«تۆيتتەردەگى» ءوزىنىڭ جازباسىمەن الەمگە تانىلعان 7 جاسار سيريالىق بانا الابەد ەسىمدى قىز دونالد ترامپقا اشىق حات جازدى دەپ حابارلايدى bbc.com.

«ءسىز سيريالىق بالالارعا كومەكتەسۋىڭىز كەرەك. سەبەبى ولار دا ءسىزدىڭ بالالارىڭىز سەكىلدى بەيكۇنا بۇلدىرشىندەر.  سيريالىق بالالار دا ءسىز سەكىلدى بەيبىت ەلدە تۇرۋعا قاقىسى بار» دەپ جازادى ول.

بانا وتباسىمەن بىرگە  الەپپونىڭ شىعىس بولىگىنەن بەيبىت تۇرعىنداردى  جەلتوقسان ايىندا كوشىرۋ كەزىندە قاشقان. ءقازىر ولار تۇركيادا تۇرادى.

بانا «تۆيتتەردەگى» جازبالارىن باشار اسادتىڭ اسكەرى رەسەيدىڭ قولداۋىمەن قالانىڭ شىعىس بولىگىنە كىرە باستاعاننان باستاپ جازدى. بانا بولعان جاعدايلاردى اعىلشىن تىلىندە شىعارىپ وتىردى.

«تۆيتتەر» اككاۋنتىنداعى جازبالارىنا كومەكتەسكەن اناسى فاتيما بي-بي-سي-گە بانانىڭ دونالد ترامپقا جازعان حاتىن جىبەردى.

ونىڭ سوزىنشە بانا ونى اقش-تىڭ جاڭا پرەزيدەنتىنىڭ يناۋگۋراسياسىنا دەيىن جازعان. سەبەبى ول ترامپتى بىرنەشە رەت تەلەديداردان كورگەن.

مەنىڭ اتىم بانا الابەد. مەن سيريالىق جەتى جاسار الەپپولىق قىزبىن. قورشاۋدا قالعان شىعىس الەپپودان شىققانشا  سيريادا تۇردىم. مەن سيرياداعى سوعىستان زارداپ شەككەن بالالاردىڭ ءبىرىمىن.

ءقازىر مەن تىنىشتىقتا تۇركيادا ءومىر ءسۇرىپ جاتىرمىن. الەپپودا مەكتەپكە بارىپ ءجۇردىم. ءبىراق مەكتەپتىڭ كۇل-تالقانىن شىعاردى. كەيبىر دوستارىم قايتىس بولىپ كەتتى.

ولاردىڭ ءقازىر مەنىمەن بىرگە بەيبىت ەلدە اسىر سالىپ ويناپ جۇرگەنىن قالاۋشى ەدىم. مەن الەپپودا ەركىن ويناي المادىم. سەبەبى بۇل ولىمدەر قالاسى.

ءقازىر تۇركيادا كوشەگە شىعىپ، قۋانا الامىن. مەكتەپكە بارا الامىن. ازىرشە وقۋدى باستامادىم.

 مىنا الەم بارشامىز ءۇشىن وتە ماڭىزدى. ءسىز ءۇشىن دە ءدال سولاي.

وكىنىشكە وراي، سيريالىق بالالار ءقازىر مەن سەكىلدى ءومىر ءسۇرىپ جاتقان جوق. ولار سيريانىڭ ءار بۇرىشىندا سوعىستان كوز اشپاي، ۇلكەندەردىڭ ىسىنەن زارداپ شەگىپ جاتىر.

وتىنەمىن، سيرياداعى بالالار مەن حالىقتى قۇتقارىڭىزشى. ءسىز سيريالىق بالالارعا كومەكتەسۋىڭىز كەرەك. سەبەبى ولار دا ءسىزدىڭ بالالارىڭىز سەكىلدى بۇلدىرشىندەر. سيريالىق بالالار دا ءسىز سەكىلدى بەيبىت ەلدە تۇرۋعا قاقىسى بار. ەگەر ءسىز ماعان سيريالىق بالالارعا كومەكتەسۋگە ۋادە بەرسەڭىز، مەن ءسىزدىڭ جاڭا دوسىڭىز بولامىن. سيريا بالالارى ءۇشىن جاساعان كومەگىڭىزدى كورەمىن دەپ ۇمىتتەنەمىن.

بانا مەن ونىڭ وتباسى تۇراتىن تۇركيا ەلى سيريالىق وپپوزيسيانى قولدايدى. ترامپتىڭ سيريالىق كيكىلجىڭ تۋراسىنداعى ۇستاناتىن پوزيسياسى ءالى بەلگىسىز.

دونالد ترامپ رەسەيمەن قارىم-قاتىناستى نىعايتقىسى كەلەتىنىن بىرنەشە مارتە ايتقان. رەسەي سيريا پرەزيدەنتى باشار اسادتى قولدايدى.

دونالد ترامپتىڭ سايلاۋ الدى كامپانياسىندا ول سيرياعا كومەكتەسۋدى دوعارۋ كەرەك دەپ ايتقان ەدى. ءبىراق جاقىندا سيريادا ءقاۋىپسىز ايماقتار قۇرۋ تۋرالى ماسەلەنى كوتەردى.

يران، رەسەي جانە تۇركيا سيرياداعى ۇرىستى توقتاتۋ ءۇشىن ءۇش اپتالىق كەلىسىمدى نىعايتۋعا نيەتتى ەكەنىن ايتتى.