اقتوبەدە ەندى كورىنىپ كەلە جاتقان جاس تالانتتى كوزى شالعان وبلىس باسشىسى بەردىبەك ساپاربايەۆ ونىڭ اناسىنا بالاعا دۇرىستاپ قاراۋ كەرەكتىگىن جەتكىزدى، دەپ حابارلايدى «ءتىلشى».
«بالاڭىز شامامەن 13-15 جاس شاماسىندا شىعار. ەر بالانىڭ داۋىسى وزگەرەتىن كەز. سوندىقتان، مىنا ءوسىپ كەلە جاتقان ۇلىڭىزدىڭ داۋىسىن كۇتىڭىز»، — دەدى بەردىبەك ساپاربايەۆ تالانتتى ءجاسوسپىرىمنىڭ اناسىنا قاراپ.
وبلىس باسشىسى بالالاردى تويلارعا شىعارماۋ كەرەكتىگىن ايتتى.
«تالانتتى بالالار جەر-جەردە كورىنەدى، ءبىراق ۇلكەن ساحنالارعا شىعا الماي قالادى. كۇتىنۋ كەرەك قوي. ونىڭ ۇستىنە قازاقتا كوز دەگەن بار. جالپى، مۇنداي بالالاردىڭ تويعا شىعىپ، ونەر كورسەتۋىنە قارسىمىن»، — دەدى بەردىبەك ساپاربايەۆ.
مەكتەپ جاسىنداعى بالالاردىڭ تويلاردا ونەر كورسەتۋىنە قارسىلىعىن بىلدىرگەن ونەر قايراتكەرى ورال بايسەڭگىر دە بولاشاعىنان زور ءۇمىت كۇتتىرەتىن بالانىڭ كاسىبي تۇرعىدا شىڭدالعانىن قالايتىنىن جاسىرمايدى. ونىڭ پايىمىنشا، تالانتتى بالاعا بارلىق جاعدايدى جاساۋ كەرەك.
ەر بالانىڭ داۋىس كۇتىمىنە قاتىستى ءانشى سۆەتلانا ايتبايەۆا دا ءوز ويىن جەتكىزدى.
«بالانى تويعا شىعارعان دۇرىس ەمەس، ارينە. ەڭ الدىمەن ول بالانىڭ اعزاسىنا كەرى اسەرىن تيگىزەدى. ءتۇن ۇيقىسى دۇرىس بولمايدى. تويدا شارشايدى، كەزەگىن كۇتەدى، توڭادى. ەكىنشىدەن، بالانىڭ پسيحيكاسىنا كەرى اسەر ەتەدى. تويداعى ءتۇرلى جاعدايدى كورەدى. ىشكەن ادامدار، توبەلەس، كەلىسپەۋشىلىكتەر. ودان بولەك، ونەر كورسەتكەن بالاعا قوناقتار اقشا ۇسىنادى. كەيبىر بالالار جەرگە تاستاعان اقشادان كوز الماي قاراپ تۇرادى. ءان مەن اقشانىڭ اراجىگىن ايىرا المايتىن جاعدايعا جەتەدى»، — دەيدى سۆەتلانا ايتبايەۆا.
ءانشى سونىمەن قاتار ەر بالالاردىڭ داۋىسىندا مۋتاسيا بولاتىنىن ايتتى.
«راسىمەن دە، بالانى، اسىرەسە، وتپەلى كەزەڭدە تويلارعا شىعارۋعا بولمايدى. داۋىسقا سالماق تۇسىرمەۋ كەرەك. مۋتاسيا اياقتالعانشا كۇتكەن ابزال. ديماش (قۇدايبەرگەن — رەد.) كوپشىلىك الدىنا تەك 15-16 جاسىندا شىعا باستادى. تانىستارىمىز «بالاڭىزدىڭ مىناداي داۋىسى بارىن بىلمەدىك قوي» دەپ تاڭدانىستارىن دا جاسىرماي جاتتى»، — دەيدى ءانشى سۆەتلانا ايتبايەۆا.
