"قامشىنىڭ" حات قورجىنىنا الدابەرگەن ايماعامبەتوۆ ەسىمدى ازاماتتان حات كەلىپ ءتۇستى. "قامشى" اقپاراتتىق پورتالى ەركىن پىكىر الاڭى بولعاندىقتان، ونى جاريالاۋعا ۇيعاردى. قارسى تاراپتىڭ ايتارى بولسا ونى دا جاريالاۋعا دايىنبىز.  اۆتور پىكىرى رەداكسيانىڭ پىكىرىن بىلدىرمەيدى. 

مەن، اتام-اكەم سياقتى، كاسىبي تەمىرجولشى الدابەرگەن ايماعامبەتوۆ، اقتوبە تەمىر جولى بولىمشەسىندەگى بىلىقتاردى زاڭ قاداعالاۋشى ورگاندارعا جەتكىزگەنىم ءۇشىن، اقتوبە تەمىر جولى بولىمشەسى باسشىسى جاراس ءىزعۇلوۆتىڭ، تەمىرجول بولىمشەسى زاڭگەرىنىڭ تۋعان اپاسى، اقتوبە وبلىستىق كاسساسيالىق سوت القاسى سۋدياسى ل.لەماشوۆاعا (كەيىن ول جۇمىسىنان كەتكەن)، سۋديالار س.قوسىمبەتوۆكە، ن.اجىعالييەۆاعا ارقا سۇيەپ، ماعان كورسەتكەن قورلىقتارىن  امالسىزدان جازباشا  جانە  بەينەتاسپا ارقىلى حالقىما، ەلباسىنا جەتكىزۋگە ءماجبۇرمىن، اراشا سۇرايمىن.

اقتوبە وبلىسى،  حرومتاۋ اۋدانى، دون ستانسياسىندا مەملەكەتىمىزدىڭ ماگيسترالدىق تەمىر جولى جەلىلەرى ورنالاسقان ايماقتان، بەرىلمەيتىن جەردەن ءوزىنىڭ جانە ءبىرىنشى ورىنباسارى ۆلاديمير پەتروۆتىڭ نەكەلى  ايەلدەرىنە 3 جەر تەلىمىن بەردى، وسى جەر تەلىمدەرى استىنداعى 730 مەتر ستانسيا جولى جانە ارنايى بيىك الاڭدى، قۇنى شامامەنەن 100 ملن. تەڭگە بولاتىن، جەكەشەلەندىرۋگە جاتپايتىن مەملەكەت مەنشىگىن نەكەلى ايەلدەرىنە جەكەشەلەندىرىپ بەردى. وتباسىلىق بيزنەس مەملەكەت ەسەبىنەن ايىنا 1 ملن. 100 مىڭ تەنگە پايدا كورىپ وتىر. زاڭ تالاپتارى اشىق تۇردە بۇزىلعانىنا قاراماستان، «ءاي!» دەيتىن اجە، «قوي!» قوجا بولماعاسىن تەمىرجول باسشىلارى جاۋاپكەرشىلىكتەن قۇتىلىپ ءجۇر. 

جاراس ءىزعۇلوۆقا ميلليون از بولدى، ەندى اۋىزدى ميللياردقا سالدى.

"قازاقستان تەمىر جولى باسقارماسى 3  رەت تەكسەرۋ بارىسىندا اقتوبە وبلىسى قاندىاعاش بەكەتىندە 730 كۇن بويى ەلىمىزدەن سىرتقا ۆاگون-سيستەرنالارىمەنەن، كومپوزيت جۇگى دەگەن اتپەن، شىن مانىندە مۇنايدىڭ جونەلتىلگەنىن انىقتادى".

2009 جىلى قىركۇيەكتە قىلمىستىق ىسكە بايلانىستى  سوت ۇكىمىن شىعارعان، كەيىن جۇمىستان كەتكەن مۇعالجار اۋداندىق سوتىنىڭ سۋدياسى ن.اجىعالييەۆا، 730 كۇننىڭ تەك 60-كۇنىندە مۇنايدىڭ «كومپوزيت» بولىپ كەتكەنىن كورسەتىپ، مەملەكەتكە 5،5 ملرد.تەڭگە شىعىن كەلگەنىن انىقتادى.

