مەملەكەت باسشىسى ۇسىنعان بيلىك تارماقتارىنىڭ وكىلەتتىكتەرىن قايتا ءبولۋ پارلامەنتتىڭ مارتەبەسىن ارتتىرۋ جانە ۇكىمەتتىڭ دەربەستىگىن كۇشەيتۋ عانا ەمەس، بۇل – قازاقستانداعى بيلىكتىك قاتىناستار جۇيەسىن شىن مانىسىندە قايتا تۇلەتۋ. ايتا كەتۋ كەرەك، بۇل رەتتە قازاقستان پرەزيدەنتتىك رەسپۋبليكا بولىپ قالا بەرەدى. بەلگىلى ساياساتتانۋشى، قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين وسىلاي دەيدى. بۇل تۋرالى Baq.kz حابارلايدى.

«پرەزيدەنت كونستيتۋسيالىق رەفورمالار جونىندەگى جۇمىس توبى ۇسىنعان جوبانى ەگجەي-تەگجەيلى سيپاتتادى. بۇل – ءىس جۇزىندەگى ساياسي رەفورمالار. ويتكەنى، بيلىكتىڭ تارماقتارى اراسىنداعى ءوزارا ءىس-قيمىل پرينسيپتەرىن قامتىپ وتىر»، - دەيدى ساياساتتانۋشى.

كەشە، 26 قاڭتاردا ءوزىنىڭ حالىققا ۇندەۋىندە ەلباسى مالىمدەگەندەي، رەفورما ەكى نەگىزگى باعىت بويىنشا ىسكە اسادى. بىرىنشىدەن، پرەزيدەنتتىڭ الەۋمەتتىك-ەكونوميكالىق پروسەستەردى رەتتەۋدەگى ءبىرشاما وكىلەتتىكتەرى ۇكىمەتكە جانە باسقا دا اتقارۋشى ورگاندارعا بەرىلمەك. سوندا بۇل سالاعا ۇكىمەت، مينيسترلىكتەر جانە اكىمدىكتەر تولىقتاي جاۋاپ بەرەتىن بولادى. سونىمەن قاتار، ۇكىمەتتى جاساقتاۋداعى پارلامەنتتىڭ ءرولى كۇشەيتىلەدى. پارلامەنت سايلاۋىندا جەڭگەن پارتيا ۇكىمەت قۇرامىن انىقتاۋعا تۇبەگەيلى ىقپال ەتەتىن بولادى. بۇل مينيسترلەر كابينەتىنىڭ وكىلەتتى بيلىك الدىنداعى جاۋاپكەرشىلىگىن ارتتىرادى. بۇل رەتتە ە.قارين بيلىك تارماقتارىنىڭ وكىلەتتىكتەرىن قايتا ءبولۋ رەفورماسى جۇرگىزىلگەنىمەن، قازاقستان پرەزيدەنتتىك رەسپۋبليكا بولىپ قالا بەرەتىنىن ايتادى.

«...پرەزيدەنت بيلىكتىڭ تارماقتارى اراسىندا جوعارى اربيتر ءرولىن جالعاستىرادى. الايدا، پرەزيدەنتتىڭ ەندى كۇش-جىگەردى ستراتەگيالىق ماسەلەلەرگە، سىرتقى ساياسات پەن ۇلتتىق قاۋىپسىزدىك ماسەلەلەرىنە جۇمىلدىراتىنى ايتىلدى»، -دەيدى ول.

سونداي-اق، ول ەلىمىزدىڭ بيلىكتىك قاتىناستار جۇيەسىنىڭ ەسكى مودەلىنەن بىرتىندەپ ارىلىپ، جاڭا جاعدايلارعا بەيىمدەلە باستايتىنىن، بۇل تۇرعىدا الداعى وزگەرىستەردىڭ ءسوزسىز وڭ ترەند ەكەنىنە توقتالدى.