشا وبلىستىق باسقارمانىڭ باس مامانى، اقتوبە وبلىسى اكىمىنىڭ باسپا ءسوز حاتشىسى، كەڭەسشىسى، ورىنباسارى، كەيىن ىشكى ساياسات دەپارتامەنتىنىڭ ديرەكتورى، ورىنباسارى ءارى تۋريزم جانە سپورت باسقارماسىنىڭ باستىعى مىندەتتەرىن اتقاردى.
ءبولىمنىڭ، دەپارتامەنتتىڭ باستىعى، «باتىس اكك»ۇق» اق-نىڭ استانا قالاسىنداعى وكىلى، ەلورداداعى «التىن قىران» توپتىق كومپانياسى باس ديرەكتورىنىڭ ورىنباسارى، اقتوبە قالاسى اكىمى اپپاراتىنىڭ جەتەكشىسى قىزمەتتەرىندە بولدى.
2013 جىلدىڭ جەلتوقسانىنان وسى تاعايىنداۋعا دەيىن العا اۋدانىنىڭ اكىمى بولدى. ساپاربايەۆ وڭىرگە باسشى بولىپ كەلگەننەن كەيىن ونى ءوزىنىڭ ورىنباسارى ەتىپ تاعايىندادى. ول ءوڭىردىڭ ىشكى ساياسات باسقارماسىن دا قولىندا ۇستايدى. وبلىستا تۋىنداپ جاتاتىن ءدىني ماسەلەلەردى دە باقىلاۋىندا ۇستاپ وتىرعان شەندى دەسە بولادى. سونداي-اق ول وتكەن جىلى تامىز ايىندا ساپاربايەۆسىز-اق بىرنەشە باسقارمانىڭ باسشىسىن اۋىستىرىپ، قولىندا بيلىگى بار ەكەنىن كورسەتىپ قالعان بولاتىن.
***
عاۋەز تورسان ۇلى نۇرمۇحامبەتوۆ – قوستاناي وبلىسى
قوستاناي وبىلىسى اكىمدىگىنىڭ سايتى باسقا وبلىستار سياقتى ەمەس الدىمەن ورىسشا اشىلادى. ارينە، قازاقشا نۇسقاسى جوق ەمەس. وبلىس اكىمىنىڭ ءبىرىنشى ورىنباسارى عاۋەز تورسان ۇلى نۇرمۇحامبەتوۆ.
عاۋەز تورسان ۇلى 1968 جىلعى 11 شىلدەدە قوستاناي وبلىسى قاراسۋ اۋدانىنىڭ مايسكيي كەنتىندە تۋدى.
1992 جىلى سەلينوگراد اۋىل شارۋاشىلىعى ينستيتۋتىن «عالىم اگرونوم» ماماندىعى بويىنشا، 2002 جىلى چەليابى مەملەكەتتىك ۋنيۆەرسيتەتىن «زاڭگەر» ماماندىعى بويىنشا، 2008 جىلى قوستاناي ينجەنەرلىك-ەكونوميكالىق ۋنيۆەرسيتەتىن «ەكونوميكا باكالاۆرى» ماماندىعى بويىنشا ءبىتىردى.
