«ءبىلىم، سپورت جانە مادەنيەت – ءدال وسى سالالار الەمگە تۇراقتىلىق پەن دامۋدى قامتاماسىز ەتە الادى»، - دەدى جۋرناليستەر الدىندا سويلەگەن سوزىندە FISU پرەزيدەنتى ولەگ ماتىسين.
كەشە تاڭەرتەڭ 28ء-شى دۇنيەجۇزىلىك قىسقى ۋنيۆەرسياداعا قاتىسۋ ءۇشىن حالىقارالىق ستۋدەنتتىك سپورت فەدەراسياسىنىڭ (FISU) پرەزيدەنتى ولەگ ماتىسين الماتىعا كەلدى. جوعارى لاۋازىمدى سپورت شەنەۋنىگىن اۋەجايدا الماتى قالاسى اكىمىنىڭ ورىنباسارى ارمان قىرىقبايەۆ جانە ۋنيۆەرسيادا-2017 ديرەكسيا باسشىسى نايل نۋروۆ قارسى الدى.
FISU پرەزيدەنتى ۇشىپ كەلگەن رەيس توقتاتىلعاندىقتان، ۇشاق الماتىعا ازداپ كەشىگىپ جەتتى. الايدا ۋنيۆەرسيادا ۇيىمداستىرۋ كوميتەتىنىڭ قوناق قۇرمەتىنە ارناپ دايىنداعان قازاقتىڭ «شاشۋى» ارقاسىندا بۇل جايت بىلىنبەي كەتتى.
ولەگ ماتىسين جارىستار الدىندا وتكىزىلەتىن FISU اتقارۋ كوميتەتىنىڭ قورىتىندى ماجىلىسىنە قاتىسۋ ءۇشىن ۋنيۆەرسيادانىڭ اشىلۋ سالتاناتىنان بۇرىن كەلىپ وتىر. الماتىداعى ۋنيۆەرسياداعا دايىندىق بارىسى جونىندە ءسوز قوزعاعان ماتىسين وسىنداي اۋقىمداعى سپورت جوباسى FISU، ۋنيۆەرسيادا ۇيىمداستىرۋ كوميتەتى، ۇلتتىق ستۋدەنتتىك فەدەراسيالار مەن قالا اكىمشىلىگى اراسىنداعى ءوزارا ارەكەتتەستىكتى ۇيلەسىمدى تۇردە ۇيىمداستىرۋدى قاجەت ەتەتىندىگىن جانە دە ول ءىس جۇزىندە كۇردەلى مىندەت ەكەنىنە توقتالىپ ءوتتى. FISU پرەزيدەنتى ويىندارعا دايىندىق بارىسىندا ءوزى جانە FISU مۇشەلەرى الماتىعا باقىلاۋشى ەمەس، ءبىرتۇتاس جۇمىس كومانداسىنىڭ مۇشەسى رەتىندە كەلىپ وتىرعانىن دا اتاپ ءوتتى.
FISU پرەزيدەنتى ءوز سۇيىكتى ىسىمەن اينالىسىپ، الەمنىڭ ءتۇرلى ۋنيۆەرسيتەتتەرى اتىنان ۋنيۆەرسياداعا قاتىسايىن دەپ وتىرعان سپورتشىلارعا مىقتى دەنساۋلىق تىلەدى. ولەگ ءماتىسيننىڭ پىكىرىنشە، ۋنيۆەرسيادانىڭ باستى مىندەتى – قاتىسۋشىلارعا بىر-بىرىمەن قارىم-قاتىناستان قۋانىش سەزىنىپ، ءوز ەلدەرىنە اۋىزبىرشىلىگى جاراسقان سپورت الەمىنىڭ ءبىر مۇشەسى رەتىندە قايتۋى ءۇشىن جاعداي جاساۋ.
«سپورت – بەيبىتشىلىكتىڭ ەلشىسى»، - دەپ ءسوزىن قورىتىندىلادى FISU پرەزيدەنتى ولەگ ماتىسين.
ولەگ ماتىسين 2015 جىلدىڭ قاراشاسىندا FISU پرەزيدەنتى بولىپ تاعايىندالدى. وسى لاۋازىمعا دەيىن ول FISU ءبىرىنشى ۆيسە-پرەزيدەنتى بولىپ قىزمەت اتقارعان، سونداي-اق، وسىدان الدىن رەسەي ستۋدەنتتىك سپورت وداعىن باسقارعان بولاتىن.
