استانادا سيرياداعى جاعدايدى رەتتەۋگە بايلانىستى كەلىسسوز جۇرگىزۋ پروسەسى اياقتالدى، - دەپ حابارلايدى Tengrinews.kz ءتىلشىسى.

استانادا 23 قاڭتار كۇنى باستالعان سيريالىق كەلىسسوزدەر 24 قاڭتاردا تۇستەن كەيىن اياقتالدى. قورىتىندى قۇجاتتاردىڭ ءماتىنىن قازاقستاننىڭ سىرتقى ىستەر مينيسترلىگى قايرات ابدراحمانوۆ وقىدى.

سيريا وپپوزيسياسىنىڭ وكىلدەرى رەسەي، تۇركيا تاراپتارى مەن بۇۇ ارنايى ەلشىسىنىڭ قاتىسۋىمەن وتكەن كەلىسسوزدەردى ناتيجەلى دەپ اتادى. تاراپتار الەمدەگى اتىس-شابىستى توقتاتۋ ماسەلەلەرىن تالقىلادى. سونداي-اق، گۋمانيتارلىق جاعداي مەن تۇتقىنداردى بوساتۋ جايلى ايتىلدى.

سونداي-اق، كەشە كەلىسسوزدەر بارىسىندا قازاقستاننىڭ ءسىم ۆيسە-مينيسترى رومان ۆاسيلەنكو باستاپقىدا كەلىسسوزدەرگە قاتىسۋشىلاردىڭ بارلىعىنىڭ ءبىر ۇستەل باسىندا اڭگىمەلەسكەنىن، ءبىراق كەيىننەن ولاردىڭ كەلىسسوزدەر بولمەسىنە كەتىپ قالعاندارىن ايتقان بولاتىن.

"ءاربىر دەلەگاسيا ءۇشىن ارنايى كەلىسسوز بولمەسى بار: ساناپ كورىڭىزدەرشى، ءۇش دەمەۋشى مەملەكەت، بۇۇ، ۇكىمەت جانە وپپوزيسيا"، - دەدى رومان ۆاسيلەنكو.

ەسكە سالا كەتەيىك، كەشە، 23 قاڭتاردا استانادا سيرياداعى جاعدايدى رەتتەۋگە قاتىستى كەلىسسوزدەر باستالعان بولاتىن. كەلىسسوزدەر ەلورداداعى Rixos President Astana مەيمانحاناسىندا جابىق تارتىپتە ءوتىپ جاتىر. سونداي-اق، كەشە مەملەكەت باسشىسى بۇۇ باس حاتشىسىنىڭ سيريا بويىنشا ارناۋلى ەلشىسى ستاففان دە ميستۋرامەن كەزدەسكەن بولاتىن. نۇرسۇلتان نازاربايەۆ سيريا ماسەلەسى بۇگىندە تاياۋ شىعىستى عانا ەمەس، بۇكىل الەمدىك قاۋىمداستىقتى الاڭداتىپ وتىرعانىن اتاپ وتكەن ەدى.