ءبىلىم ءمينيسترى ەرلان ساعادييەۆ ۇبت سۇراقتارىنداعى بايان ەسەنتايەۆا، نۇرتاس ادامبايەۆ جانە ەرمەك تۇرسىنوۆقا قاتىستى سۇراقتارعا جاۋاپ بەردى، دەپ حابارلايدى Tengrinews.kz.

 "مەن بۇل سۇراقتى ءوزىم كورمەدىم. مۇمكىن كورۋ كەرەك شىعار. ال جالپى سۇراقتار قازاقستاننىڭ وليمپيادا چەمپيوندارى جايلى، تانىمال جازۋشىلار مەن سۋرەتشىلەر، انشىلەر جايلى بولادى. ناعىز تەستىلەۋ كەزىندە قانداي سۇراقتار بولاتىنىن ءالى تالقىلايمىز"، - دەدى مينيستر.

 وسىدان كەيىن مينيسترگە جۋرناليستەر ەرمەك تۇرسىنوۆتىڭ وسى سۇراققا قاتىستى پىكىر بىلدىرگەنىن حابارلادى. ولاردىڭ ايتۋىنشا، ەرمەك تۇرسىنوۆ مۇنى ساندىراق دەپ اتاعان. ول ءوزى تۋرالى سۇراقتىڭ ۇبت-دا كەزدەسەتىندەي قازاقستاننىڭ ونەر سالاسىندا ايتارلىقتاي تۇلعا ەمەس ەكەنىن ايتقان.

ال ءوز كەزەگىندە مينيستر مۇنىڭ سىناق تۇرىندە جۇرگىزىلگەن تەست ەكەنىن ايتتى.

"بالالار وسى سۇراقتارمەن جاتتىعادى. بۇل سۇراقتار گازەتتەردەن، جۋرنالداردان، تەلەديدارلاردان الىنىپ جاتىر. سىزدەر بايان ەسەنتايەۆا جايلى جازاسىزدار عوي؟ نە ءۇشىن جازاسىزدار؟ ماتىندەر سايتتاردان جانە گازەتتەردەن الىنىپ، ستۋدەنتتەرگە بەرىلدى. مىنە، ءماتىندى وقىپ، سۇراقتارعا جاۋاپ بەرىڭىز. ءسىز جازساڭىز، ونى ءبىز نەگە المايمىز؟ "، - دەدى مينيستر.

سونىمەن قاتار، مينيستر سايتتاعى ماتەريالداردىڭ 20 پايىزىنىڭ بايان ەسەنتايەۆا جايلى ەكەنىن ايتتى. "ستۋدەنت وسىلايشا سۇراقتارعا دايىندالادى. تالاپكەر ۇبت-عا كەلگەندە وعان قانداي سۇراقتىڭ كەلەتىنىن بىلمەيدى. مىسالى، سۇراقتار ۆينوكۋروۆ تۋرالى، مادەنيەت تۋرالى بولۋى مۇمكىن"، - دەپ ءتۇسىندىردى ساعادييەۆ.

ەسكە سالا كەتەيىك، وسىعان دەيىن ۇلتتىق ورتالىق بايان ەسەنتايەۆا جايلى سۇراقتىڭ نەلىكتەن تەستىلەۋگە ەنگىزىلگەنىن تۇسىندىرگەن بولاتىن. ايتا كەتەيىك، 1 قاڭتاردان باستاپ جاڭا فورماتقا وزگەرتىلگەن سۇراق-جاۋاپتا بايان ەسەنتايەۆامەن قاتار، تالاي ارتىس-شوۋمەندەردىڭ اتى اتالعان ەكەن. ال قازاق ءتىلى مەن ادەبيەتىنىڭ ورنىن باسقان "وقۋ ساۋاتىلىعى" ءپانىن وسىنداي سۇراقتارمەن تولتىرعان ۇلتتىق تەستىلەۋ ورتالىعىنداعىلار بولسا جاستاردى شوۋعا تارتتىق دەپ وتىر.