الماتى حالىقارالىق اۋەجايى مەن ەكى تەمىر جول ۆوكزالىنداعى قاۋىپسىزدىك كۇشەيتىلدى. بۇل الماتىدا ۋنيۆەرسيادا ويىندارىنىڭ وتۋىنە بايلانىستى دەپ حابارلادى «حابار 24» ارناسى. الماتىعا جاھاندىق جارىسقا قاتىسۋشىلار قاڭتاردىڭ 16-نان كەلە باستادى. قوناقتاردى قارسى الىپ، ولاردىڭ جۇكتەرىن باقىلاۋدان وتكىزگەنگە دەيىنگى قاۋىپسىزدىكتى تاۋلىگىنە 800-دەي بەينەكامەرا جانە 200-دەن استام ءتارتىپ ساقشىسى قاداعالايدى.

قۇقىق قورعاۋشىلار قاجەتتى تەحنيكا جانە كولىكپەن قامتاماسىز ەتىلگەن. وعان قوسا، اۆستريا مەن الماتىدا ۇيرەتىلگەن 12 ءيىسشىل يت تە بار. كينولوگتاردىڭ ايتۋىنشا، ۇيرەتىلگەن توبەتتەر جارىلعىش زاتتىڭ جەتى، ال ەسىرتكىنىڭ بەس ءتۇرىن انىقتاي الادى.

سونداي-اق، قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى اسقار مامين ۋنيۆەرسيادا نىساندارىنىڭ جاھاندىق جارىسقا دايىندىعىن پىسىقتادى. كەشەندى ارالاپ، قاۋىپسىزدىك جۇمىسىن سارالاعان ۇكىمەت باسشىسىنىڭ ءبىرىنشى ورىنباسارى حالىقارالىق جارىستا ءتارتىپ ساقشىلارى مەن قاۋىپسىزدىك قىزمەتىنىڭ وزگە دە وكىلدەرىنە ۇلكەن جاۋاپكەرشىلىك جۇكتەلەتىنىن ەسكەرتتى. ۋنيۆەرسيادا ويىندارىندا قاۋىپسىزدىك ماسەلەسى ەرەكشە نازارعا الىنعان. بارلىق سپورتتىق نىساندا 2 مىڭ بەينەباقىلاۋ كامەرالارى ورناتىلدى. جالپى جارىس وتەتىن كۇندەرى 7700 ءتارتىپ ساقشى ەل تىنىشتىعىن باقىلايدى. سونىمەن بىرگە توتەنشە جاعداي قىزمەتىنەن 660 ادام، ارنايى تەحنيكالار مەن تىكۇشاق جۇمىلدىرىلىپ وتىر. مەيماندار مەن سپورتشىلارعا ىڭعايلى بولۋ ءۇشىن ميگراسيالىق راسىمدەۋ جۇمىستارى دا وڭتايلاندىرىلعان.

ق ر ىشكى ىستەر ءمينيسترىنىڭ ورىنباسارى ەرلان تۇرعۇنبايەۆتىڭ ايتۋىنشا، قالاداعى 400 قوناق ءۇي مەن اتلەتتەر اۋىلىندا كوشى-قون پوليسياسىنىڭ وكىلدەرى جۇمىس ىستەيدى. سول ارقىلى قوناقتار مەن سپورتشىلار عالامتوردى قولدانا وتىرىپ ەلەكتروندى پورتالمەن ۆيزا راسىمدەي الادى. جالپى ۋنيۆەرسيادا نىساندارى 100 پايىز دايىن.