بۇگىندە ميللياردتاعان قىتايلاردى تاڭعالدىرعان ەرەكشە داۋىس يەسى ديماش قۇدايبەرگەنوۆتى الەمنىڭ ءار قيىرانان شەتەلدىك باسپاسوزدەر جارىسا جازىپ جاتىر. ديماشقا «قازاقستاندىق ۆيتاس» دەپ باعا بەرگەن قىتايلار، ءتىپتى، قازاق ءتىلىن ۇيرەنۋگە نيەت ءبىلدىرىپ وتىر. كەيبىر باسىلىم ونى «ديماش – ءتاڭىر ءوزى نازارىنا العان جاس ءانشى» دەپ تامسانعان.
قازاقستاننىڭ تۋىن بيىككە كوتەرگەن ازاماتىمىز بىرنەشە اقىننىڭ جىرىنا ارقاۋ بولىپ جاتىر. سولاردىڭ ءبىرى بەلگىلى اقىن امانجول ءالتاي ديماشقا اقجولتاي ولەڭىن ارنادى.
قازاقتىڭ ءور نامىسىن بايراق ەتىپ،
تامىلجىت. جەزتاڭدايىم سايرا جەتىك.
ەكى ميلليارد قىتايدىڭ ەسىن السىن،
داۋىسىڭ قارا جەردەن ايعا جەتىپ.
قالىقتا سۇڭقار ءىنىم، بابىڭداسىڭ،
جۇلدەنى جۇلىپ الار شاعىڭداسىڭ.
الاشىم تۇمار تاعىپ قوسقان تۇلپار،
قۇرلىقتى شاڭعا كومىپ ارىنداسىن.
تەكتى ۇرپاق دانا ساق پەن عۇننان قالعان،
قورعاندى انمەن اشتىڭ قۇمنان سالعان.
قۇدىرەتتى ۇنىڭنەن ايباتتانسىن،
شۇرشىتتەن ۇرەيلەنىپ تۇرعان جالعان.
وزىڭە سەنىم ارتتىق كوكەم بۇگىن،
كوك تۋدى كوككە بيىك كوتەر بۇگىن.
دالەلدە ونەرىڭمەن، بايتاق جەردىڭ،
يەسى قايسار قازاق ەكەندىگىن!