عاۋەز تورسان ۇلى ءوزىنىڭ ەڭبەك جولىن 1992 جىلى تورعاي وبلىسىنىڭ وكتيابر اۋدانى ۆيليامس اتىنداعى كەڭشارىنىڭ باس اگرونومدىعىنان باستادى. عاۋەز نۇرمۇحامبەتوۆ 2002 جىلعى قازاننان 2008 جىلعى قاڭتارعا دەيىن – قوستاناي وبلىسى قارابالىق اۋدانىنىڭ اكىمى. 2008 جىلعى قاڭتاردان 2009 جىلعى اقپانعا دەيىن - قوستاناي وبلىسى قوستاناي قالاسىنىڭ اكىمى. 2009 جىلعى ساۋىردەن 2011 جىلعى ماۋسىمعا دەيىن قوستاناي قالاسىندا «پتك «سودرۋجەستۆو» ج ش س باس ديرەكتورىنىڭ ورىنباسارى بولىپ جۇمىس ىستەدى. 2011 جىلعى ماۋسىمنان 2012 جىلعى اقپانعا دەيىن – قوستاناي وبلىسى اۋليەكول اۋدانىنىڭ اكىمى. 2012 جىلعى اقپاندا قوستاناي قالاسىنىڭ اكىم بولىپ قايتا تاعايىندالعان بولاتىن. 2014 جىلدىڭ شىلدە ايىندا پرەزيدەنت اكىمشىلىگىنە ينسپەكتور قىزمەتىنە كەلگەن. 2015 جىلدىڭ مامىرىنان قوستاناي وبلىسى اكىمىنىڭ ورىنباسارى. 50-گە جاسى جاقىنداپ قالعان ول ءوز قاتارىمەن سالىستىرعاندا استانادا قىزمەت ەتىپ كورگەن تاعى ءبىر تۇلعا.
***
ساپاروۆ ايداربەك سەيپەل ۇلى – سولتۇستىك قازاقستان وبلىسى
سقو اكىمىنىڭ باسقا وبلىستاردان ەرەكشەلىگى بەس ەمەس ءتورت ورىنباسارى بار.
ساپاروۆ ايداربەك سەيپەل ۇلى 1966 جىلى 12 ماۋسىمدا سولتۇستىك قازاقستان وبلىسى بۋلايەۆ اۋدانى كراسنىي c. تۋعان. ۇيلەنگەن. ءۇش بالاسى بار (ۇلى — نۇرسۇلتان، قىزى — سۇلۋشاش، ۇلى — ايسۇلتان). ومبى اۋىلشارۋاشىلىعى ينستيتۋتىن (1992 ج.)، ماناش قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن (2006 ج.) بىتىرگەن. زووينجەنەر، مەملەكەتتىك باسقارۋ باكالاۆرى ماماندىقتارىنا يە.
ينستيتۋتتى اياقاتعان سوڭ بۋلايەۆ اۋدانىنىڭ اۋىلشارۋاشىلىعى كاسىپورىندارىندا ماماندىعى بويىنشا جۇمىس ىستەگەن.
1995–2003 جج. — سولتۇستىك قازاقستان وبلىسى پەتروپاۆل قالاسىنداعى «نوعايباي» ج ش س ديرەكتورى، باس ديرەكتورى.
2003–2005 جج. — سولتۇستىك قازاقستان وبلىسى پەتروپاۆل قالاسىنداعى «پرودكورپوراسيا» اق سولتۇستىك قازاقستان وبلىستىق وكىلدىگى ديرەكتورىنىڭ ورىنباسارى.
2005–2006 جج. — سولتۇستىك قازاقستان وبلىسى پەتروپاۆل قالاسىنداعى «پرودكورپوراسيا» اق سولتۇستىك قازاقستان وبلىستىق وكىلدىگى ديرەكتورىنىڭ ءبىرىنشى ورىنباسارى.
2006–2006 جج. — سولتۇستىك قازاقستان وبلىسى پەتروپاۆل قالاسى بويىنشا قازاقستان رەسپۋبليكاسىنىڭ اۋىل شارۋاشىلىعى مينيسترلىگى وبلىستىق اۋماقتىق ينسپەكسياسىنىڭ باستىعى.
2006–2008 جج. — سولتۇستىك قازاقستان وبلىسى شال، اقىن اۋدانىنىڭ اكىمى، سەرگەيەۆكا قالاسى.
2008 جىلدىڭ ناۋرىز ايىنان 2010 جىلدىڭ ساۋىرىنە دەيىن سولتۇستىك قازاقستان وبلىسى ماعجان جۇمابايەۆ اۋدانىنىڭ اكىمى، بۋلايەۆ قالاسى.
