شەشەنستان باسشىسى رامزان قادىروۆ پوليسيا مەن اسكەريلەرگە ادام شىعىنى بولماس ءۇشىن زاڭسىز قارۋلى قۇرىلىمدارعا قاتىسى بار دەگەن كۇدىككە ىلىنگەندەرگە ەسكەرتۋسىز قارۋ قولدانۋعا رۇقسات بەردى دەپ حابارلادى ازاتتىق.
بۇل تۋرالى "كاۆكازسكيي ۋزەل" سايتى جازعان.
قادىروۆ قارۋ قولدانۋعا رۇقسات بەرگەنى تۋرالى 24 قاڭتاردا شەشەنستان ىشكى ىستەر مينيسترلىگى القاسىنىڭ وتىرىسىندا مالىمدەگەن. "ەگەر سەزىك تۋسا، ەسكەرتۋسىز اتىپ تاستاڭىزدار! نە سەبەپتى تاۋەكەلگە بارۋىڭىز كەرەك؟" دەدى ول.
"كاۆكازسكيي ۋزەل" سايتى حابارلاماسىندا "پوليسيا تۋرالى" زاڭنىڭ 19-بابى بويىنشا پوليسيا قىزمەتكەرلەرى قارۋ قولدانباس بۇرىن اتاتىن ەسكەرتۋى ءتيىس. پوليسيا كۇدىكتىگە "قارۋ قولدانۋدى كەشىكتىرۋى ازاماتتاردىڭ نەمەسە پوليسيا قىزمەتكەرلەرىنىڭ ءومىرى مەن دەنساۋلىعىنا تىكەلەي ءقاۋىپ توندىرسە نەمەسە باسقا دا اۋىر زارداپ كەلتىرەتىندەي بولسا" ەسكەرتۋسىز اتىپ تاستاي الادى.
سايت مالىمەتىنە قاراعاندا، 2016 جىلى شەشەنستاندا قارۋلى قاقتىعىستان 27 ادام قازا تاپقان، ولاردىڭ التاۋى - كۇش قۇرىلىمدارىنىڭ قىزمەتكەرلەرى.
پىكىر قالدىرۋ