قىرعىز پرەزيدەنتى المازبەك اتامبايەۆ "اكىمشىلىك جاۋاپكەرشىلىك تۋرالى كودەكسكە تۇزەتۋلەر ەنگىزۋ" تۋرالى زاڭعا قول قويدى. قۇجات قوعامدىق ورىنداردا ىشىمدىك ىشكەن، بىلاپىت ءسوز قولدانعانداردى اكىمشىلىك جازاعا تارتۋدى قاراستىرادى. ورتالىق ازيا جاڭالىقتار قىزمەتىنىڭ جازۋىنشا، بۇل تۋرالى پرەزيدەنتتىڭ باسپا ءسوز قىزمەتى حابارلادى.

رەسمي اقپارات بويىنشا، زاڭنىڭ ماقساتى - قوعامدا ادامگەرشىلىك پەن جاستار تاربيەسىن ارتتىرۋ، قوعامدىق ورىنداردا سپيرتتىك ىشىمدىكتەر مەن ەسىرتكى زاتتارىن پايدالانۋعا جول بەرمەۋ.

حابارلارعا قاراعاندا، قوعامدىق ءتارتىپتى بۇزعاندار 1 مىڭنان 3 مىڭ سومعا دەيىن ايىپپۇل تولەيدى. جاۋاپقا تارتىلعان ازاماتتار ايىپپۇلدى تولەي الماسا، ولاردى سەگىز ساعاتتىق قوعامدىق جۇمىسقا سالادى نەمەسە بەس تاۋلىككە قامايدى.

زاڭ جوباسىندا الكوگولدىك ونىمدەر نەمەسە ەسىرتكى زاتتارىن كامەلەت جاسقا تولماعانداردىڭ قولدانۋ ماسەلەسىنە كوڭىل بولىنگەن. مۇنداي زاڭ بۇزۋشىلىقتار ءۇشىن جاسوسپىرىمدەردىڭ اتا-انالارىنا 2 مىڭنان 3 مىڭ سومعا دەيىن ايىپپۇل سالىنادى.

زاڭدا قوعامعا جات قىلىق جاساعان جاسوسپىرىمدەرگە جازا قاتايتىلعان. مۇنداي بۇزاقىلىق ءۇشىن 5-10 مىڭ سوم ايىپپۇل سالىنادى.