2010 جىلدىڭ ءساۋىر ايىنان 2011 جىلدىڭ قىركۇيەگىنە دەيىن سولتۇستىك قازاقستان وبلىسى اكىمىنىڭ اۋىل شارۋاشىلىعى جونىندەگى ورىنباسارى.
2011 جىلدىڭ قىركۇيەگىنەن سولتۇستىك قازاقستان وبلىسى اكىمىنىڭ ءبىرىنشى ورىنباسارى.
ايداربەك سەيپەل ۇلى ءبىرىنشى ورىنباسار قىزمەتىندە ۇزاق ۋاقىت وتىرعان تۇلعا. ءوڭىردىڭ باستى ەرەكشەلىگى استىق شارۋاشىلىعى ماسەلەلەرىمەن ب ا ق بەتىنە ءجيى شىعادى.
***
قادىرحان ماحمۇت ۇلى وتاروۆ – اقمولا وبلىسى
اكىمى وزگە ۇلت وكىلى بولىپ تۇرعان جالعىز وبلىس اقمولا وبلىسى. سايتى ورىسشا اشىلاتىن ەكىنشى اكىمدىك وسى وبلىسقا تيەسىلى. وبلىس اكىمىنىڭ ءبىرىنشى ورىنباسارى قادىرحان ماحمۇت ۇلى وتاروۆ.
قادىرحان ماحمۇت ۇلى 1953 جىلى تۋعان، ءبىلىمى جوعارى، باتىس-قازاقستان اۋىل شارۋاشىلىق ينستيتۋتىن بىتىرگەن. اۋىلشارۋاشىلىق عىلىمدارىنىڭ كانديداتى. ەڭبەك جولىن 1975 جىلى اقتوبە وبلىسى «حلەبوداروۆسكيي» كەڭشارىنىڭ زووتەحنيك-سەلەكسيونەرى بولىپ باستادى. باس زووتەحنيك لاۋازىمىنان باستاپ وبلىستىق اۋىل شارۋاشىلىعى باسقارماسىنىڭ باستىعى لاۋازىمىنا دەيىنگى ەڭبەك جولىن ءوتتى. 1994 جىلعى مامىردا قازاقستان رەسپۋبليكاسىنىڭ اۋىل شارۋاشىلىعى ۆيسە-مينيسترى بولىپ تاعايىندالدى. 1999 جىلعى قاراشادان باستاپ اقمولا وبلىسى اكىمىنىڭ ورىنباسارى، ءبىرىنشى ورىنباسارى قىزمەتتەرىن اتقاردى. كەيىن قازاقستان رەسپۋبليكاسى جەر رەسۋرستارىن باسقارۋ اگەنتتىگىنىڭ ءتوراعاسى، قازاقستان رەسپۋبليكاسى وڭىرلىك دامۋ مينيسترلىگى جەر رەسۋرستارىن باسقارۋ كوميتەتىنىڭ ءتوراعاسى لاۋازىمدارىن اتقاردى. 2014 جىلعى ماۋسىمنان وبلىس اكىمىنىڭ ورىنباسارى بولىپ قىزمەت اتقارادى.
«قۇرمەت»، «پاراسات»، ءىىى دارەجەلى «بارىس» وردەندەرىمەن، مەرەيتوي مەدالدارىمەن ناگرادتالعان.
قادىرحان وتاروۆ باسقا ارىپتەستەرىنە قاراعاندا ءبىرقاتار لاۋازىمدى قىزمەتتەر اتقارعان. ول دا ۇزاق جىلدار ءبىرىنشى ورىنباسار بولعان. شىندىعىندا اقمولا وبلىسىنىڭ شارۋاشىلىعى وسى كىسىنىڭ قولىندا دەسە دە بولادى. اكىم اتى كۋلاگيندە بولعانىمەن، استىق ەگۋ ناۋقانىندا دا، استىق ورۋ ناۋقانىندا دا، جارمەڭكە ۇيىمداستىرۋدا دا بەلسەنىپ جۇمىس ىستەيتىن وسى قادىرحان وتاروۆ.
