2017 جىلدىڭ 25 قاڭتارىندا استانا قالاسىندا 2017 جىلعى 28ء-شى دۇنيەجۇزىلىك قىسقى ۋنيۆەرسيادانىڭ العاشقى الاۋى تۇتاتىلادى. ودان كەيىنگى بەس كۇن بويى رەسپۋبليكامىزدىڭ  ءاربىر وبلىس ورتالىعىندا الاۋدى تۇتاتۋعا ارنالعان ءوز سالتاناتى وتەدى.

ەلورداداعى ەستافەتا ەكى كەزەڭگە بولىنگەن. الاۋ كوتەرۋشىلەر 3،5 ساعاتتا قالانىڭ ورتالىق كوشەلەرى بويىمەن جۇگىرىپ وتەدى. ءبىرىنشى كەزەڭ «نازاربايەۆ ۋنيۆەرسيتەتىنەن» باستالىپ، «بايتەرەك» مونۋمەنتىنە دەيىنگى اۋماقتى قامتيدى. ەكىنشى كەزەڭ «بايتەرەك» مونۋمەنتىنەن باستالىپ، وڭ جاق جاعالاۋداعى قالا اكىمدىگىندە ءوز مارەسىنە جەتەدى. ەستافەتانىڭ جالپى ۇزاقتىعى 12 شاقىرىمدى قۇراماق. الاۋدى بارلىعى 60 ادام كوتەرەدى، ولاردىڭ اراسىندا بەلگىلى سپورتشىلار جانە استانانىڭ قوعامدىق قايراتكەرلەرى بار.

الاۋ كوتەرۋشى قۇرمەتىنە يە بولعان تۇلعالاردىڭ ءبىرى – بوكستان قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، 2013 جىلعى الەم چەمپيونى، 2014 جىلعى ازيا ويىندارىنىڭ چەمپيونى، 2015 جىلعى الەم چەمپيوناتىنىڭ كۇمىس جۇلدەگەرى، ريو-دە-جانەيروداعى 31ء-شى جازعى وليمپيادا ويىندارىنىڭ چەمپيونى دانيار ەلەۋسىنوۆ.

سونداي-اق، بوكستان قازاقستان رەسپۋبليكاسىنىڭ سپورت شەبەرى، 2009 جىلعى ازيا چەمپيونى، «استانا ارلاندارى» قۇرامىندا 2015 جىلعى كلۋبتار اراسىنداعى الەم چەمپيونى،  ريو-دە-جانەيروداعى 31ء-شى جازعى وليمپيادا ويىندارىنىڭ كۇمىس جۇلدەگەرى ۆاسيليي ليەۆيت ەلوردا كوشەلەرى بويىمەن ەستافەتا الاۋىن كوتەرىپ وتەدى.

سونىمەن قاتار، گىر كوتەرۋ سپورتىنىڭ شەبەرى، 2014 جىلعى الەم كۋبوگى كەزەڭىنىڭ كۇمىس جۇلدەگەرى، 2013 جىلعى الەم چەمپيوناتىنىڭ قولا جۇلدەگەرى، 2012 جىلعى جاسوسپىرىمدەر اراسىنداعى ەۋروپا چەمپيونى، 2010-2014 جىلدار ارالىعىنداعى قر-نىڭ بەس دۇركىن چەمپيونى، 2015 جىلعى الەم چەمپيوناتىنىڭ كۇمىس جۇلدەگەرى الىبەك ناۋرىزباي ۇلى الاۋ كوتەرۋشى قۇرمەتىنە يە بولدى.

2016 جىلعى ابۋ-دابيدەگى دجيۋ-دجيتسۋدان الەم چەمپيونى، «Arlan Grip Selection» حالىقارالىق جارىسىنىڭ چەمپيونى، قر-نىڭ برازيليالىق دجيۋ-دجيتسۋدان چەمپيونى ءمولدىر مەكەنبايەۆا دا 25 قاڭتاردا الاۋ ەستافەتاسىنا قاتىسپاق. ءقازىر بىرنەشە سپورت تۇرلەرىمەن بەلسەندى تۇردە شۇعىلدانىپ جۇرگەن  ءمولدىر قر-نىڭ نە-ۆازادان چەمپيونى (دجيۋ-دجيۋتسۋدىڭ ءبىر سالاسى، وندا باستى كوڭىل قارسىلاستى جەردە كۇرەسۋگە تارتۋعا بولىنەدى)، استانا قالاسىنىڭ نە-ۆازادان چەمپيونى، گرەپپلينگ بويىنشا ءتۇرلى جارىستاردىڭ چەمپيونى جانە جۇلدەگەرى بولىپ تابىلادى.

28ء-شى دۇنيەجۇزىلىك قىسقى ۋنيۆەرسيادانىڭ الاۋ ەستافەتاسىنا سپورتشىلارمەن قاتار، قوعامدىق قايراتكەرلەر، ءبىلىم سالاسىنىڭ بەلسەندى ۇزدىكتەرى قاتىسادى. ولاردىڭ قاتارىندا شاحماتتان 18 جاسقا دەيىنگى الەم چەمپيونى، ايەلدەر اراسىنداعى ورتالىق جانە ورتا ازيا چەمپيونى، 12 جاسقا دەيىنگى جانە 15 جاسقا دەيىنگى الەم ۆيسە-چەمپيونى، قر-نىڭ بىرنەشە دۇركىن جانە ابسوليۋتتىك چەمپيونى، بەلگىلى قازاقستاندىق شاحماتشى دينارا ءسادۋاقاسوۆا دا بار.

قازاقستاندىق حوككەيشى، قحل-دا ويىن كورسەتەتىن استانا «بارىسىنىڭ» قورعاۋشىسى، 2015 جىلعى الەم چەمپيونى، 2012-2014 جىلدار ارالىعىنداعى چەمپيوناتتاردىڭ جۇلدەگەرى ءماديار ىبىرايىمبەكوۆ الاۋدى ەلوردادان ۋنيۆەرسيادانىڭ اشىلۋ سالتاناتىنا دەيىن جەتكىزەتىن الاۋ كوتەرۋشى رەتىندە تاڭداپ الىندى. 

جالپى العاندا ۋنيۆەرسيادا الاۋى 22 500-دەن استام شاقىرىمعا سوزىلعان جولدى ءوتىپ، ونىڭ 200 شاقىرىمىن الاۋ كوتەرۋشىلەر جۇگىرىپ وتپەك. ۇيىمداستىرۋشىلار جوبانى 16 دەربەس بولىككە ءبولىپ، ءار وبلىسقا ءىس-شارانى وزدەرىنە بەيىمدەۋگە مۇمكىندىك بەردى. وسىلايشا الاۋ ەستافەتاسى ۋنيۆەرسيادا گەوگرافياسىن ءبىر قالادان تۇتاستاي بۇكىل ەل اۋقىمىنا دەيىن كەڭەيتپەك.