ديماش قۇدايبەرگەنوۆ قىتايدىڭ I am a singer (مەن ءانشىمىن) تەلەبايقاۋىنا قاتىسىپ، سايىستىڭ ءبىرىنشى كۇنىندە قازىلار القاسى تاراپىنان ەڭ جوعارعى ۇپاي جيناپ، جەڭىمپاز اتاندى.

ديماش قۇدايبەرگەنوۆ ۇيىمداستىرۋشىلار تاراپى ۇسىنعان «SOS d'un terrien en détresse» فرانسۋز ءانىن شىرقادى. سايىس ەرەجەسى بويىنشا ءبىرىنشى كۇنى 8 ءانشىنىڭ بىرەۋى كەتىپ، 7-ەۋى قالادى. ءبىر ءانشى جەڭىس كۋبوگىن جەڭىپ الادى. جەڭىس كۋبوگىنا جەتى ءانشىنى ارتتا قالدىرىپ، ديماش قۇدايبەرگەنوۆ لايىق دەپ تانىلدى. ديماش قۇدايبەرگەنوۆتىڭ مەنەدجەرى الپامىس ءشارىموۆتىڭ مالىمدەۋىنشە، بۇگىننەن باستاپ ءبىر توپ قىتايلىق فانات ءانشىنىڭ انا ءتىلىن ءتۇسىنۋ ءۇشىن قازاق ءتىلى كۋرسىنا جازىلعان. ال، قىتايلىق ميكروبلوگ Sina Weibo  الەۋمەتتىك جەلىسىندە جازىلۋشىلارىنىڭ سانى 35 مىڭنان ءبىر ساعاتتا 118 مىڭعا جەتكەن.

بايقاۋدىڭ ەكىنشى كەزەڭى كەلەسى سەنبى كۇنى وتەدى.

10 قاڭتار كۇنى ديماش جۇڭگو كورەرمەنىنىڭ الدىنا العاش رەت شىققان سوڭ، جاس ءانشى تۋرالى جۇڭگو ءباسپاسوزى جازا باستاعان. ءتىپتى كەيبىر باسىلىم ونى «ديماش – ءتاڭىر ءوزى نازارىنا العان جاس ءانشى» دەپ باعالاعان.  

ال، قىتايدىڭ جاڭالىق پورتالدارى مەن ەنسيكلوپەديالىق سايتتارىندا ديماش قۇدايبەرگەننىڭ ءومىربايانى تولىققاندى جاريالانعان. 

قىتايلار ءتىپتى ديماشتىڭ كيىم ۇلگىسىندەگى كيىمدەردى ساتىلىمعا شىعارىپ ۇلگەرگەن.

ايتا كەتەر بولساق، اتالعان مۋزىكالىق بايقاۋ قىتايدىڭ چانشا قالاسىندا ءوتىپ جاتىر. ءانشىنىڭ مەنەدجەرىنىڭ ايتۋىنشا، ديماش قۇدايبەرگەنوۆ وسى بايقاۋعا قاتىساتىندىقتان، ءتىپتى ءيميدجىن دە وزگەرتكەن. مەنەدجەردىڭ سوزىنشە بۇل «جۇڭگو داۋىسى» جوباسىنان دا ۇلكەن جوبا.  اتالعان جوبانى قىتايدىڭ ەڭ ءىرى Hunan TV تەلەارناسى كورسەتەدى.

ەسكە سالايىق، ديماش قۇدايبەرگەنوۆ ۆيتەبسكتە وتكەن "سلاۆيان بازارى-2015" حالىقارالىق بايقاۋىندا جەڭىمپاز اتانعان ەدى. ول، سونىمەن قاتار، "شىعىس بازارى" جانە "مەيكين ازيا" بايقاۋلارىنىڭ گران-پري يەگەرى.