***
اسىلبەك جەكسەنباي ۇلى دۇيسەبايەۆ – قاراعاندى وبلىسى
اسىلبەك جەكسەنباي ۇلى دۇيسەبايەۆ. ءبىرىنشى ورىنباسارلار اراسىنداعى ەڭ جاسى. جاس بولسا دا ۆيسە مينيسترلىك قىزمەتكە دەيىن جەتكەن. ءوز ارىپتەستەرى اراسىنداعى پرەزيدەنت اكىمشىلىگىندە قىزمەت ەتكەن تاعى ءبىر تۇلعا.
وبلىس اكىمىنىڭ قارجى-ەكونوميكالىق ماسەلەلەر، قۇرىلىس، سپورت جانە دەنساۋلىق جونىندەگى ءبىرىنشى ورىنباسارى.
1979 جىلى تۋعان. ءبىلىمى جوعارى. 2001 جىلى س.سەيفۋللين اتىنداعى اقمولا اگرارلىق ۋنيۆەرسيتەتىن «ەكونوميست-مەنەدجەر» ماماندىعى بويىنشا ءتامامدادى.
ەڭبەك جولىن 1998 جىلى «اگروسەنتر-استانا» جشس-دا تەكسەرۋشى ريەۆيزور بولىپ باستادى.
2002 جىلى استانا قالاسى اكىمدىگى اپپاراتىنىڭ سىرتقى ەكونوميكالىق بايلانىس كوميتەتىندە باس مامان قىزمەتىن اتقاردى.
2003 جىلعى مامىر - شىلدە ارالىعىندا قازاقستان رەسپۋبليكاسى كولىك جانە كوممۋنيكاسيا مينيسترلىگى بايلانىس جانە اقپارات كوميتەتىنىڭ باس مامانى بولدى.
2003 جىلعى شىلدەدەن باستاپ - قازاقستان رەسپۋبليكاسى كولىك جانە كوممۋنيكاسيا مينيسترلىگى اۆتوموبيل جولدارى جانە ينفراقۇرىلىمدىق كەشەنى قۇرىلىسى كوميتەتىندە باس مامان، ءبولىم باستىعى بولدى.
2004 جىلى قازاقستان رەسپۋبليكاسى پرەزيدەنتى اكىمشىلىگىنىڭ ۇيىمداستىرۋ-باقىلاۋ جۇمىسى جانە كادر ساياساتى باسقارماسى ۇيىمداستىرۋ-باقىلاۋ ءبولىمىنىڭ باس ينسپەكتورى بولىپ تاعايىندالدى.
2006-2007 جىلدار ارالىعىندا قاراعاندى قالاسى جانە قاراعاندى وبلىسى اكىمدىكتەرىندە ءارتۇرلى قىزمەتتەر اتقاردى.
2007 جىلى اپپارات باسشىسى، 2009 جىلى قاراعاندى وبلىسى اكىمىنىڭ ورىنباسارى لاۋازىمىنا تاعايىندالدى.
2010 جىلدان باستاپ - قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى قىزمەتىنە تاعايىندالدى.
2011 جىلعى قىركۇيەكتەن باستاپ ق ر كولىك جانە كوممۋنيكاسيا ۆيسە-مينيسترى بولىپ قىزمەت اتقاردى.
2012 جىلى اقپانىنان باستاپ - ق ر تابيعي مونوپوليالاردى رەتتەۋ اگەنتتىگى ءتوراعاسىنىڭ ورىنباسارى.
2014 جىلى 25 ماۋسىمىنان باستاپ قاراعاندى وبلىسى اكىمىنىڭ ءبىرىنشى ورىنباسارى بولىپ قىزمەت ەتەدى
***
دۇيسەنباي نۇرباي ۇلى تۇرعانوۆ – پاۆلودار وبلىسى
وبلىس اكىمىنىڭ ءبىرىنشى ورىنباسارلارى اراسىنداعى مينيسترلىكتەردە قىزمەت ەتكەن تاعى ءبىر تۇلعا دۇيسەنباي نۇرباي ۇلى تۇرعانوۆ.
