قازاقستاندا ازاماتتاردىڭ سوتتىلىعى بار نەمەسە جوقتىعى تۋرالى انىقتاما بەرۋ تارتىبىنە وزگەرىستەر ەنگىزىلدى، دەپ حابارلايدى اTPress.kz

بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگ بارىسىندا قازاقستان رەسپۋبليكاسى باس پروكۋراتۋراسىنىڭ اتىراۋ وبلىسى بويىنشا باسقارما باسشىسىنىڭ ورىنباسارى جانىبەك سەمعالييەۆ حابارلادى. 

- وتكەن جىلدىڭ 15 جەلتوقسانىندا №816 ۇكىمەت قاۋلىسىمەن كورسەتىلەتىن مەملەكەتتىك قىزمەت تىزىلىمىندە ءبىرقاتار وزگەرىستەر بولدى. قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ «تۇلعانىڭ قىلمىستىق قۇقىق بۇزۋشىلىق جاساۋى تۋرالى مالىمەتتەردىڭ بولۋى نە بولماۋى تۋرالى انىقتاما بەرۋ» مەملەكەتتىك قىزمەتى «سوتتىلىقتىڭ بولۋى نە بولماۋى تۋرالى انىقتاما بەرۋگە» اۋىستىرىلدى، - دەدى باسقارما باسشىسىنىڭ ورىنباسارى جانىبەك سەمعالييەۆ. 

ياعني، ەندى جاڭا وزگەرىسكە سايكەس بۇرىن سوتتىلىعى بولعان ازاماتتان جازاسىن وتەپ كەلگەننەن كەيىن ونىڭ سوتتالعاندىعى تۋرالى مالىمەت الىنىپ تاستالادى. قىلمىس جاساعاندىعى تۋرالى مالىمەتتى جويۋ ءۇشىن ازامات ءتيىستى جازاسىن وتەپ كەلگەن سوڭ جەكە كۋالىگىمەن حالىققا قىزمەت كورسەتۋ ورتالىعىنا بارۋى ءتيىس. سول جەردە ول ءوتىنىشىن تولتىرىپ، 3 مينۋت ىشىندە سوتتىلىعى جوق تۋرالى انىقتاما قۇجات الا الادى.  

- كەيبىر مەكەمەلەر ازاماتتاردى جۇمىسقا قابىلداۋ كەزىندە ولاردان سوتتالماعاندىعى تۋرالى انىقتاما اكەلۋدى تالاپ ەتەدى. بۇل بۇرىن سوتتىلىعى بولعان ازاماتتاردىڭ نارازىلىعىن تۋدىرىپ كەلگەن ەدى. ازاماتتاردىڭ قۇقىن قورعاۋ ماقساتىندا وسى ماسەلە باس پروكۋراتۋرادا قارالدى. «مەملەكەتتىك قىزمەتتەر تۋرالى» ق ر زاڭىنىڭ 13 بابىنا سايكەس، ستاندارت كورسەتىلەتىن مەملەكەتتىك قىزمەت تىزىمدەمەسىنە قىزمەتتى ەنگىزگەن كۇننەن باستاپ ءۇش ايدىڭ ىشىندە بەكىتىلەدى، - دەيدى ج.سەمعالييەۆ. 

وسىلايشا، 2017 جىلدىڭ 2 توقسانىنان باستاپ بۇرىن قىلمىستىق جاۋاپكەرشىلىككە تارتىلعان، سوتتىلىقتارى جويىلعان نەمەسە الىنىپ تاستالعان ازاماتتار انىقتامانى «سوتتىلىعى جوق» دەگەن بەلگىمەن الا الاتىن بولدى.