ايتىستا اقپا، جازبادا شاقپا بولعان بەلگىلى اقىن، ايتىسكەر ەسەنقۇل جاقىپبەكوۆتىڭ قۇرمەتىنە ارنايى بايقاۋ جاريالاندى. دوداعا 15-35 جاس ارالىعىنداعى ۇمىتكەرلەر قاتىسا الادى.

جارىس شارتتارىنا سايكەس، قاتىسۋشى ەسەنقۇل جاقىپبەكوۆتىڭ سوزىنە جازىلعان ءبىر ءاندى جانە ءوز قالاۋى بويىنشا تاعى ءبىر ءان ورىنداۋى كەرەك. باس جۇلدە – 500 مىڭ، ءى ورىن – 300 مىڭ، ءىى ورىن – 150 مىڭ، ءىىى ورىن – 100 مىڭ تەڭگە. سونداي-اق، ەسەنقۇل جاقىپبەكوۆتىڭ سوزىنە جازىلعان «جاڭا ءان» نوميناسياسىنا ارنايى جۇلدە 100 مىڭ تەڭگە تىگىلگەن.

بايقاۋعا قاتىسۋشىلار 20 اقپانعا دەيىن وتىنىشتەرىن قالدىرۋى ءتيىس. دودا 23 اقپان كۇنى وتەدى. ال كەلەسى كۇنى جەڭىمپازداردى ماراپاتتاۋ ءراسىمى، سونىمەن قاتار گالا-كونسەرت ۇيىمداستىرىلادى. قاراساي اۋداندىق مادەنيەت ءۇيىنىڭ ادىسكەرى گاۋھار كوكەبايەۆانىڭ مالىمەتىنشە، جارىسقا قاراساي اۋدانىنىڭ اكىمدىگى ۇيىتقى بولۋدا. دودا تۇڭعىش رەت رەسپۋبليكالىق دەڭگەيدە ۇيىمداستىرىلىپ وتىر.