الماتى قالاسى بوستاندىق اۋدانىنىڭ №2 سوتىندا ءانشى مەرۋەرت تۇسىپبايەۆا مەن ديزاينەر جادونىڭ ءىسى بويىنشا سوت وتىرىسى ءوتتى، - دەپ حابارلايدى Tengrinews.kz 

سوت وتىرىسى ءسال كەش باستالدى. حاتشىنىڭ ايتۋىنشا، بارلىق سۋديا جينالىستا بولعان.

ەسكە سالا كەتەيىك، جادو مەن مەرۋەرت تۇسىپبايەۆا اراسىنداعى جانجال 2016 جىلدىڭ جەلتوقسانىندا شىققان بولاتىن. ديزاينەر ءانشىنىڭ Instagram جەلىسىندەگى پاراقشاسىندا جازعانىنا رەنجىپ، سوتقا ارىز تۇسىرگەن ەدى. ول مەرۋەرت تۇسىپبايەۆانى جالا جاپتى جانە ارىن قورلايتىن سوزدەر ايتتى دەپ ايىپتاپ، 20 ميلليون تەڭگە كولەمىندە مورالدىق شىعىن تالاپ ەتكەن بولاتىن. 

بۇل جولى سوت پروسەسىنە مەرۋەرت تۇسىپبايەۆا كەلدى. ءبىراق جادو مەن ونىڭ ادۆوكاتى سوت وتىرىسى بولاتىنى جايلى ەستىسە دە، سوت زالىنا كەلمەدى.

سوت پروسەسى اياقتالعان سوڭ مەرۋەرت تۇسىپبايەۆا وسى جاعدايعا قاتىستى پىكىر ءبىلدىردى.

"جاقىندا عانا جادىرا ساحييەۆا "مەرۋەرت تۇسىپبايەۆا مەنىڭ اياعىما جىعىلاتىن بولسا دا، ونى كەشىرمەيمىن" دەپ سۇحبات بەرگەن بولاتىن. مەنىڭشە، بىرىنشىدەن، بۇل ادەپسىزدىككە جاتادى. مەن ونىڭ اياعىنا بارىپ جىعىلمايمىن. مەنىڭ دە ار-نامىسىم بار، ۇل ءوسىرىپ وتىرمىن. ۇلىم مەنىڭ بىرەۋدىڭ اياعىنا جىعىلعانىمدى كورسە نە بولادى؟ ءبىز ادۆوكاتىمىزبەن ونىڭ بۇل سوزىندە قۇيتىرقىلىق بار ەكەنىن سەزىپ وتىرمىز. ءبىز دە ارىز جازدىق. سەبەبى، جادو مەنىڭ تۋىستارىمدى، انامدى "مەنى ءۇش جىلعا تۇرمەگە قامايمىن دەپ، اياعىما جىعىلسا دا، كەشىرمەيمىن" دەپ، بۇكىل ەل الدىندا قورقىتىپ جاتىر. بىزدە ادامدار زاڭدار جايلى اسا بىلە بەرمەيدى. ولار قاتتى قورقىپ، الاڭداپ جاتىر. ەكى كۇن سايىن اناما جەدەل جاردەم شاقىرامىز. ەگدە جاستاعى ايەل. جاقىندا گيپەرتونيالىق اسقىنۋ بولدى. سەبەبى، تەلەديداردان ۇنەمى مەنىڭ تۇرمەگە قامالۋىم مۇمكىن ەكەنى جانە جادونىڭ مەنەن 20 ميلليون تەڭگە ءوندىرىپ الماقشى ەكەندىگى جايلى ايتىپ، كورسەتىپ جاتادى. مەنىڭششە، ايتقان سوزدەرگە اباي بولۋ كەرەك"، - دەدى مەرۋەرت تۇسىپبايەۆا.

ال ءانشىنىڭ ادۆوكاتى قولعانات قابانبايەۆا جادونىڭ ۇستىنەن قانداي ماندەگى ارىزدى جازعاندارىن ءتۇسىندىرىپ بەردى.

