وڭتۇستىك كورەيانىڭ پروكۋراتۋراسى  مەملەكەتتىڭ ەڭ باي بيزنەسمەندەرىنىڭ ءبىرى، Samsung Electronics كومپانياسىنىڭ ۆيسە-توراعاسى لي دجەوندى قاماۋعا الۋعا وردەر بەرىپتى دەپ حابارلايدى bbc.com. ەگەر دە سوت وردەردى ماقۇلداسا، لي دجەون سارسەنبى كۇنى قاماۋعا الىنۋى مۇمكىن.

بيزنەسمەن كورەياداعى ەڭ ۇلكەن كوررۋپسيالىق سكاندالعا قاتىسى بار بولىپ شىقتى. ەستەرىڭىزگە سالا كەتەيىك، مەملەكەت پرەزيدەنتى پاك كىن حەنىڭ قۇربىسى چحۆە سۋن سيل كوررۋپسياعا قاتىسى بار جانە قىزمەتتىك جاعدايىن اسىرا پايدالانعان دەگەن ايىپپەن ۇستالعان بولاتىن. ال، پاك كىن حەگە كەلەتىن بولساق، وعان ازىرگە يمپيچمەنت جاريالاندى.

پارلامەنتتىڭ شەشىمىن كونستيتۋسيالىق سوت 180 كۇن ىشىندە قاراستىرىپ، بەكىتۋى ءتيىس. ەلدىڭ تىزگىنى پرەمەر-مينيسترگە تاپسىرىلدى.

تەرگەۋ ءىسىنىڭ مالىمەتىنە سايكەس، چحۆە سۋن سيل وزىنە قاتىستى ەكى ۇكىمەتتىك ەمەس قورىنا قايىرىمدىلىق جاساۋعا ءىرى بيزنەس وكىلدەرىن ماجبۇرلەگەن. سونداي «دونورلاردىڭ» ءبىرى Samsung كونسەرنى. كومپانيا چحۆە سۋن سيلدىڭ قولىنا ونىڭ قىزىنىڭ گەرمانيادا اتقا سالت ءمىنىپ جۇرۋگە ۇيرەنۋى ءۇشىن بىرنەشە ميلليون دوللار تابىستاعان.

وتكەن بەيسەنبىدە لي دجەون جاۋاپ الۋعا پروكۋراتۋراعا شاقىرىلعان بولاتىن. تەرگەۋ 22 ساعاتقا سوزىلىپتى.  تەرگەۋ ءىسىنىڭ ويىنشا، لي دجەون تۇتاس كومپانيانىڭ يەسى بولماسا دا مەملەكەت باسشىسى تاراپىنان جاسالاتىن قورعانشىلىقتىڭ پەن قامقورلىقتىڭ ريزاشىلىعى رەتىندە چحۆە سۋن سيلگە قاراجات اۋدارۋعا شەشىم قابىلداپ وتىرعان. لي دجەون وسىعان دەيىن پارلامەنتتىك تىڭداۋ بارىسىندا ۇكىمەتتىك ەمەس ۇيىمدارعا جاسالىنعان قايىرىمدىلىق اۋدارىمداردىڭ بارلىعى ارامپيعىل ماقسات كوزدەمەگەنىن ايتتى.

وڭتۇستىك كورەيا باق-ى لي دجەوندى  Samsung-تىڭ مۇراگەرى دەپ اتايدى. سەبەبى كورپوراسيانىڭ رەسمي ءتوراعاسى ونىڭ تۋعان اكەسى  لي گونحي. لي گونحي دەنساۋلىعىنا بايلانىستى بيزنەسكا ارالاسۋىن قويىپ، جۇرت نازارىنا شىعۋدان قالعان.

اۋدارعان: جازيرا بايدالى