ق ر مادەنيەت جانە سپورت ءمينيسترى ارىستانبەك مۇحامەدي ۇلى ريا Bestnews.kz-كە قىتايدىڭ حۋنان ايماعىندا وتكىزىلگەن تانىمال «I am a singer» ءان بايقاۋىنا قاتىسىپ، كوزگە ەرەكشە تۇسكەن ديماش قۇدايبەرگەن جايلى سۇحبات بەرىپتى.

«بۇل، كەرەمەت جەتىستىك. ديماش ءۇشىن وتە قۋانىشتىمىن. ول كوپتەگەن كونكۋرستاردىڭ لاۋرەاتى، 2015 جىلى «سلاۆيان بازارىندا» جەڭىس تۇعىرىنا كوتەرىلدى. مۇنىڭ ءبارى كەزدەيسوقتىق ەمەس. ديماش ونەرلى وتباسىندا دۇنيەگە كەلدى. قانات پەن سۆەستلانا ايتبايەۆتار ەلىمىزدەگى اتاعى شىققان، سىي-قۇرمەتكە يە شىعارماشىلىق وتباسى. قانات ەل اۋزىندا جۇرگەن كوپتەگەن اندەردىڭ اۆتورى. بۇگىنگى كۇنى ول اقتوبە وبلىسىنىڭ مادەنيەت باسقارماسىنىڭ باسقارۋدا. سۆەتلانا بولسا، جولداسىمەن بىرگە جۇپ بولىپ ساحناعا شىعىپ، كورەرمەندەردى ءسۇيسىنتىپ، ءان ورىنداۋدا. بالالارى ديماش ەرەكشە مۋزىكانت. ۇنەمى ىزدەنىس ۇستىندە. قازىرگى تاڭدا ءبىز وعان وپەرالىق باعدارلاما دايىنداپ جاتىرمىز. سونى سيمفونيالىق وركەستردىڭ سۇيەمەلدەۋىمەن ورىندايتىن بولادى. ديماشتىڭ بولاشاعى جارقىن. ءالى بيىك-بيىك بەلەستەردى باعىندىراتىنىنا سەنىمدىمىن.

بۇگىندە ب ا ق قىتايلار ديماشتى ەكىنشى ۆيتاس دەپ ايتتى دەپ شۋلاپ جاتىر. ءوز باسىم ۆيتاستىڭ شىعارماشىلىعىمەن تانىستىم. ونىڭ ءبىرشاما ۋاقىت بويى قىتايدا تۇرىپ، سول جاقتا ونەر كورسەتىپ جۇرگەنىن بىلەمىن. سوندىقتان دا قىتايلار ۆيتاستى وتە جاقسى تانيدى. الايدا ديماش قۇدايبەرگەن قايتالانباس دارا ءانشى. اقتوبەنىڭ مۋزىكالىق ۋچيليششەسىن بىتىرگەن، ءقازىر استاناداعى قازاق ۇلتتىق ونەر ۋنيۆەرسيتەتىنىڭ ستۋدەنتى.

ديماش بۇل جەتىستىككە دايىن بولدى. بىرنەشە جىل بويى ونى سىرتتاي باقىلاپ كەلەمىن. ونى باسقا انشىلەرمەن سالىستىرۋدىڭ قاجەتى جوق. ول بيىك نوتالاردى بىرەۋ ۇقسايمىن دەپ الىپ جاتقان جوق. ونىڭ داۋىس دياپازونى كەڭ. بۇل قۇداي بەرگەن تالانت. بيىك نوتانى الامىن دەپ ديماش قارا تەرگە تۇسپەيدى. ديماش ەكىنشى ۆيتاس ەمەس، قىسقاسى. بۇل بۋرابايدى شۆەيساريامەن سالىستىرۋمەن تەڭ. جالپى، بىرەۋدى بىرەۋمەن سالىستىراتىن پسيحولوگيادان ارىلۋىمىز قاجەت.شۆەيساريا دا كوركەم مەملەكەت، الايدا بۋرابايدىڭ ءجونى بولەك. كەزىندە ءبىز يۋنەسكو دەلەگاسياسىن قوناق رەتىندە كۇتىپ الىپ، بۋرابايدى كورسەتكەندە ەشكىم ونى شۆەيساريامەن سالىستىرعان ەمەس. شەتەلدىكتەر تاڭدايلارىن قاعىپ، «نەتكەن عاجاپ جەر، مۇنداي سۇلۋلىقتى ەش جەردەن كورمەدىم» دەپ تارقاستى. ءبىزدىڭ گەننادييدى ۇنەمى بىرەۋمەن سالىستىرىپ جاتادى. گولوۆكين قايتالانباس بوكسشى ەكەنىن تۇسىنەتىن كەز جەتتى عوي» دەيدى ارىستانبەك مۇحامەدي ۇلى.