سيريالىق رەتتەۋ جونىندەگى حالىقارالىق كەزدەسۋدىڭ (استانا پروسەسى) قورىتىندىسىنا ارنالعان ءۇشجاقتى نەگىزگى قۇجاتتىڭ مازمۇنى بويىنشا كەپىلگەر ەلدەر ورتاق تۇسىنىستىككە قول جەتكىزۋدە. 

بۇل جايىندا قازاقپارات كەلىسسوزدەردى ۇيىمداستىرۋعا قاتىسى بار سەنىمدى دەرەككوزگە سىلتەمە جاساپ حابارلايدى.

«كەپىلگەر ەلدەر استاناداعى كەزدەسۋدىڭ قورىتىندىسى بويىنشا نەگىزگى ءۇشجاقتى قۇجاتتىڭ مازمۇنى تۋرالى تۇسىنىستىككە قول جەتكىزۋدە. باستى نازاردا سوعىستى توقتاتۋ رەجىمىن بەكىتۋ. كەلىسسوزدەر پروسەسىنە سيريا ۇكىمەتى مەن وپپوزيسياسىنىڭ وكىلدەرى بەلسەندى ارالاسۋدا. تولىقتاي العاندا احۋال - كونسترۋكتيۆتى»، - دەپ اتاپ ءوتتى ول.

ەلورداداعى «ريكسوس» قوناق ۇيىندە ءوتىپ جاتقان سيريا جانجالىن رەتتەۋ جونىندەگى حالىقارالىق كەزدەسۋگە سيريانىڭ ۇكىمەتتىك دەلەگاسياسىنان بۇۇ جانىنداعى وسى ەلدىڭ تۇراقتى وكىلى باسار ال-دجافاري، شامامەن 15 وپپوزيسيالىق توپتىڭ وكىلى، رف پرەزيدەنتىنىڭ سيريالىق رەتتەۋ ماسەلەلەرى جونىندەگى ارناۋلى وكىلى الەكساندر لاۆرەنتيەۆ، تۇركيا  سىرتقى ىستەر ءمينيسترنىڭ ورىنباسارى سەدات ونال يران يسلام رەسپۋبليكاسى سىرتقى ىستەر ءمينيسترىنىڭ ورىنباسارى سادەك حۋسەين دجابەري انساري، بۇۇ باس حاتشىسىنىڭ سيريا جونىندەگى ارناۋلى وكىلى ستاففان دە ميستۋرا مەن قازاقستانداعى اقش ەلشىسى دجورد كرول قاتىسۋدا.

ايتا كەتەيىك، كەلىسسوزگە قاتىسۋشى تاراپتار ساعات 14.00-دە استانا پروسەسىنىڭ ناتيجەلەرىن جاريا ەتۋ ءۇشىن قورىتىندى باسپا ءسوز ءماسليحاتىنا شىعادى دەپ كۇتىلۋدە. كەلىسسوزدەرگە قاتىسۋشىلاردى قابىلداۋشى تاراپ بارلىق دەلەگاسيا وكىلدەرىنە باسپا ءسوز ءماسليحاتىن وتكىزەتىن ارنايى زال دايىنداپ قويعان. ق ر سىرتقى ىستەر مينيسترلىگى وكىلى ب ا ق الدىنا كىمنىڭ شىعاتىندىعىن ءدوپ باسىپ ايتا الار ەمەس. دەگەنمەن، بۇۇ باس حاتشىسىنىڭ سيريا جونىندەگى ارناۋلى ەلشىسى ستاففان دە ميستۋرانىڭ جۋرناليستەرگە بريفينگ وتكىزۋ مۇمكىنشىلىگى جوعارى بولىپ تۇر.