ۇلتتىق بانك باسشىسى دانيار اقىشيەۆتىڭ ايتۋىنشا، اقپان ايىندا ۆاليۋتا باعامىنىڭ كۇرت وزگەرىپ، تەڭگەنىڭ نىعايۋىنا بىرنەشە فاكتور اسەر ەتتى، دەپ حابارلايدى قازاقپارات 

ءبىر اي ىشىندە تەڭگەنىڭ اقش دوللارىنا قاتىستى ايىرباستاۋ باعامى 3،5%-عا، ال جىلدىڭ باسىنان بەرى 6،2%-عا نىعايدى. اقپاننىڭ سوڭىندا قالىپتاسقان ءبىر اقش دوللارى ءۇشىن 312،76 تەڭگە بولعان باعام 2015 جىلعى جەلتوقساننىڭ ەكىنشى جارتىسىنان بەرگى ەڭ جوعارى كورسەتكىش بولىپ تابىلادى.

«تەڭگەنىڭ كۇشەيۋىنە بىرنەشە سەبەپ بار. بىرىنشىدەن، مۇنايدىڭ الەمدىك باعاسى اسەر ەتتى. ءبىر باررەلدىڭ باعاسى 55 دوللاردان جوعارى بولىپ ساقتالدى. ءبارىمىز جاقسى بىلەمىز، وعان وپەك جانە باسقا مۇناي ءوندىرۋشى ەلدەردىڭ جاسالعان ۋاعدالاستىقتارى، سونىڭ ىشىندە مۇناي ءوندىرۋ كولەمىن شەكتەۋ بويىنشا ورتاق كەلىسىمدەر دە اسەر ەتتى»، - دەدى اقىشيەۆ اقپاننىڭ الدىن الا قورىتىندىلارىنا جانە ۆاليۋتا نارىعىنداعى جاعدايعا ارنالعان بۇگىنگى بريفينگتە.

بۇدان بولەك، ۇلتتىق بانك باسشىسى اقپاننىڭ ەكىنشى جارتىسىنان باستاپ ۆاليۋتا نارىعىنداعى شەتەل ۆاليۋتاسىنىڭ سۇرانىسى مەن ۇسىنىسىنا نەندەي فاكتورلاردىڭ اسەر ەتكەنىن ءتۇسىندىرىپ بەردى. ونىڭ ايتۋىنشا، بۇل «سالىقتىق اپتا» دەپ اتالاتىن ماۋسىمدىق فاكتور.

«وندايدا ەكسپورتەر كاسىپورىندار ۆاليۋتانىڭ ءبىراز بولىگىن ساتىپ، سول اقشاعا سالىق تولەدى. وسىنىڭ ناتيجەسىندە ۆاليۋتاعا دەگەن ۇسىنىستار كۇرت كوبەيدى. ءدال وسى جاعداي دا تەڭگەنىڭ نىعايۋىنا اسەر ەتتى. ال «سالىق اپتاسىنىڭ» اياعىنا قاراي تەڭگەنىڭ باعامى رەتتەلە باستادى. ونى ءبارىڭىز بايقاعان شىعارسىزدار. ناۋرىز ايىندا ءبىرشاما وزگەرىستەر بولۋى ابدەن مۇمكىن. الايدا تەڭگە باعاسى كۇرت وزگەرمەيدى. ونى مۇنايدىڭ الەمدىك باعالارى ۇستاپ تۇراتىن بولادى. سوندىقتان ۆاليۋتا باعامى قاتتى قۇبىلادى دەپ ايتۋ قيىن»، - دەپ اتاپ كورسەتتى ۇلتتىق بانك ءتوراعاسى.