دۇيسەنباي نۇرباي ۇلى 1959 جىلى گۋريەۆ وبلىسى ماقات اۋدانى بايچۋناس كەنتىندە تۋدى. الما-اتا ەنەرگەتيكا ينستيتۋتىن جانە ماسكەۋدەگى بۇكىلوداقتىق قارجى-ەكونوميكالىق ينستيتۋتىن ءتامامدادى. ينجەنەر-ەلەكتريك جانە ەكونوميست ماماندىقتارى بار، تەحنيكا عىلىمدارىنىڭ كانديداتى.
ەڭبەك جولىن ەلەكترجوندەۋشى بولىپ باستاپ، ودان كەيىن شەبەر، ەلەكتر-جوندەۋ سەحىنىڭ باستىعى، سەح باستىعىنىڭ ورىنباسارى، «وڭتۇستىك-شىعىس» كەنىشىنىڭ باس ەنەرگەتيگى، «قاراتاۋ» وندىرىستىك بىرلەستىگىنىڭ ەلەكترمەن قامتۋ سەحىنىڭ باستىعى، جىلۋمەن قامتۋ باسقارماسىنىڭ باستىعى، جامبىل وبلىسىنداعى «قاراتاۋ» اق باس ەنەرگەتيگى قىزمەتىندە بولدى.
1993-1994 جىلدار ارالىعىندا - قاراتاۋ قالالىق تۇرعىن ۇي-كوممۋنالدىق شارۋاشىلىق كاسىپورىن بىرلەستىگىنىڭ باس ديرەكتورى.
1993-1994 جىلدار ارالىعىندا – قاراتاۋ قالالىق اكىمشىلىك باسشىسىنىڭ ورىنباسارى، قاراتاۋ قالاسى اكىمىنىڭ ءبىرىنشى ورىنباسارى، جامبىل وبلىسى سارىسۋ اۋدانىنىڭ اكىمى.
1999-2002 جىلدار ارالىعىندا – اتىراۋ قالاسىنىڭ اكىمى.
2002 جىلدان 2007 جىل ارالىعىندا - «كاسپييقۇرىلىسسەرۆيس» ج ش س پرەزيدەنتى، «كەگوك» ااق ۆيسە-پرەزيدەنتى.
2007 جىلدان 2011 جىل ارالىعىندا – قازاقستان رەسپۋبليكاسى ەنەرگەتيكا جانە مينەرالدىق رەسۋرستار مينيسترلىگىنىڭ ۆيسە-مينيسترى، كەيىن قازاقستان رەسپۋبليكاسى يندۋستريا جانە جاڭا تەحنولوگيالار ۆيسە-مينيسترى.
2011 جىلدان 2012 جىلعا دەيىن «سامرۇق-ەنەرگو» اق باسقارما ءتوراعاسىنىڭ ءبىرىنشى ورىنباسارى لاۋازىمىندا قىزمەت ەتتى.
2012 جىلعى 15 اقپاننان باستاپ - پاۆلودار وبلىسى اكىمىنىڭ ءبىرىنشى ورىنباسارى.
***
ساقتاعانوۆ نۇرىمبەت امان ۇلى – شىعىس قازاقستان وبلىسى
ساقتاعانوۆ نۇرىمبەت امان ۇلى 1970 جىلى 6 تامىزدا وڭتۇستىك قازاقستان وبلىسىندا دۇنيەگە كەلگەن. ۇلتى-قازاق، ءبىلىمى جوعارى. قىزىلوردا پەدوگوگيكالىق ينستيتۋتىن، قىزىلوردا اگرارلىق-تەحنيكالىق كوللەدجىن، مەسا ديستانسيالىق ءبىلىم بەرۋ ينستيتۋتىن، مەسا قىزىلوردا ەكونوميكا، ستاتيستيكا جانە اقپارات ينستيتۋتىن ءمۇعالىم، بۋحگالتەر، زاڭگەر ماماندىقتارى بويىنشا اياقتاعان.
