بىشكەك تۇبىندە جۇك تاسىمالدايتىن ۇشاق قۇلاعان ءۇيدىڭ تۇرعىنى قازاقستاندا ءناپاقا تاۋىپ جۇرگەن، - دەپ حابارلايدى tengrinews.kz Sputnik قىرعىزستان سايتىنا سىلتەمە جاساپ.

اپات كەزىندە 28 جاستاعى نۋربير سولتوكەنوۆ قازاقستاندا بولىپتى. ول ءوز ءۇيىنىڭ ماڭىنا ۇشاقتىڭ قۇلاعانىن تەلەفون ارقىلى حابارلادى. "مەن قازاقستاندا جۇمىس ىستەپ ءجۇرمىن. ماعان اۋىلداعىلار حابارلاسىپ، دەرەۋ قايتۋىم كەرەك ەكەنىن ايتتى. نە بولعانىن بىلمەدىم. ءۇيدىڭ ماڭىنا ۇشاق قۇلادى دەپ ايتتى. وقيعا ورنىن ءوز كوزىممەن كوردىم". - دەپ حابارلادى نۋربير كوز جاسىن تيا الماي.

ەر ادامنىڭ ايتۋىنشا، ونىڭ اكەسى 56 جاستا بولعان، ونىڭ ايەلى 46-دا، ال قىزى 7 جاستا بولىپتى. ولاردىڭ ۇيىندە كورشى ءۇيدىڭ بالالارى جۇرگەن ەكەن. بىرەۋى جەتىنشى، ەكىنشىسى ءنولىنشى سىنىپتا وقيدى. "ۇشاق ولاردىڭ ۇستىنەن ءتۇسىپتى، دىمى قالماعان"، - دەدى ءنۋربيردىڭ اپكەسى لارگيزا.

ايتا كەتەيىك، وسىعان دەيىن وقيعا الدىندا مەكتەپكە كەتىپ، تۇسكە تامان قايتىپ كەلگەندە ءۇيىنىڭ جوق ەكەنىن اڭعارعان مەكتەپ وقۋشىسى جايىندا حابار تاراعان بولاتىن. قىرعىزستاننىڭ ءبىرىنشى ۆيسە-پرەمەرى مۋحاممەتكالىي ابۋلگازييەۆ مۇنداي جاعدايدىڭ بولعانىن راستاپتى. ايتۋىنشا، ءۇشىنشى سىنىپ وقۋشىسى تاڭەرتەڭ مەكتەپكە كەتىپ قالعان، ال اپاتتان ونىڭ اكە-شەشەسى قازا تاپقان.

تاعى ءبىر بالا، پرەمەردىڭ ايتۋىنشا، اپات الدىندا اجەتحاناعا شىعىپ كەتكەندىكتەن امان قالىپتى. "بالا ءتىرى قالدى، ال وتباسى تۇگەلدەي قىرىلىپ قالدى"، - دەپ حابارلادى ابۋلگازييەۆ.

ەسكە سالايىق، وقيعا "ماناس" اۋەجايىندا 16 قاڭتاردا جەرگىلىكتى ۋاقىت بويىنشا شامامەن ساعات 07.30-دا بولعان. اپاتقا ۇشىراعان جۇك ۇشاعىنىڭ Turkish Airlines اۋە كومپانياسىنىڭ يەلىگىندە ەكەنى انىقتالىپ وتىر. ال كەيىنىرەك بىشكەك تۇبىندە قۇلاعان ۇشاقتان 32 ءمايىت تەكسەرىلدى، ونىڭ 13ء-ى بالالار.