ەلۆيرا ەرعالينا ءوزىنىڭ facebook پاراقشاسىندا بىلاي دەپ جازادى:

اۋىلداعى تۋعان-تۋىستارىم شەتىنەن ينستاگرامعا تىركەلىپ جاتىر ەكەن. ايتەۋىر، قايدا ءجۇرىپ-تۇرعانىمنان حاباردار.
ودان دا فەيسبۋككە تىركەلسە عوي دەپ قالدىم. اسىرەسە، مۇعالىمدەر.
قاتىرىپ جاڭالىق الىپ نە بەرىپ جاتپاسا دا، تالقىلانىپ جاتقان ءبىراز نارسەدەن حاباردار بولار ەدى-اۋ...
بۇلاي دەۋىمە سەبەپ بار.
50 ءمۇعالىمى بار مەكتەپكە ەكسپو بيلەتتەرىن اكەلىپتى. 40 دانا. "بارعاندارىڭ جاقسى. بارماي جاتساڭدار دا، بيلەت الۋعا مىندەتتىسىڭدەر،" دەپتى. بيلەت قۇنى 2000-8000 تەڭگە ارالىعىندا.
ەندى جەڭگەم: "سوعان بولا مىنا جاقتاعى تىرلىكتى تاستاپ بارۋ قايدان، 2 بيلەت الىپ، ساعان بەرىپ جىبەرسەم بولاتىن شىعار؟" دەيدى.
ول قالاي سوندا دەپ قالعام.
ءدال سول اۋداندا، ءبىراق، باسقا مەكتەپتە ءمۇعالىم بوپ ىستەيتىن تاعى ءبىر جەڭگەم دە سولاي دەيدى. "الاسىڭدار، بارۋ/بارماۋ ءوز ەرىكتەرىڭدە،" دەپتى. باعاسى سول - 2000-8000 تەڭگە ارالىعىندا.
شوشىدىم. "جالپى ورداباسى اۋدانىنىڭ مۇعالىمدەرىنە 2000 بيلەت ءبولىپتى. ال دەسە، الامىز. ايلىقتان ۇستايدى عوي ءبارىبىر،" دەپ وتىر جەڭگەلەرىم. بەتى اشىلماعان كۇيى پەشكە كەتەتىن گازەت-جۋرنالىنا جازىلىپ وتىرعانداي ەش ەموسياسىز ايتادى عوي تاعى.
"بارماساق، نەگە الۋعا مىندەتتىمىز؟" دەپ سۇرامادىڭىزدار ما دەدىم. جوعارى جاقتىڭ پريكازى ەكەن.
قىزىعى، قالانىڭ مەكتەپتەرىنە ونداي مىندەت جەتپەپتى ءالى.
"ءوز قۇقىعىن قورعاۋدى بىلمەيدى، اڭقاۋ، ايداعانعا كونە بەرەدى دەپ اۋىلدىڭ مۇعالىمدەرىن "سورىپ جاتىر" ەكەن عوي. قارسىلاسپاي كونە بەرەتىن وزدەرىڭىزدەن ەكەن ءبارى. «لوح» بوپ جۇرىڭىزدەر سول،" دەپ كۇلدىم جەڭگەلەرىمە. ەكەۋى تىزىلداپ قالدى. راسى سول عوي.