رەداكسيامىزعا تومەندەگىدەي كىسى شوشىرلىق ماعلۇمات كەلىپ ءتۇستى.
سول مالىمەتكە سەنسەك، 1998 جىلدىڭ 12 تامىزىندا گولوۆاتيۋك ۆلاديمير ميحايلوۆيچ ەسىمدى ازامات رەسەي فەدەراسياسىنىڭ «ازاماتتىق تۋرالى» زاڭىنىڭ 3 بابىنىڭ نەگىزىندە استاناداعى رەسەي ەلشىلىگىنىڭ كونسۋلدىعىندا رەسەي ازاماتتىعىن الادى. تيىسىنشە پاسپورت راسىمدەمەگەن، تەك وزگە ەلدىڭ ازاماتتىعىن العان، سويتە تۇرا قازاقستان ازاماتتىعىنان باس تارتپاعان،
ءبىزدىڭ ەلدە مۇنداي جايتتار بار ەكەنى جاسىرىن ەمەس. كوبىنە رەسەيمەن شەكارالاس ايماقتاردىڭ قاراپايىم تۇرعىندارى ەكىجاقتى ازاماتتىق الادى دا ونى جاسىرىپ جۇرەدى.
ءبىراق گولوۆاتيۋك ۆلاديمير ميحايلوۆيچ قاتارداعى قاراپايىم ادام ەمەس. ول – شىعىس قازاقستان وبلىستىق ءماسليحاتىنىڭ حاتشىسى! ياعني، شەكارالىق ايماقتىڭ وكىلدىك بيلىگىنىڭ جەتەكشىسى! وبلىستىڭ باستى تۇلعالارىنىڭ ءبىرى! ماسەلەن، قىتايداعى ىلە-قازاق اۆتونومياسىنىڭ باسشىسى نەمەسە رەسەيدەگى ورىنبور وبلىستىق دۋماسى جەتەكشىسىنىڭ قازاقستان ازاماتتىعى بولۋى مۇمكىن بە؟ جوق! ال ءبىزدىڭ ەلدە ءبارى مۇمكىن!
ءبىزدىڭ قولىمىزدا رەسەي فەدەراسياسى فەدەرالدىق ميگراسيالىق قىزەتىنىڭ ەلەكروندى بازاسىنان كوشىرىلگەن ءتارىزدى قۇجات تا بار. وندا ۆ. م. گولوۆاتيۋكتىڭ 1998 جىلدان باستاپ كورشى ەلگە جىلىنا بىرنەشە رەت باراتىنى كورسەتىلگەن. ءدال وسى قاعازدا 1998 جىلدىڭ 12 تامىزىندا ۆ.م.گولوۆاتيۋككە رەسەي ازاماتتىعىن بەرۋ تۋرالى شەشىم قابىلدانعانى جازىلعان.
شقو وبلىستىق ءماسليحاتى حاتشىسىنىڭ رەسەي ازاماتى رەتىندەگى جەكە ءىس-قۇجاتىنىڭ ءنومىرى دە انىقتالعان – 170309960.
قازاقستان مەن رەسەي – كورشىلەر، دوستاس مەملەكەتتەر، ءبىراق بىلدەي ءبىر ءوڭىردىڭ جاۋاپتى قىزمەتىنىڭ تىزگىنىن وزگە ەل ازاماتىنىڭ ۇستاپ وتىرعانى مەملەكەتتىك قاۋىپسىزدىك قاعيدالارىنا قايشى. ماسەلەن، ەل پرەزيدەنتى وسكەمەنگە جۇمىس ساپارىمەن باردى دەلىك، ونىڭ جول ءجۇرۋ باعىتتارىنان كورشى ەلدىڭ ءتۇرلى قىزمەتتەرى مالىمەت الىپ وتىرمايتىنىنا كىم كەپىلدىك بەرە الادى؟
وبلىس ورتالىعىنىڭ اسكەري بولىمشەلەرىنەن باستاپ ستراتەگيالىق كوممۋنيكاسيالار جۇيەلەرىنە دەيىن ءتۇرلى مەكەمەلەردىڭ ىشكى اقپاراتتارى مەملەكەتتىك قۇپياعا جاتادى. وزگە ەل ازاماتىنىڭ ولاردى وڭاي ءبىلىپ وتىرۋعا مۇمكىندىگى بار. بۇل ۇلتتىق قاۋىپسىزدىككە تونگەن ءقاۋىپ بولماعاندا نە؟
ارينە، گولوۆاتيۋكتىڭ رەسەي ازاماتتىعى جونىندە سول ەلدىڭ ءتيىستى مەكەمەلەرىنە سۇراۋ سالىپ كورۋگە بولادى. ءبىراق، ولاردىڭ راستاي قويۋى كۇماندى. بۇكىل الەمدە ارنايى قىزمەتتەر ءوز ادامدارىن ساتپايدى. ءبىراق ءبىزدىڭ ارنايى قىزمەتتەر دە وسال ەمەس، قاجەت بولعاندا نە نارسەنى دە انىقتاۋعا قابىلەتتى.
"قامشى" پورتالى ءتىلشىسى پوشتاداعى ماتەريالدى تەكسەرۋ بارىسىندا گولوۆاتيۋك ءۆلاديميردىڭ گەورگيي لەنتاسىن تاعىپ تۇسكەن سۋرەتىن كەزىكتىردى. ەسكە سالساق، قازاقستاندا شەنەۋنىكتەر اتالعان لەنتانى تاقپايدى. بۇل لەنتا قوعامدا رەسەيلىك سەرپاراتيزم سيمۆولى رەتىندە تانىلعان.
