تۇركىستان قالاسىن تۇركى الەمىنىڭ 2017 جىلعى مادەني استاناسى بولۋىنا وراي قاڭتار ايىنىڭ 23 كۇنى وڭتۇستىك قازاقستان وبلىسى اكىمدىگىندە وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ، تۇركسوي ۇيىمىنىڭ باس حاتشىسى دۇيسەن قاسەيىنوۆ جانە مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتى ديرەكتورىنىڭ مىندەتىن اتقارۋشى الماز نۇرازحاننىڭ «تۇركىستان – تۇركى الەمىنىڭ مادەني استاناسى» اياسىندا وتكىزىلەتىن ءىس-شارالار جوسپارىنا ءۇش جاقتى قول قويۋ ءراسىمى ءوتتى. بۇل تۋرالى «ازىرەت سۇلتان» قورىق-مۋزەيىنىڭ باسپا ءسوز قىزمەتى جازدى.

ايتا كەتسەك، ناۋرىز ايىنان باستاپ تۇركىستان قالاسىندا  اتالعان شارانىڭ سالتاناتتى اشىلۋ ءراسىمى وتەدى.  ۇلىستىڭ ۇلى كۇنى  - ناۋرىز تويى مەرەكەلەنىپ، تۇركىتىلدەس ۇلتتار اراسىنداعى باۋىرلاستىق بايلانىستار مەن دوستىقتى، تۇركىلىك مادەنيەت پەن ونەردى ۇرپاقتان ۇرپاققا جەتكىزىپ، ونى الەمگە تانىتۋ ماقساتىندا  ءتۇرلى ءىس-شارالار ۇيىمداستىرىلادى.

اتالعان جيىن اياقتالعاسىن تۇركسوي ۇيىمىنىڭ باس حاتشىسى دۇيسەن قاسەيىنوۆ جانە مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتى ديرەكتورىنىڭ مىندەتىن اتقارۋشى الماز نۇرازحان، تۇركى الەمىنىڭ مادەني استاناسى – تۇركىستان جەرىنە ات باسىن بۇردى. «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى جاندوس اۋباكىر كەلگەن قوناقتارعا مۋزەي قۇرامىنداعى كونە تاريحي-مادەني ەسكەرتكىشتەر جايلى قىسقاشا بايانداپ، «تۇركىستان – تۇركى الەمىنىڭ مادەني استاناسى» اياسىندا وتكىزىلەتىن ءىس-شارالارعا بەلسەندى تۇردە اتسالىساتىنىن جەتكىزدى.