اقتاۋدا تاۋەلسىز كاسىپوداق كونفەدەراسياسىن تىركەۋدى تالاپ ەتكەن اشتىق اكسياسى ءماجبۇرلى تۇردە توقتاعان. اكىمشىلىك سوت 15 ادامدى قازاقستان اكىمشىلىك قۇقىق بۇزۋ كودەكسىنىڭ 488-بابىن (زاڭسىز شەرۋ، ميتينگى، پيكەت وتكىزۋ) بۇزعانى ءۇشىن ايىپتى دەپ تانىپ، ازاماتتارعا 50 ايلىق ەسەپتىك كورسەتكىشكە دەيىنگى ايىپپۇل سالعان. بۇل تۋرالى ازاتتىق جازدى.

جۇما كۇنى اقتاۋدا «تاۋەلسىز كاسىپوداقتار كونفەدەراسياسى تاراتىلماسىن» دەگەن تالاپپەن اشتىق جاريالاعان مۇنايشىلارعا قاتىستى سوت ۇكىمى شىقتى. ولاردىڭ 2 اپتا بويى ءنار تاتپاي نارازىلىق تانىتۋىن №2 اقتاۋ قالالىق سوتى زاڭسىز دەپ تانىدى.

سونداي-اق، قۇجاتتا: «Oil Construction Company» سەرىكتەستىگىنە قاراستى جۇمىسشىلار مەن كاسىپوداق باسشىلارى كاسىپورىننىڭ عيماراتى مەن اۋماعىن بوساتۋى ءتيىس»، دەلىنگەن.

اقتاۋدا قازاقستان تاۋەلسىز كاسىپوداقتار كونفەدەراسياسىن تىركەۋ تۋرالى تالاپپەن Oil Construction Company (OCC) كومپانياسى كاسىپوداق كەڭسەسىندە ەكى اپتادان استام ۋاقىت جالعاسىپ جاتقان جاپپاي اشتىق اكسياسى سەنبى كۇنى ءتۇس شاماسىندا پوليسيا تالابى بويىنشا توقتاتىلعان.

كەڭسەدەن شىققان جۇمىسشىلاردى ەسىك الدىندا توسىپ تۇرعان پوليسيا قىزمەتكەرلەرى تىزىمگە الىپ، قولدارىنا اقتاۋ ىشكى ىستەر باسقارماسىنا شاقىرتىلاتىنى تۋرالى قاعاز تاپسىردى.

بىرنەشە كۇن بويى تاماق ىشۋدەن باس تارتىپ، قالجىراعان مۇنايشىلاردىڭ كەيبىرىنە پوليسيا اكىمشىلىك ءىس قوزعاپ، سەنبى كۇنى كەشكە ولاردىڭ ءىسىن ماڭعىستاۋ وبلىستىق اۋدانارالىق اكىمشىلىك سوتى قارادى. سوتقا جۋرناليستەر قاتىستىرىلماعان.

سونداي-اق، استانانىڭ الماتى اۋداندىق سوتى قاڭتاردىڭ 21ء-ى كۇنى ماڭعىستاۋ وبلىسىندا ەكى اپتادان استام ۋاقىت اشتىق جاريالاپ كەلگەن جۇزدەگەن مۇنايشىلارعا جەتەكشىلىك ەتكەن Oil Construction Company كومپانياسى كاسىپوداعى ليدەرى ءامين ەلەۋسىنوۆ پەن كاسىپوداق ەڭبەك ينسپەكتورى نۇربەك قوشاقبايەۆتى ەكى ايعا تۇتقىنداۋعا سانكسيا بەردى. ول ەكەۋى سونىڭ الدىندا استانادان اقتاۋعا جەتكىزىلىپ، قىلمىستىق ايىپتار تاعىلعان.

قاڭتاردىڭ 4ء-ى كۇنى وڭتۇستىك قازاقستان وبلىستىق اۋدانارالىق ەكونوميكالىق سوتى كەڭسەسى شىمكەنت قالاسىندا ورنالاسقان كونفەدەراسيا "زاڭمەن بەلگىلەنگەن مەرزىمدە جەرگىلىكتى فيليالدارىن تىركەۋدەن وتكىزبەگەنى" ءۇشىن جابىلاتىنى تۋرالى شەشىمىن جاريالاعان بولاتىن.

ايتا كەتسەك، تاۋەلسىز كاسىپوداقتىڭ تىركەلمەۋى 2014 جىلعى كاسىپوداقتار تۋرالى زاڭعا تىكەلەي بايلانىستى. قازاقستاندا بۇعان دەيىن ەكى ءتۇرلى كاسىپوداق ۇيىمى (ناقتىراق ايتقاندا كونفەدەراسياسى) بولعان. ولاردىڭ ءبىرى "قازاقستان كاسىپوداقتار كونفەدەراسياسى" دە ەكىنشىسى وسى مۇنايشىلار جاقتاپ وتىرعان "قازاقستاننىڭ تاۋەلسىز كاسىپوداقتار كونفەدەراسياسى". سوڭعىسىنىڭ رەسپۋبليكادا 40 شاقتى بولىمشەلەرى بار ەدى. ءبىراق زاڭ بويىنشا 6 ايدىڭ ىشىندە تىركەلمەسە ولاردى كونفەدەراسيا قۇرامىنا قوسپايدى. سوندىقتان 6 ايدا تەك 20 شاقتىسى عانا تىركەلگەن.