"ءبىز ارىزدا ونىڭ مەرۋەرت تۇسىپبايەۆانىڭ بەدەلى مەن ىسكەرلىك ابىرويىن نۇقسان كەلتىرگەنىن كورسەتتىك. ول مەرۋەرتتى بالاعاتتادى. تەلەارنادا ءسوز سويلەدى. ول وسىندا، ياعني، سوت وتىرىسىنا كەلگەندە مەرۋەرت تۇسىپبايەۆانىڭ ءوزى جوق بولعاندىقتان، وسىنداي ماندەگى سۇحبات بەردى. "مەرۋەرت ونىڭ اياعىنا جىعىلىپ، كەشىرىم سۇراسا دا، ول ونى كەشىرمەيدى" دەگەن ماعىنادا سۇحبات بەرىپتى. ءبىزدىڭ ويىمىزشا، جادو وسى سوزىمەن دە بالاعاتتاۋدى قويمادى. سودان ءبىز مىناداي قورىتىندىعا كەلىپ وتىرمىز، ياعني، سۋديالار جادونىڭ ارىزىن قولداۋى مۇمكىن. ەندى ءبىز دە جادو سياقتى ودان 20 ميلليون تەڭگە تالاپ ەتەمىز"، - دەدى ادۆوكات قابانبايەۆا.

سونداي-اق، ادۆوكات مەرۋەرت تۇسىپبايەۆا جادونى بالاعاتتاعان جوق دەپ ەسەپتەيتىنىن جانە نەگە بۇلاي ويلايتىنىن ايتتى.

"مەن مۇندا مەرۋەرت تۇسىپبايەۆانىڭ كىناسى جوق دەپ ويلايمىن. جادونىڭ ارىزىن نەگىزسىز دەپ سانايمىن. بىرىنشىدەن، ول ءوزى تەلەارناداعى باعدارلامالاردىڭ بىرىندە مەرۋەرت تۇسىپبايەۆاعا ءبىرىنشى بولىپ، ءتىل تيگىزە باستادى. ول "مەرۋەرتتىڭ تالعامى جوق، كيىم كيۋدى بىلمەيدى" دەپ تۇسىپبايەۆانىڭ يميدجىنە نۇقسان كەلتىردى. مۇنداي پىكىرلەردى تەك ليسەنزياسى مەن ديپلومى بار ساراپشىلار ايتا الادى. ءسان ساراپشىسىنىڭ ءوزى دە مۇنداي سوزدەردى ابايلاپ، مادەنيەتتى تۇردە ادامنىڭ ار-نامىسىنا تيمەي، دۇرىس ايتىپ جەتكىزەدى. بۇل جاعدايدا، مەنىڭشە، جادو مەرۋەرتتى وسىلاي سىنعا الماۋى كەرەك ەدى. ال مەرۋەرت جادونىڭ بۇل سىنىنا قازاقتىڭ ماقالىمەن جاۋاپ بەردى. مەرۋەرت ماقالدى ءوزى قۇراستىرىپ العان جوق: "يت جوقتا شوشقا ۇرەدى" ("كوگدا نەت سوباكي، لاەت سۆينيا"). قازاقتار بۇل ماقالدى اۋىزەكى ستيلدە قولدانا بەرەدى. ول بالاعات ءسوز بولىپ سانالمايدى. سەبەبى، ول - قازاق حالقىنىڭ اۋىزەكى فولكلوردىق تۋىندىسى"، - دەپ ءتۇسىندىردى قابانبايەۆا.

ايتا كەتەيىك، مەرۋەر تۇسىپبايەۆا ءۇش سوت وتىرىسىنا دا كەلمەگەن. 10 قاڭتاردا وتكەن سوت پروسەسىنە ءانشىنىڭ ادۆوكاتى عانا كەلگەن. ونىڭ ايتۋىنشا، تۇسىپبايەۆا ول كەزدە رەسەيگە ەم الۋعا كەتكەن. 

ەگەر مەرۋەرت تۇسىپبايەۆانىڭ كىناسى دالەلدەنسە، ول 3000 اەك كولەمىندە (6 ميلليون تەڭگەدەن كوپ) ايىپپۇل تولەيدى نەمەسە وسى كولەمدە تۇزەۋ جۇمىستارىنا تارتىلادى، نەمەسە ءۇش جىلعا باس بوستاندىعىنان ايىرىلادى نەمەسە شەكتەلەدى.