سوندا، تاعى 670 كۇن بويى مۇنايدىڭ كومپوزيت بولىپ كەتكەنىن ۇكىمدە نەگە كورسەتپەگەن؟ بۇدان مەملەكەت قانداي شىعىن كوردى؟ بۇل اقشا كىمنىڭ قولىندا كەتتى؟ انىقتاماعان. ويتكەنى، قاندىاعاش ستانسياسى جولىندا ۆاگون-سيستەرنالارداعى مۇناي جۇگىنىڭ كودىن كومپوزيت جۇگىنىڭ كودىنا اينالدىرىپ سىرت ەلگە جونەلتكەن جاراس ءىزعۇلوۆ پەن ونىڭ  سىبايلاستارىن جاۋاپتىلىقتان قۇتقارۋ ءۇشىن ادەيى سوت اكتىسىن شىعاردى.

ۇلكەن كۇرەسپەنەن، 2016 جىلى اقپاندا كىرىس دەپارتامەنتى قوزعاعان قىلمىستىق ءىس كوزبە-كوز تەمىرجولدىڭ ءوزىنىڭ انىقتاعان قۇجاتتارىن جاسىرىپ، قايتا-قايتا جابىلىپ قالۋى تەكتەن تەك ەمەس. مەملەكەتىمىزدىڭ قاۋىپسىزدىگىنە نۇقسان كەلتىرەتىن شامامەن 100 ملرد.تەڭگە مۇناي ۇرلىعى تۋرالى قىلمىستىق ءىس ۇلتتىق قاۋىپسىزدىك كوميتەتىنىڭ قاراۋىنا بەرىلمەي اشىلمايدى.

قالايدا مەنىڭ اۋزىمدى جابۋ ءۇشىن، مەنى قاتارىنان 3 (ءۇش) رەت – 2009 جىلى ەڭبەك شارتىن بۇزىپ جۇمىستان شىعاردى، ال كەيىنگى ەكەۋىندە سوت شەشىمدەرىنەن كەيىن قايتا جاسالماعان ەڭبەك شارتىن بۇزىپ، قابىلداماعان جۇمىستان شىعاردى".

 2009 جىلى قاراشادا سوت شەشىمىن شىعارعان سۋديا – مەنى بۇرىنعى جۇمىسىما ەمەس، بۇرىنعى  قىزمەتىمە ورنالاستىرىپ، قاعاز جۇزىندە جۇمىسقا قوستى.

-2011 جىلى ناۋرىزدا كاسساسيالىق سوت القاسىنىڭ قاۋلىسى، كۇشىنە ەنگەن سوت شەشىمى، مەنى 2ء-شى رەت شتاتتىق كەستەدەن قىسقارتىلعان لاۋازىمداعى بۇرىنعى جۇمىسىما قايتا ورنالاستىردى. مىندەتتى تۇردە ورىندالاتىن سوت شەشىمىن ج.ءىزعۇلوۆ ورىنداعان جوق. لاۋازىم شتاتتىق كەستەگە ەنگىزگەن جوق، ەڭبەك شارتىن جاساعان جوق. جۇمىسقا قابىلداعان جوق. سوت شەشىمىمەنەن وندىرىلگەن ايلىق جالاقىدان مەملەكەتكە ءتيىستى سالىق تولەمدەرىن، مىندەتتى زەينەتكەرلىك قورعا 1 تيىن دا اۋدارعان جوق. ويتكەنى، مەن ەشكىم دە ەمەس ەكەندىگىمدى تۇسىنەتىن اقتوبەدە پروكۋرور جوق.   مۇمكىن، باس پروكۋرور جاقىپ اسانوۆتىڭ قۇلاعىنا تيسە تۇسىنەر.

