قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى قايرات قوجامجاروۆ مەملەكەتتىك قىزمەتكەرلەردىڭ كيىمى كوپشىلىك ماقۇلداعان ىسكەرلىك ستيلگە سايكەس بولۋى كەرەكتىگىن مالىمدەدى.

مەملەكەتتىك قىزمەتكەر جۇمىسقا ورامال تاعىپ بارۋ تۋرالى سۇراعىن egov.kz سايتى ارقىلى اگەنتتىك ءتوراعاسىنا جولداعان.

«جۇمىسىمداعى باسشىلىق مەملەكەتتىك قىزمەتتە ورامال تۇرىندەگى باس كيىمدى كيۋگە قارسى. ءوزىم رەسمي ستيلدە كيىنەمىن. باسشىلاردىڭ ورامالىما قاتىستى نارازىلىعى قانشالىقتى زاڭدى؟ ەگەر باسشىلىقتىڭ تالابى زاڭدى بولسا، ول ق ر قاي زاڭىندا كورسەتىلگەن؟ مەملەكەتتىك قىزمەتكە ورامال كەدەرگى بولا الا ما؟» دەپ سۇراق جولدادى مەملەكەتتىك قىزمەتكەر.

وعان اگەنتتىك باسشىسى بىلاي دەپ جاۋاپ بەردى: «ەتنيكالىق كودەكسكە ساي، مەملەكەتتىك قىزمەتكەردىڭ قىزمەت بابىنداعى سىرتقى كەلبەتى مەملەكەتتىك اپپاراتتىڭ ابىرويىن جوعارلاتۋى كەرەك. كوپشىلىك ماقۇلداعان ىسكەرلىك ستيلگە سايكەس بولۋى قاجەت. ول رەسمي، سالماقتى جانە جيناقى بولعانى ابزال. اگەنتتىك مەملەكەتتىك قىزمەتكەرلەردىڭ كيىمى تۋراسىندا تارقاتىپ جازعان ۇسىنىسىن دايىنداعان. ودان مەملەكەتتىك قىزمەتكەردىڭ كيىمى تۋراسىندا انىعىراق بىلە الاسىز. اتالمىش ۇسىنىستا ورامال تۇرىندەگى باس كيىم قاراستىرىلماعان».