قازاقستاندىق بەلگىلى پروديۋسەر ءقىدىرالى بولمانوۆ جەلىدە تاراپ جۇرگەن كاريكاتۋراعا قاتىستى پىكىر ءبىلدىردى، - دەپ حابارلايدى Tengrinews.kz. ول بۇل تۋرالى نتك تەلەارناسىنداعى "ريەۆيۋ" باعدارلاماسىنا بەرگەن سۇحباتىندا ايتتى. 

ءانشى بەينەلەندى دەلىنگەن كاريكاتۋرا قازىرگى ۋاقىتتا قازنەتتە كەڭ تالقىلانىپ جاتىر. سۋرەتتى بەلگىلى جۋرناليست سەرىك اباس-شاح تا جاريالادى. جازباسىندا ول "قىدىرمەن" دەگەن سۋپەرمەندى توقال الۋعا جانە مىندەتتى ۋاقىتشا تىركەۋدى توقتاتۋعا شاقىرادى. بۇل جازباعا مىڭنان اسا لايك باسىلىپ، كوپتەگەن پىكىر جازىلعان بولاتىن.

 ال بولمانوۆتىڭ ءوزى كاريكاتۋرانى تاراتۋشىلاردى سىناپ تاستادى.

"مەن ەشكىمگە ناقتى ەشتەڭە ايتقان جوقپىن، كەلىپ، ناقتى سۇراسا، جارتى ساعاتتىڭ ىشىندە ءتۇسىندىرىپ بەرەر ەدىم. كەلگەن ادام ءوز پىكىرىن مىندەتتى تۇردە وزگەرتەر ەدى. تەرەڭىرەك ويلاپ كورسەك، بۇل بلوگەرلەر مەن سىنشىلار وي ءورىسى تار ادامدار"، - دەدى بەلگىلى ءانشى ءارى پروديۋسەر.

ال كاريكاتۋرانىڭ اۆتورى مۇرات ءدىلمانوۆ "حالىق قامىن ويلايتىن ادامدى" سالعانىن ايتىپ وتىر.

"بەلگىلى ءبىر كوزقاراس بولار دەپ ويلادىم. (...) كوڭىلگە تيەتىندەي ەشتەڭە كورىپ تۇرعان جوقپىن. جاعداي ازىلگە قۇرىلعان. وسى زاڭعا قاتىستى جاعداي الاڭداتادى. سەبەبى ازاماتتارعا پىكىرىن ەسەپكە الماۋعا بولاتىن ادامدارداي كورەدى. (...) مەن تۇنىمەن ۇيىقتاماي، حالىقتىڭ قامىن ويلايتىن ادامدى سالدىم"، - دەيدى ءدىلمانوۆ.

سۋرەتشىنىڭ ايتۋىنشا، ءقىدىرالى بولمانوۆ بۇل كاريكاتۋرانى ءوز پاراقشالارىنا جۇكتەگەن ادامداردان ءوشىرۋدى سۇراپ جاتىر ەكەن.

"ونىڭ (ءقىدىرالى بولمانوۆ - اۆت.) حابارلاسىپ، بۇل سۋرەتتى تاراتپاۋ تۋرالى ءوتىنىش ايتىپ جاتقانى جايلى ايتىلىپ ءجۇر. مۇنىڭ بارلىعىن قالاي وشىرۋگە بولاتىنىن بىلمەيمىن. ەكىنشىدەن، ەگەر ول سوتقا بەرسە، ساراپتاما جۇرگىزۋى كەرەك، ءسويتىپ، ول بۇل سۋرەتتىڭ قاي جەرى كوڭىلىنە تيگەنىن دالەلدەسىن. ول جاقتا قورلايتىن دۇنيە جوق. ەش جەردە مۇندا ءقىدىرالى بەينەلەنگەن دەپ ايتپادىم. ادامدار سولاي دەسە، مەن وعان جاۋاپتى ەمەسپىن"، - دەدى ءدىلمانوۆ.

ەسكە سالايىق، ءقىدىرالى بولمانوۆ قازنەت تاراپىنان ءبىرىنشى رەت سىنعا ۇشىراپ وتىرعان جوق. بۇعان دەيىن ول جەر ماسەلەسىنە قاتىستى پىكىر بىلدىرەمىن دەپ، جۇرتتىڭ تالقىسىنا قالعان ەدى. سول ۋاقىتتا ول "امالسىزدان توقال تۋرالى قاۋەسەت ويلاپ تاپقانىن" مالىمدەگەن بولاتىن.