ەڭبەك قىزمەتىن ينستيتۋت بىتىرگەننەن كەيىن 1992 جىلى قىزىلوردا ق. № 172 ورتا مەكتەبىندە مۇعالىم بولىپ باستاعان. 1993-1994 جىلدارى ق ر قك قاتارىندا بولىپ، اسكەردەن كەيىن قىزىلوردا ق. № 9 ورتا مەكتەبىندە جۇمىسىن جالعاستىردى.
1995-2001 جىلدارى قىزىلوردا وبلىسى بويىنشا كەدەن باسقارماسىنىڭ ينسپەكتورى، اعا ينسپەكتورى، باس ينسپەكتورى، ءبولىم باستىعى، ءبولىم باستىعىنىڭ ورىنباسارى بولىپ جۇمىس ىستەدى.
2001-2006 جىلدارى – ق ر مەملەكەتتىك كىرىس مينيسترلىگى كەدەن كوميتەتىندە باس ينسپەكتور، ءتوراعانىڭ كومەكشىسى، ءبولىم باستىعى (ق ر قارجى مينيسترلىگىنىڭ كەدەن كوميتەتى، كەدەن باقىلاۋ اگەنتتىگى)
2006-2007 جىلدارى – ق ر پارلامەنتىندەگى ۇكىمەت وكىلدىگىنىڭ باس ينسپەكتورى، ق ر ەكونوميكا جانە بيۋدجەتتىك جوسپارلاۋ مينيسترلىگىندە ءبولىم باستىعى، ءمينيستردىڭ كەڭەسشىسى.
2007-2010 جىلدارى – ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى ءتوراعاسىنىڭ ورىنباسارى.
2010-2012 جىلدارى – قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى
2012-2015 جىلدارى - شىعىس قازاقستان وبلىسى اكىمىنىڭ ورىنباسارى
2015 جىلعى 31 شىلدەدە شىعىس قازاقستان وبلىسى اكىمىنىڭ ءبىرىنشى ورىنباسارى بولىپ تاعايىندالدى.
نۇرىمبەت امان ۇلى وبلىستىڭ اكىمى دانيال احمەتوۆ سياقتى ب ا ق بەتىنەن كوپ كورىنە بەرمەيدى.
***
ءبىز سانامالاپ وتىرعان ءبىرىنشى ورىنباسار اكىمدەردىڭ حالىق اراسىنداعى تانىمالدىعى ارينە ءارتۇرلى. ءبىرىن ءوز اۋىلىنا عانا تانىلسا، ءبىرىن تۇتاس قازاقستان تانىپ جاتۋى مۇمكىن. بۇعان بولا اتقا مىنگەن ازاماتتار حالىقتى سوكپەس. سىزدەر اكىم بولىپ، باسقارىپ وتىرعان حالىق كەيدە سىزدەر تۇگىلى پارلامەنتتەگى دەپۋتاتتاردى تانىماي جاتادى. ساسي ساۋاتىنىڭ تومەندەگىنەن ەمەس، جوعارىدا وتىرعانداردىڭ كوپ كورىنە بەرمەيتىندىگىنەن. قازاق ەلۋ جىلدا ەلدىڭ جاڭاراتىنىن، ءجۇز جىلدا قازاننىڭ جاڭاراتىنىن ايتادى. قازاقستاننىڭ ىرگەتاسىن قالاپ كەتكەن الاش ارىستارى قۇرعان الاشوردا مەملەكەتىنە مىنە بيىل ءجۇز جىل تولىپ وتىر. ءبىز سىزدەردى سانامالاۋ ارقىلى چەمپيوندىق اتاق بەرمەسەك تە، ەل سۇيەرلىك قىزمەت كۇتەمىز.
نۇرعالي نۇرتاي
پىكىر قالدىرۋ