«Astana Arlans» كلۋبىنان شي شىقتى. ونەر جاناشىرى ەرلان تولەۋتاي ماڭداي تەرىنىڭ اقىسىن الا الماي جۇرگەن كلۋب بوكسشىلارىنىڭ سوتقا جۇگىنىپ جاتقانىن ايتىپ دابىل قاقتى.
«ارداقتى اعايىن! قازاق بوكسى، جالپى قازاق سپورتى بەلشەسىنەن بىلىققا ابدەن باتقان. ول دەرت - كوررۋپسيا! ءبىر عانا مىسال ايتايىن، 2015 جىلى "استانا ارلانس" كلۋبى الەمنىڭ بارلىق كومانداسىن قيراتا جەڭىپ، الەم چەمپيونى دەگەن ابىرويلى اتاقتى جەڭىپ العان بولاتىن. بۇل جولى ايبا باس جۇلدەگە 400 000 دوللار سىياقى تىككەن ەدى. وبالى نەشىك، ايبا ۋادەسىندە تۇرىپ، ول قارجىنى ياعني 400 000 دوللاردى "سامۇرىق قازىنا" ءال - اۋقات قورىنىڭ ەسەپ شوتىنا اۋدارعان. بۇل قارجى اتالمىش قوردىڭ قامقورلىعىنا الىنعان "استانا"سپورت كلۋبىنىڭ ەسەپ شوتىنا تۇسكەن. "استانا ارلانس" كلۋبى بوكسشىلارىنىڭ تابان اقى، ماڭداي تەرلەرى - بۇل اقشانى سودان بەرى ەشكىم كورمەگەن. سونىڭ كەسىرىنەن بىلتىرعى ماۋسىمدى باپسىز باستاعان "استانا ارلانس" كلۋبى بۇكىل الەمدىك بوكس سەرياسى بويىنشا قولا جۇلدەگە عانا قول جەتكىزدى. ( اقشاسىن بەرمەي قويسا، كىم بوكستاسسىن؟) زىلدەر اۋىر سوققىلارعا تۇمسىقتارىن توسەپ ءجۇرىپ تاپقان اقشالارىن الا الماعان "استانا ارلانس" بوكسشىلارىنىڭ اشپاعان ەسىگى، توزدىرماعان تابالدىرىعى قالماعان. ءتىپتى ەلباسىنا حات تا جازعان! ەلىمىزدىڭ اتىن الەمدىك سپورت ارەناسىندا سان مارتە دۇركىرەتىپ شىعارعان اتاقتى "استانا ارلانس" سپورت كلۋبىنىڭ جەڭىپ العان جۇلدەسىن بەرمەي قويۋ، نە دەگەن ماسقارا. بۇل ەندى شەكتەن شىققاندىق ەمەس پە؟! بۇنداي قارجىلىق ماحيناسيالاردى كورمەي، فينپول قايدا قاراپ وتىر. ۇلتتىق قاۋىپسىزدىك كوميتەتى ۇلت سپورتىنا جەمقورلار تاراپىنان ءقاۋىپ تونگەندە نەگە ىسكە ارالاسپاۋدا!
جۋرناليستەر، قازاق بوكسىن اۋىزدارىڭنىڭ سۋى قۇرىپ ماقتاي بەرگەنشە، وسىنداي ماسقارالاردى نەگە جازبايسىڭدار؟ نەگە جۋرناليستىك زەرتتەۋ جۇرگىزبەيسىڭدەر؟ الەمگە قازاقتىڭ اتىن شىعارىپ كەلگەن سپورت - ول وسى بوكس ەدى، سول سپورتتىڭ بولات بىلەك وعلاندارى ەدى عوي. ەندى سول بوكستى مىنانداي ىندەت جايلاۋدا! بۇل كەسەلمەن بارلىعىمىز بىرىگىپ كۇرەسەيىك. جەمقورلاردىڭ ۋلى تىرناعىنان قازاق سپورتىن قۇتقارايىق! ولاردىڭ ناجىسكە تولى ساسىق جەمساۋلارىنا جۇتىلىپ جاتقان بوكسشى جىگىتتەرىمىزدىڭ اق ادال ەڭبەگىن ەل - جۇرت بولىپ الىپ بەرەيىك! ءقازىر وسىناۋ جەمقورلىق ىسكە بايلانىستى سوت پروسەسى باستالدى. ەلىمىزدەگى ب ا ق قۇرالدارى، جۋرناليستەر استانادا باستالعان سوت پروسەسىن قاداعالاۋعا، كوپشىلىككە جەتكىزۋگە، سوتتىڭ ءادىل ۇكىم شىعارۋىنا ىقپال ەتۋگە شاقىرامىن! ءۇن قوسىڭىزدار اعايىن!»، - دەپ جازدى ەرلان تولەۋتاي.
Sport.kz سايتى جازۋىنشا دا، بوكسشىلاردىڭ شاعىم ءتۇسىرۋىنىڭ سەبەبى – الەمدىك دەڭگەيدە بەسىنشى رەت وتكەن WSB بوكسىندا «Astana Arlans-قا» AIBA $400 000 كولەمىندە سىياقى بولگەن، الايدا بۇل قاراجات جاتتىقتىرۋشىلار مەن سپورتشىلاردىڭ قولىنا تيمەگەن. ماسەلەنى تىڭعىلىقتى شەشۋ ءۇشىن چەمپيوندار سوتقا جۇگىنگەن ەكەن.
ىسكە قاتىستى شاعىم تۇسىرگەندەردىڭ سانى 24، ولاردىڭ قاتارىندا ەرىك ءالجانوۆ، سامات باشەنوۆ، بەيبىت ەسجانوۆ، ماردان بەرىكبايەۆ، جومارت ەرجان، مۇحامەدجان ەركىن، قايرات ەرالييەۆ، ميراس جاقىپوۆ، نۇرداۋلەت جارمانوۆ، ەرجان مۇسافيروۆ، زاكىر سەيفۋللين جانە مەيىربولات تويتوۆ بار. سىياقىنى Astana Arlans-قا قايتارۋمەن قاتار سپورتشىلار ءاربىر شاعىم تۇسىرۋشىلەرگە 200 000 تەڭگە مورالدىق تولەم تالاپ ەتىپ وتىر.