• 2011 جىلى شىلدەدە، جاسالماعان ەڭبەك شارتىن بۇزىپ، شتاتتىق كەستەدە قىسقارتىلعان جوق لاۋازىمنان، قابىلداماعان جۇمىستان 3ء-شى رەت شىعاردى. كاسساسيالىق سوت القاسى قاۋلىسىنان كەيىن، اراعا 7 (جەتى) اي سالىپ، 2011 جىلى قىركۇيەكتە سوت شەشىمىن شىعارعان سۋديا بۇرىنعى جۇمىسىنا قايتا ورنالاستىرۋ تۋرالى زاڭدى كۇشىنە ەنگەن كاسساسيالىق سوت القاسىنىڭ قاۋلىسىن، بۇرىنعى قىزمەتىنە قايتا ورنالاسقان دەپ وزگەرتتى. ادەيى شىعارىلعان سوت شەشىمىنىڭ اياسىندا، ورىندالۋى مىندەتتى سوت شەشىمىن ورىنداماعاندار - ج.ءىزعۇلوۆ پەن ونىڭ  سىبايلاستارى، مەملەكەتتىك سوت ورىنداۋشىلارى ا.اسقار، ت.ءابۋوۆ  جاۋاپتىلىقتان قۇتىلىپ جۇرگەندەرىنە  6 (التى) جىل تولدى.
• 2016 جىلى شىلدەدە اقتوبە وبلىسىنىڭ اكىمى بەردىبەك ماشبەك ۇلى ساپاربايەۆ جەكە قابىلداۋىندا بولعانىمدا «ەڭبەك شارتى جاسالماعان جەردە جۇمىسقا قابىلداۋ بۇيرىعى قايدان بولادى؟» دەپ، ورىندالۋى مىندەتتى  سوت شەشىمىنىڭ ورىندالماعانىنا كوزى جەتتى. قالايدا، ج.ءىزعۇلوۆتى جاۋاپتىلىقتان قۇتقارۋ ءۇشىن، زاڭدى كۇشىنە ەنگەن سوت اكتىسىنىڭ تالابىن، زاڭدى كۇشىنە ەنگەن ەكىنشى سوت اكتىسىنە وزگەرتىپ، قاراما-قايشى سوت اكتىسىن شىعارعان اقتوبدەگى سوتقا كىمنىڭ ءالى كەلەدى؟ وسىدان كەيىن، جۇمىسقا قايتا ورنالاستىرۋ تۋرالى مىندەتتى سوت شەشىمىن ورىنداتۋعا ەندى ەشكىمنىڭ دە قۇلقى جوق، ونى ۇمىتتى!  مۇمكىن، بۇل ماسقارالىق جاعداي جوعارعى سوت ءتوراعاسى قايرات ءماميدىڭ قۇلاعىنا تيسە تۇسىنەر.

 مەن، الدى 16 جاستاعى 8 نەمەرەنىڭ اتاسى، جۇمىسقا قايتا ورنالاستىرعان  2011 جىلى ناۋرىزداعى مىندەتتى سوت شەشىمىن ورىنداتا الماعان قورلىقتان، 2-رەت ينفاركت الدىم، جۇرەككە وپەراسيا جاساتتىم. شىدامىم تاۋسىلدى. 

اقتوبە وبلىسى قۇقىق قورعاۋ ورگاندارى،

قۇرمەتتى وتانداستار!

وتانىمىز قازاقستاندا زاڭدى بەلدەن باسىپ، ويلارىنا كەلگەندەرىن جاساپ، مەملەكەت قالتاسىنا قول سالىپ، مەملەكەت ەسەبىنەن بايىپ، مەملەكەتىمىزگە  ءقاۋىپ توندىرەتىن ىس-ارەكەتتەرگە بارعانداردى توقتاتۋعا ءبىراۋىزدان داۋىس كوتەرىپ، ماعان اراشا تۇسۋلەرىڭىزدى سۇرايمىن.

الدابەرگەن ايماعامبەتوۆ                                               2017 جىلدىڭ ناۋرىزى.