بارشا جۇرتشىلىققا تانىمال قازاق ءانشىسى باعدات سامەدينوۆا جەكە ومىرىندە، وتباسىلىق جاعدايىندا ۇلكەن قيىندىقتارعا تاپ بولعان قىزىنىڭ تاعدىرى تۋرالى «قازاقستان» ارناسىنىڭ «ايەل باقىتى» اتتى باعدارلامادا بايانداپ بەردى.
«مەنىڭ ۇلكەن قىزىم مەرۋەرت كىشكەنە تۇيىقتاۋ بولىپ ءوستى. بۇگىنگى تاڭدا ول دا بالا تاربيەلەپ، قىز اسىراپ وتىر. مەنىڭ مۇمكىن جىبەرگەن قاتەلىكتەرىم دە بار شىعار. مەرۋەرتتىڭ كۇيەۋى ناماز وقيتىن، ءبىراق ءبىر جامان اعىمداردىڭ سوڭىندا كەتكەنىن بايقاماپپىز. ءسويتىپ ول قىزىما قىسىم كورسەتىپ، پارانجا جامىل دەپ كۇشتەپتى. تۇرمىستارى وتە ناشار بولدى. ءقازىر بىرگە تۇرمايدى. ءبىر كۇنى بالاسى سىرقاتتانىپ قالىپ ەدى، مەن وعان قانشا رەت بالانى دارىگەرگە الىپ بار دەسەم دە، مەنىڭ كوڭىلىمدى قيمايدى ما، ماعان «ءيا» دەيدى دە، ءبىراق ءوزى اپارماي جۇرە بەرگەن»، - دەپ اعىنان جارىلدى ق ر ءانشىسى.
«سودان ءوزىم الىپ بارامىن دەپ ۇيىنە باردىم، كۇيەۋبالام مەنىمەن امانداسقان دا جوق. مەرۋەرت ءوزى ارەڭ دەگەندە شىقتى، قورىققانىنا با... دارىگەرگە بارىپ كورسەتىپ بولعان سوڭ، ءبىزدىڭ ۇيگە كەلدىك.
ۇيىڭە بار دەسەم «بارمايمىن، مەن دارىگەرگە اپاردىم، ەندى ول مەنى تاياقتايدى»، – دەيدى. سويتسەم ىستەمەگەنى قالماعان، قاتتى ۇرىپ-سوققان. «قۇلاعىم اۋىرىپ ءجۇر»، - دەيدى، قاتتى سوققىدان قۇلاعىنىڭ جارعاعى جارىلىپ كەتىپتى. ءبىر كۇنى كۇيەۋى كەلىپ، قويماي كەشىرىم سۇراپ، الىپ كەتتى. شەشەسىمەن كەلىپتى، اپكەسى بار - بارلىعى قاپشاعايعا بارىپ بىرەۋدىڭ ۇيىندە تۇردى.
سول جاقا بارعاننان سوڭ تاعى باستالدى. مىلتىقپەن، پىشاقپەن قورقىتاتىن. ءبىر كۇنى قاتتى ۇرعان،پىشاقتى سۇعىپ الا جازداعاندا ارەڭ قاشىپ قۇتىلىپ، ءبىر ورىستىڭ ۇيىنە بارىپ تىعىلىپتى. سودان قىزىم «ماما مەن بولدىم، شىدامىم تاۋسىلدى، كەلىپ الىپ كەت مەنى» – دەدى. سونان سوڭ ايىرىلستى ەكەۋى»، - دەپ قىزىنىڭ قورلىقپەن وتكىزگەن ازاپتى كۇندەرىن ايتىپ بەردى.
