نازىك جان ويعا العان ءىسىن جۇزەگە اسىرۋ ءۇشىن «جۇمىسپەن قامتۋ جول كارتاسى-2020» باعدارلاماسىن پايدالاندى دەپ حابارلايدى palata.kz.
جاس ءارى سۇلۋ ارۋدىڭ سيىرقورادا جۇرگەنىنە العاشقىدا كوزىمىز ۇيرەنبەدى. ال 20 جاستاعى سايا اقانوۆانىڭ مۇلدە بوس ۋاقىتى جوق، سوندىقتان ول سۇحباتتى وگىزدەرىن جەمدەي ءجۇرىپ بەردى.
كۇرشىم اۋىلىنىڭ تۇرعىنى كوللەدجدى بىتىرە سالىسىمەن، مال شارۋاشىلىعىمەن اينالىسۋ تۋرالى شەشىم قابىلداپتى. وقۋدى جاڭا بىتىرگەن تەحنيك-بايلانىسشىعا تۋعان جەرىندە جۇمىس تابىلا قويماعان، الايدا وعان كاسىپكەرلەر پالاتاسى دەر كەزىندە كومەك بەردى.
ول جاقتاعىلار قىزدىڭ اۋىلدا بيزنەس باستاۋ تۋرالى يدەياسىنا قولداۋ كورسەتىپ، وتباسىلىق مال بورداقىلايتىن الاڭ اشۋعا قاجەتتى قۇجاتتار جيناۋعا كومەكتەستى، بيزنەس-جوسپار قۇرۋعا ءبىر كىسىدەي اتسالىستى. «جۇمىسپەن قامتۋدىڭ جول كارتاسى-2020» باعدارلاماسى اياسىندا اۋىل شارۋاشىلىعىن قارجىلاي قولداۋ قورىنان نەسيە الۋ ءۇشىن قۇجاتتار وتكىزىلدى، وتكەن جىلدىڭ قاراشا ايىندا نەسيە بەرىلىپ، جوبا ىسكە اسىرىلا باستادى.
سايانىڭ ءوز بيزنەسىن قۇرۋعا دەگەن قۇمارلىعى بۇكىل وتباسىن ورتاق ىسكە جۇمىلدىرۋعا سەپ بولدى. ونىڭ ايتۋىنشا، ءدال وسى باعىتتى تاڭداۋدا اتا-اناسى جاستايىنان بويىنا سىڭىرگەن شىدامدىلىق، تاباندىلىق سياقتى قاسيەتتەر زور ءرول اتقارعان ەكەن.
«مەن كەڭسەلىك جۇمىستى ەمەس، مال ءوسىرۋ شارۋاشىلىعىن تاڭداعانىما تۇك تە وكىنبەيمىن. اينالىسىپ جۇرگەن ءىسىمدى جان-تانىممەن جاقسى كورەمىن. مەملەكەتتىك باعدارلاما اياسىندا ءبىر جارىم ميلليونداي قارجى الدىم. وسى قاراجاتقا مال بورداقىلاۋ الاڭىن جاساي باستادىق. ەڭبەك پەن بار كۇش-جىگەرىمدى جۇمساسام، بيزنەسىم تابىستى بولادى دەپ سەنەمىن»، – دەيدى جاس فەرمەر.
كۇرشىمدىكتەر سايا اقانوۆانى اشىق، اقكوڭىل، جايدارى قىز رەتىندە تانيدى جانە وسى قاسيەتتەرى ونى اۋداننىڭ جەتەكشى كاسىپكەرى اتانۋعا كومەكتەسەدى دەگەن سەنىمدە.
«سايا بىزگە وتكەن جىلدىڭ كۇزىندە كەڭەس الۋعا كەلدى. كۋرستان ءوتۋ ارقىلى ول ساپالى بيزنەس-جوسپار قۇرۋدى ۇيرەندى، زاڭنامالىق جانە قۇقىقتىق نورمالاردى، ەسەپ-قيساپ جۇرگىزۋدى، توپتى جوسپارلاپ، باسقارۋدى مەڭگەردى، شارتتاردىڭ ءمانىن، جالپى مىندەتتەمەلەرىن ءتۇسىندى. ءبىز اۋىلداعى مۇنداي باستامالاردى قۋانا-قۋانا قولدايمىز، اۋىل شارۋاشىلىعىن وسىنداي جاستار دامىتادى»، – دەيدى كاسىپكەرلەر پالاتاسىنىڭ كۇرشىم اۋداندىق فيليالىنىڭ ديرەكتورى سۆەتلانا كۇدەدايەۆا.
